Read Southern Rengma Naga 2 KORINTHIANYU 13 Bible Online

2 KORINTHIANYU 13 - Southern Rengma Naga bible

2 KORINTHIANYU 13

¹Ale hagun ki ryü titse kebin hile gwünshen gü so. Me nmu kethyü lihi-e mihvu nmvue mishen le shabin yatselo tsüle ketsin.

²Ale hagun ka gunkeryü gwünhvu ge güka hagun no petsü binlo tse zokeshü hontse nthu-e hagun dan nyu bin kemvu ka zonishü bin nyo. Hagun ligühigüe himhundyü kemu thyü kelanyu lo kechanyu dan-e ale nigunryülo temi nme-e hoshü loho.

³Kechamvule Khrista le anyun nyu bin-o jozo kehü ketsin le mvuyo tsekethyü hagun le sha nyü bin kethyü ale sha kebin genyu. A-le hagun zen-o tha thyü kethyü le kvumvu lamvu, ai hagun nyun ki we kvusa bin nyo.

⁴Kechamvule a-le kvu kemvu nyu krus ge a-hüla, ai a-le ntsoka we Sunggigü kekvu genyu rhün tinla so. Lo a-zen keme thyüo ako kvu mvu, ai ale hagun ki keryü ka ale a-zen-o Sunggigü kekvu gü nyu yhun ti.

⁵Hagun le ketenyen gü nyu yhun bin le mvuyo tse kethyü hagun npvü hagun rüla rüchün shwi; tson-o hagun le njü bin le mvuyo rüchün shwi. Jisu Khrista le hagun nyun ka bin tse kethyü sha tsentsü bin le mvu la? Nmvu yatselo hagun le ketenyen nyu bin mvu laso.

⁶Aketenyen we hagun le ale a-zümvu lamvu tsekethyü shalo ti ado tse rüchün bin nyo.

⁷Ai hagun no thyüzüla mvu nrün genyu ale Sunggigü ka hibin hünyo; tsügü tsüle ale a-kezügü thyü kehü meno hyu titse mvule ale a-zü kemvu hontse-e hagun no a-kezü gü thyülo nrün genyu le.

⁸Kechamvule ale thame thyüo ketsin gü ntsunlo nrün ndi ai ketsin gü genyu tha thyü hünyo.

⁹Tsügenyu ale kvu mvu lo hagun le kvu tse kebin ka asherhün hünyo. Ale kehi thyü kehü le hagun no gwakenyelo nrün genyu le.

¹⁰Ale hagun kepen ki bin ketseka higühi thu shü bin nyo; lo tson-o ale gunkeryü ka Npugü le ano borhola lotse mvule thyü nkoshü nrün genyu kekvu khipe aketsü gü sen rüchela mvu nrün genyu.

¹¹Jo kekhin gü, apvünyu ju, kegwa thyü bin tanye, gwapen kelo hü gunlo, ajo dan nyülo, kenyun rhünlo, kengü gwa binlo, tsonlo yatselo keso lo nyun kebwen Sunggigü le hagun zen bin loti.

¹²Kenshün kembo kethyü jvü sen-o khinyu khinyu kelushü le nye.

¹³Kenshün nyu dan aphu hagun kelu küshü le nye.

¹⁴Npugü Jisu Khrista shwikenjün lo Sunggigü keso gü, lo Kenshün Kapu nzen kepvüshen kehü gü no hagun aphu zen bin kelo gü thyülo.