Read Southern Rengma Naga 2 KORINTHIANYU 1 Bible Online

2 KORINTHIANYU 1 - Southern Rengma Naga bible

2 KORINTHIANYU 1

¹Khrista Jisu Apostel thyü Sunggigü kendo nyu kelagü Paul, lo ngun pvü gü Timothi ayi le thu pe Korint nyu kebin Sunggigü kehun gü lo Akaya nyu kebin Sunggigü temi dan aphu ka shüshü le.

²Npvü Sunggigü lo Npugü Jisu Khrista ka nyu shwikenjün lo nyun kebwen gü no hagun zen bin kelo gü thyülo.

³Ngun Npugü Jisu Khrista a-pvü Sunggigü no kegwa gü thyülo, a-le shwikenjün pvügü lo nyun kebwen aphu a-ka nyu chwiryü kehü Sunggigü.

⁴A-le akenjün kethyü aphu nyu anyun thyü nbwen shü hünyo, tson-o ako no Sunggigü le anyun thyü nbwen keshü dan sen-o nyun kenjün thyü kebin nyu nyun thyü nbwen shü nrün genyu.

⁵Kechamvule ale Khrista kenjün kethyü nyu kenjün thyü salo kehü hontse tsühontse Khrista genyu anyun thyü kenbwen-e hyu chonlo kehü genyu.

⁶Ale kenjün thyülo yatselo, tsüle hagun no hagun nyun bwenlo, lo kenilo nrün genyu, lo ale nyun bwenlo yatselo, tsüle hagun no hagun nyu bwenlo nrün genyu, a kenjün kethyü hontse hagun ko kenjün kethyü nyhenlo yatselo hagun ko shalo ti.

⁷Ale hagun rüchün ngwa sa bin nyo; kechamvule hagun le kenjün kethyü nyu azen-o kenjün thyü kelo hontse nyun kebwe nyue azen-o hagun nyun bwenlo nrün genyu.

⁸Lo apvünyu ju, agun le Asia nyu kenjün kethyü hyukelo rüla hagun no shamvu bin nyü mvu, kechamvule agun khvü nsuri tsin pe agun miren pe kerhün-e rüchün mvula le.

⁹Agun kerüchün le sila lotse bin sele tse kethyü rüchün la. Ai tsüle agun no agun npvü agun tenyen mvule kesinyu thyü nrhünlo kehügü Sunggigü tenyenlo nrün genyu hihontse thyü keshü le.

¹⁰Kesikenshvu ketetsin kethyü tsühontse kethyü nyu a-le agun kenishü laso, lo kenilo ti, lo ale a-tenyen kebin güle akeni nishü ti.

¹¹Hagun le hagun kehi nyu agun keche shü, tson-o temi kechon le agun genyu kehi thyü kebin gü tsü kenishü ti, lo Sunggigü le jochü pe atsü shüti, lo a genyu temi kechon le Sunggigü shwe ti.

¹²Ale akenyü bin kehü le higü hile, ale thyümin thakesha mvu le Sunggigü ka nyu chwikeryü shwikenjün gü sen-o kazü gü mhundyü nyue lo tsünyeki-e hagun mhundyü nyu yhun nshün njü hü tsekethyü anyun le a-npvü a jünzo bin hünyo.

¹³Kechamvule ale thu pe hagun ketsü le hagun no swülo kegwa lo a-kon shalo kegwa nti a-me kecha ndi; a kerüchün le hagun le sha ntsenlo la se ado tse tenyen bin nyo.

¹⁴Hagun le arüla peha sha kebin hontse, Npugü Jisu Khrista jon nyü ale hagun genyu asherhün kehü hontse hagun ko no a genyu hagun sherhünlo nrün genyu.

¹⁵Ale hi sha tsentsü kebin genyu, hagun no jochü kon hvu hyu kesinlo nyüo hagun ki gunryü ri nyü so.

¹⁶Gunryü hagun shwishüo Makedonia ki gun-o Makedonia nyu rani hagun ki gunryüo hagun no a nipe Judia ki shünyü so.

¹⁷Ale hi thyünyü keso ka a nyun thyülo shamvu ado tse hü le? Sunggigü sha kemvunyu hontse a tsügwün rhikeso ka, Ele, nmvu le, tse hü ole?

¹⁸Sunggigü le jo ketsin zokehü hontse hagun ka kezo ajo-e Ele, lo nmvu le tse nimvu ketsin.

¹⁹Kechamvule Silvana lo Timothi agun le hagun ka a-jün zo kehügü Sunggigü Nyugü Jisu Khrista we Ele, lo nmvu letse hü mvu, ai a-zintse Ele, tse hünyo.

²⁰Kechamvule Sunggigü le zo pe bin kenjü dan aphu a-ka nyu Ele, tse kethyü hyulo kehü genyu. Tsügenyu nle a-genyu Amen tseo Sunggigü zan kechwi thyüshü hünyo.

²¹Ai Khrista nyu alope hagun kesin-o penso keshü gü tsüle Sunggigü, lo a-le ano jünzo lotse akhikho shü laso.

²²A-le a-mohor pe nge vülo laso, hakhin nme hontse a-kapugü khipe nnyun nyu shü pe ntsü laso.

²³Ai ale hagun kenjün genyu nthu gwün Korint nyu gunryü nyü mvu kela le, a-ketsin tsekethyü Sunggigü le ajünzo bin nyo.

²⁴Ale hagun ketenyen so ge npu thyü titse mvule hagun no hagun kenyülo nrün genyu hagun keche kehünyu thyü titse kehü gwünzin. Kechamvule hagun le ketenyen nyu nko kebin genyu.