Read Southern Rengma Naga 2 KORINTHIANYU 2 Bible Online

2 KORINTHIANYU 2 - Southern Rengma Naga bible

2 KORINTHIANYU 2

¹Ale hihontse kethyü rüchün bin laso, ale hagun ki rani ryüo hagun no hagun nyun gwamvu kethyü thyüni la mvu ti.

²Kechamvule ale hagun no agenyu hagun nyun gwamvu lao, segü le athyü pe asherhün keshü min le bin nla? Agenyu a-nyun gwamvu kela gü le mvu ole?

³Lo ale kerigü ka tsühontse thu shü le, kechamvule ale hagun ki ryülo ale me genyu akenyülo kezünyu ge anyun gwamvu kela kenshvu genyu le, aketenyen lo akenyü gü tsüle hagun-e aphu tse hagun kenyü tsentsü ti.

⁴Lo ale kenjün thyü sa lo anyun keyhunkerun lo ayhüpu che sao thu pe hagun ki shü; lo tson kethyü tsüle hagun no hagun nyun gwamvu lati tse mvule ale hagun so sahü tse kethyü hagun no shalo nrün genyu.

⁵Keshanyu laka hagun ligühigü genyu-e temi peha no nyun gwamvu la yatselo, tsü a-mvule hagun no a-genyu hagun nyun gwamvu laso; ai a-nmu tonri tsinla mvuo a-le hagun nyun thyü kenshvue gwamvu ritsin mvu tse rüchünlo nye.

⁶Kechamvule hagun temi kechon le shaja pe a-tsü pe tsühontse kela sile tsonla gwün nye.

⁷A-no a-nyun gwamvu ritsin tinla lo kenshvu genyu hagun a-kemu jüshüo a-nyun thyü nbwenlo yatselo gwakvu ti.

⁸Tsügenyu ale hagun ka hi kebin gü le hagun le a-soni hü tsekethyü a-no shalo kegwa thyüshülo.

⁹Higenyu ale himhundyü thu pe hagun ka keshü hagun le tha lihi kae ajo zen hü le mvu yo tsekethyü sha ntsenlo ti tsekethyüe rüchün sin-o thu shüle.

¹⁰Hagun le ligühigü kemu jü keshü nyu, ako jüshü hünyo. Lo ale nyu jüshüla yo, lihi-e jüshü kela tsügü tsü le hagun phin kegwa rüchün-o Khrista mhundyü nyu tsü jüshü laso.

¹¹Tson kethyü genyu satan no anyeki gwakvula hümvu, kechamvule ale a-do dan shamvu bin kemvu genyu.

¹²Lo ale Khrista Jolokegwa zo pe mehi nrün genyu Troa nyu keryü ka Npugü le ano tsünyu lotho thyüshü nrün genyu kakhin khinshye pe atsü kebin hyulo.

¹³Ai ale tsünyu asikezen gü Tita hyulo mvu kela genyu anyun bwenlo mvula. Tsügenyu ale anyugun khela-o tsonchü sen-o Makedonia ki gunla.

¹⁴Ai Jisu Khrista genyu kvulo zin kehü gü, lo lika hikae meno nge a-thakesha rünkegwa rünyü zinlo kehügü Sunggigü cheno le.

¹⁵Kechamvule kenilo kela ju dan nyue lo nke bin kelanyu dan nyue ale tharün kegwa Khrista le rope Sunggigü ki shü kebin hontse kethyü genyu.

¹⁶Kechamvule nmhen kebin ju genyu we tsüle me rünshvula kehügi tharün gwakemvu nme, lo kenilo kela ju genyu we tsüle kerhün senryü kehü tharün kegwa nme. Lo segü le tha tsühontse kethyü thyülo kü la?

¹⁷A gun we temi kechanyu hontseo Sunggigü jo pe a-min kendi thyüla hümvu, ai kechamvule Sunggigü le agun nikeshü genyu, agun nyun ketsin thyüo a-mhundyü nyu Khrista gonyu hontse jozo hünyo.