Read Southern Rengma Naga 2 KORINTHIANYU 10 Bible Online

2 KORINTHIANYU 10 - Southern Rengma Naga bible

2 KORINTHIANYU 10

¹Ale Paul, Jisu Khrista jvü kegwa lo a-kebwen nyu hagun ka hibin nyo. Ale hagun zen kebin ka we tsenyo mha tse, lo hagun kepen ki lo hagun ge ajo kvu sala hünyo.

²Hagun cheno ai ano hagun ki gunkeryü ka ajo nsu nyalo; ai temi peha le ale temi thyümin phin rüchün-o yhun hü nle tse arüchün nshvu kehü dan ka we ajo nsu sa shü titse bin nyo.

³Ketsin le, agun le kazünyu yhun bin-e kazügü phin kerüchün genyu kega hü mvu.

⁴Ale khipvüo kega kehü teri ronye-e kazü gü nyu teri ronye hontse mvu; ai chwida nko sasa kethyü dan-e bola la kegwa Sunggigü ka nyu teri kanyü kekvu dan sen hünyo.

⁵Ale tsü sen-o ketekho-o Sunggigü thakesha gü tson kekhin lihi-e borhola hünyo, lo ale temi kerüchün lihi-e tenlo-o tsüdan no Khrista jozen tinla hünyo.

⁶Lo hagun le a-jo zenpen zentilo yatselo a-jo zen kemvunyu dan shaja pe tsü titse ndo sen bin nyo.

⁷Hagun le hagun mhundyü ka nyu le bin yo tsü nti nri kehü gwünzin le. Temi ligühigüe a-npvü a-lope Khrista hon letse kethyü rüchün tsentsü hü yatselo, a-no agun ko Khrista hon kethyü hontse, tsühontse a-ko letse kethyü sha tsentsülo nye.

⁸Npugü le agun no hagun bo nshvula lotse mvule hagun thyü nso shülo tseo kekvu kipe agun ben nyu shü laso; lo tsügenyu agun le kemakin din hüe tsügenyu we kejo loho.

⁹Ale lesü thupe hagun ketsunla titse bin mvu.

¹⁰Kechamvule anyugun le kezo le, “A-lesü dan nyu we a-jo nsu lo kvu sa, ai a-le gunkeryü ki we a-jo-e kvumvu lo tha lihi kemvu thyüla hünyo,” tson hü.

¹¹Temi tsühontse zo kehünyu no ale bin kemvu ka a lesü nyu tha zo kehü lo ale kebin ka atho nyu tsühontse kehü dan tsü shalo chi.

¹²Lo ale temi peha a-npvü a-le tetso letse kehünyu zen kendyü shwi nshvu kethyü gü mvu. Ai anyugun le anyugun npvü anyugun khipe me zenkendyü lo khinyu khinyu ketun shwi kethyü tsüle anyugun tha sha kemvu le.

¹³Sunggigü le agun no ryüo hagun ti lotseo agun jün khikho keshü agun gwün ndo pe aketsü nye kerüche agun le kemakin la loho.

¹⁴Kechamvule agun le rüche kenye npharyü lamvu, keshanyu laka agun le gunryüo hagun timvu zun yatse-e hagun timvulo keshvui, agun le Khrista jolokegwa gü sen gunryüo hagun tishü kethyü genyu.

¹⁵Tsügenyu ale me kechanyu le tha thyüshülo, kemakin kerüche thyü hümvu, ai ale nrin kehü gü le hagun ketenyen no gon kenyelo-o, hagun dan nyu agun tho no nmhun salo nda tse kehü gwünzin.

¹⁶Tsühontse ale jolokegwa gü zope hagun nyeki kebin nyue senthyü loti, lo mejün thoshüo mele gungü tha thyü kela dan genyu ale kemakin loho.

¹⁷Ai ketsinlesü le hontse zo njü, “Ai temi ligühigüe kemakin yatse-e Npugü genyu kemakin lo.”

¹⁸Kechamvule temi a-npvü a-shwe kehü gü mvule Npugü le a-shwe kehü gü le a-zü kethyü genyu.