Read Southern Rengma Naga 1 KORINTHIANYU 8 Bible Online

1 KORINTHIANYU 8 - Southern Rengma Naga bible

1 KORINTHIANYU 8

¹Lo ketyüketsü pe teromen kezü rüshvu kela rüla we, “Ngun aphu sha,” tsekethyü hagun le zohü nyo. Thakesha le ketekho la hünyo, ai keso le tsüthyü nsoshü hünyo.

²Temi ligühigü ai a-le tha peha shabin letse yatselo a-le sha kezügü ai shalo mvu zun.

³Ai temi ligühigüe Sunggigü sohü yatselo, a-no a-shalo hünyo.

⁴Lo teromen rüshvu kela hon ketyü rüla we, kazü hinyu teromen tsüle lihi kemvu tsekethyü nle shabin nyo, lo Sunggigü tsüle nme nti.

⁵Kechamvule teronyu ai kechon, lo npu ai kechon letse kethyü hontse tsangge ai lo kazü nyu ai teronyu letse kethyü le bin yatse ai;

⁶ngun genyu we tha aphu a-genyu chwiryü lo a-genyu ngun le yhun kebin Pvü gü Sunggigü le nme nti, lo tha aphu a-genyu yhun kelo, lo n ai a-genyu yhun kelogü le Npugü Jisu Khrista nti.

⁷Tson ai temi aphu hi sha bin mvu; lo peha le gunryüo ntsoka keti hi ai teromen kezü rüla rüchün kenye gunryü kela genyu tha khipe teromen kezü rüshvu kela dan tyü kethyü ka tsügü rüla rüchün bin hünyo; lo anyugun nyun kvu kemvu genyu anyugun nyun thyü nrhula hünyo.

⁸Ai nketyüketsü le nzen-o Sunggigü kho nni gunryü loho; nle tsü tyümvu ai shvu kecha thyü loho; nmvue nle tsü tyü ai gwakenye kvue loho.

⁹Ai hagun npvü hagun kendo thyülo kegwa tsügü tsü pe temi a-kerüchün kvu kemvunyu tson kekhin thyüla lo kenshvu gü tsü rüchün tonlo.

¹⁰Lo nle thakeshanyu nme, keshanyu laka teromen kezü kerüshvu ka nyu ho bin-o temi nme le nhyu shülo, temi tsügü tsüle a-kerüchün nkomvu yatselo, a-le teromen kezü rüshvu kela hon dan tyütsü titse kethyü a-nyu pechela mvuti ole?

¹¹Lo tsühontseo n thakesha tsügü genyu a-kerüchün nko kemvu tsügü thyü nshvu laso, lo temi tsügü tsüle Khrista le a-sun thyüo si kenjü nsikezen gü.

¹²Lo tsühontseo hagun le hagun tsagü sikezen nyu ge kemu thyüo anyugun nyun nko kemvu thyü nshvu hü yatselo, hagun le Khrista ge kemu thyü bin nyo.

¹³Tsügenyu ketyüketsü genyu a-sikezen nyu güno chela hü yatselo, asikezen gü no chela lo kenshvu genyu ale thame ka ai thyü tyülo hoso.