Read Southern Rengma Naga 1 KORINTHIANYU 6 Bible Online

1 KORINTHIANYU 6 - Southern Rengma Naga bible

1 KORINTHIANYU 6

¹Hagun dan nyu temi peha le a-sikezen gü ge kenyon binlo tsü sen-o kenshünyu dan ki gü mvule ntsen kemvunyuki gü tsü kera nshvu mvu ole?

²Kenshün nyudan le kazü gü ketso ti tse kethyü hagun le shamvu ole? Lo hagun no kazü gü ketso ti yatselo hagun le tha keshekeren ketsolo kümvu letse ole?

³Ngun hile ronzinnyu dan ai ketso ti tse kethyü hagun letsü shamvu ole? Tson yatselo ntsoka keyhun tho dan we ketso mvuti ole?

⁴Lo hagun le ntsoka keyhun rüla dan kera tiyatselo, hagun le kehun le khipe thakon thyühü kemvunyu no hagun jo kera tile?

⁵Hagun no kejolo nrün genyu ale jo higü zoshü güzhü nyo. Kha, kengüo tsasikezengü thyü kebin nyu nme jo kerashülo kegwa thakesha temi nme-e hagun dan nyu ndila se ole?

⁶Tson-o a-tsagü le a-sikezengü zen gü a-so ge jo kera, lo tsüle tenyen kemvunyu mhundyü ka kera hü ole!

⁷Hagun khinyunyu ge jo kera kethyü no hagun nye kvulo bin laso, nyu thyüo mele nge a-zü kemvu thyü ai nyhenlo mvu hü nla? Nyu thyüo mele hagun hon nkhelo la ai a-keshathyü tselo hü mvula?

⁸Tsonkethyü gü mvule hagun npvü ai a-zü kemvu thyü lo mehon nkhe, lo tsüle hagun tsasikezen nyu ge (tsühontse thyü).

⁹Ntsen serikemvu nyu le Sunggigü keda gwen loho tsekethyü tsü hagun le shamvu ole? Hagun npvü hagun sabin nya, peche tenu tson kipon petsü kemvu nyu, nmvue keyülanyu, nmvue pechenyu npvü pechenyu zen-o keyüla kehünyu.

¹⁰Nmvue kerühu nyu, nmvue meho tepen kehünyu, nmvue kenzeü nyu, nmvue jo gwakemvu zo metsin kehünyu, nmvue me kedün tyü kehünyu dan le Sunggigü keda gwen loho.

¹¹Lo hagun peha ko nduka tsühontse kethyünyu le. Ai Npugü Jisu Khrista zan nyu lo n gun Sunggigü Kapu gü nyu hagun sülo so, lo hagun thyü kenshün lo laso, lo hagun no kentsen nyu thyülo laso.

¹²Peha le hihontse zo so ti, “Awe le tha lihi thyü titse ai a kekhin ndi.” Ele, ai tha aphu nyu akechwi le bin mvu. A we le tha lihi thyü titse ai a ketekhi ndi, ai ale thame hensin yügü a-do thyü nyümvu.

¹³Kecha peha le zo-o, “Ketyüketsü le nginda genyu, lo nginda le ketyüketsü genyu.” Ele, ai Sunggigü le tsü kenyhun nren thyü pe ndi lati. Ai keyüla nrün genyu nmin thyüshü mvu, ai Npugü genyu lo Npugü ai nmin gü genyu le.

¹⁴Lo Sunggigü le a-kekvu nyu Npugü thyü nrhünlo laso, lo a-le ngun ai thyü nrhün loti.

¹⁵Hagun min dan hile Khrista ge kebin zan dan tsekethyü hagun le shamvu ole? Tson yatselo ale Khrista hon sen gü keyüla chün ketyünyu hon thyü lati ole? Tsonlo ho!

¹⁶Tenunyu serikemvu nyu zen kengü kethyünyu le au min nme laso tsekethyü hagun le shamvu ole? Ketsinlesü le kezo le, “Au le min nme laso.”

¹⁷Ai Npugü kipon bin kelanyu le, a-zen-o Kapu nme thyüla hünyo.

¹⁸Keyüla nrhilo, kemu kecha lihi ai tegwen ki thyü hü nyo, ai keyüla kehü nyu le a-npvü a-min bo nrhulao kemu thyüla hünyo.

¹⁹Hagun min hile hagun le Sunggigü kanyu hyukelo, lo hagun nyun ki bin kehü Kenshün Kapu gü kerüshvu ka tsekethyü hagun le shamvu ole? Lo hagun hile hagun npvü hagun hon mvu.

²⁰Kechamvule thami pe hagun hi kelasi genyu. Tsügenyu hagun min nyu lo hagun kapu nyu Sunggigü zankechwi thyülo, tsüle Sunggigü hon genyu.