Read Southern Rengma Naga 2 KORINTHIANYU 12 Bible Online

2 KORINTHIANYU 12 - Southern Rengma Naga bible

2 KORINTHIANYU 12

¹Kemakin kethyü genyu thame kechwi ndi yatse-e ale kemakin mvulo shvu laso, ai ale Npugü kanyu tha kehyu dan lo tha yhenshwi pe ahi keshü dan zoshü tile.

²Chen tseryü pezi laso, ale Khrista nyu temi nme rüla kesha le a-zen-o tsang heshen gü ki kü; a-min-e sin-o kü le a-min sinmvuo kü yo ale shamvu, Sunggigü le sha bin nyo.

³Ale sha kethyü le temi tsügü zen-o kerüyü bin nyu küla; lo a-min pvükü le a-min sin mvuo kü yo ale shamvu, Sunggigü le a-npvü shabin nyo.

⁴Lo a-le tha zolo bu keho, temi le kezoi kemvu jo dan me sha.

⁵Lo temi higü genyu ale kemakin ti, ai a npvü agenyu we ale kvu kemvu nti ame kemakin loho.

⁶Ai keshanyu laka ale a npvü kemakin nyü so-e ale tha rüchün mvuo zo loho; kechamvule ale ketsin zo nrün genyu. Ai temi nme no ahyu lo akhwen nyü kebin nyeki arüchün ngon kela kenshvu genyu ale a kekhenilo laso.

⁷Lo tha keda kechon tsin pe ahi keshü dan genyu ano arüchün ngon ri kela nshvuo tsehü nme pe athyü nyu shü laso, tsüle ano arüchün ngon rila mvu nrün genyu satan jolonyu nme le avüshü shü tse hünyo.

⁸Gwünshen ge ale Npugü no age tsü khila lotse kehi thyü.

⁹Ai a-le aka, “Ashwi kenjün tsüle ngenyu penle; kechamvule nle kvu kemvu nyu akekvu shatilo kehü genyu.” Ale tsügenyu Khrista kekvu no age binlo nrün genyu akvu kemvu genyu ale kemakin kethyü le akenyü kvu laso.

¹⁰Tsügenyu ale Khrista genyu we kvu kemvunyue, tetsin kepvünyue, hokeli kethyü nyue, mele a nshwen nyhün kethyü nyue, kenjün kethyü nyue, akenyü kvu laso; kechamvule ale kvu kemvu ka tsüka ale kvu bin kehü genyu.

¹¹Ale kennunyu hontse bin laso, ai hagun genyu le; kechamvule hagun le ajün zoshü kezüi. Ale thakon mvu yatse-e apostel keda tsin nyu nyeki shenkvu mvu shü kethyü genyu.

¹²Apostel nyu ketsin nme tse kethyü zansü nyhenhi kethyü aphu nyu, tha zansü lo ndun kethyü tho dan lo kekvu tho dan hagun dan nyu thyüshü la tsentsü.

¹³Ale hagun no agenyu khvü nsu kemvu tsü nti a-malo tsünyeki hagun le kehun kecha dan nyeki shvu kvu ola? A thyükezü higü hi jüpe atsüshü ta.

¹⁴Hire, ale hagun ki gunryü titseo agwün ndo kebin higü hile gwünshen ge gü le; lo ale hagun hon thame loti tse loho; ale hagun hon fü gunryü zhü mvu; ai hagun fü ryü zhü nyo. Kechamvule a-nyenyu le a-pvü a-jvünyu phin ndo njü hü mvu, ai a-pvü a-jvünyu le a-nyenyu phin ndo kehü genyu.

¹⁵Tson-o hagun Kapu phin genyu ale akenyü ho tse ahon kebin jue nke shü nyü bin nyo, lo aphou ai hoshü ti. Ale hagun so pe hitsü laki thyülo, hagun we aso rhosa ti ole?

¹⁶Hagun le kezo le, ale hagun no agenyu hagun khvü kensu thyü mvue ado gwao hagun hon kegwa tenlo lahü nle tse.

¹⁷Ale me nipe hagun ki keshü dan tsüle ale akechwi kefü genyu ole?

¹⁸Ale Tita no gülo tseo nishü, lo ngun sikezen gü nipe au no gülo tseo nishü. Tita le hagun ka kechwi peha khilo la ole? Ayi mihvu nren Kapu nme kendo nyu hü mvu ole? Ayi mihvu nren phalu nme nyu kedü bin mvu ole?

¹⁹Hagun kerüchün hüle? Kesonyu ju, tsüle Sunggigü mhundyü nyu ale Khrista nyu tha zo kehü gwünzin, lo aphu tse hagun thyü ngwalo nrün genyu le.

²⁰Kechamvule ale gunryüo hagun shwi pe akendo kemvu hontse lo hagun-e ashwi pe hagun kendo kemvu thyü kela kenshvu. Tson kethyü nme thyülo kega kethyü, meshwi pe a-yhüthyü, nnyun kenta, nnpvü njün kefü, me tsin kethyü, selü kethyü, ketekho kethyü lo kevükeben no keryü nshvu.

²¹Lo ale hisigü ka hagun ki nigunryülo Sunggigü le hagun mhundyü nyu athyü ketsenyo shüo gükela ki kemu thyülao a-nyun kelulo kemvu, nshün kemvu, keyüla lo kejo kemvu tho thyü kehü kechon chechü bin ti ado tse nshvu bin nyo.