Read Southern Rengma Naga 2 KORINTHIANYU 3 Bible Online

2 KORINTHIANYU 3 - Southern Rengma Naga bible

2 KORINTHIANYU 3

¹Hile nyü pe ale kemakin bin kela khwen hontse le? Le temi peha le thyü kehü hontse ajün kezo lesü pe hagun tsü nmvue hagun ka hi mvulo shvula?

²Anyun ge thu kenjü temi aphu no swülo kegwa ajün kezo lesü tsüle hagun le.

³Lo hagun le Khrista kanyu gunkeryü lesü ale khipe hagun ketsügü le tsekethyü tsinshü, lo tsügü tsüle lesü kethu zü mvule rhünzin bin kehü Sunggigü kapu lope tso ge mvule hagun nyun ge thulo laso.

⁴Lo Khrista genyu Sunggigü kipon n ketenyen tsühontse kethyü le bin laso.

⁵A npvü ale tha lihi-e aka gunkeryü gü thyülo gwa letse kethyü zobin kethyü gü mvu, ale tha lihi-e thyülo kegwagü tsüle Sunggigü kanyu.

⁶A-le ano jopen jozen kelo keshün gü lotho dan thyülo kegwa pe ako atsü; lo tsügü tsüle thu pe bin kenjü lesü jvü gü nyu mvule Kapu nyu. Kechamvule lesü jvü le me boshvula hü, ai Kapugü we kerhün khishü hünyo.

⁷Ai tso yhen pe tsüge thu kelo kesi lotho gü a-keben kebin tsü sentinla nrün güe, Mosa mhun keben tsügü tsü genyu Israel nyu nyenyu dan le a-keben nrilo ho kela tsügü tsüe teshwen le bin yatselo,

⁸tsünyeki Kapu lotho gü we zankechwi thyü kvu mvu ti ole?

⁹Lo temi nmula kehü lotho nsen gingvü bin yatselo, nthyü ntsenlo kehü lotho gü we tsünyeki-e gingvü tse kvu mvuti ole?

¹⁰Ketsin thyü, kekhin gü le gingvü ritsin kela genyu nduka gingvü kehügü le a-kengin ndishü laso.

¹¹Lo ndila nrün güe gingvü tse chwiryü yatselo, ndilo kehogü we tsünyeki gingvü kvu ti.

¹²Ale a sidyü tsühontse kethyü nme le kebin genyu nshvu mvu tse jozo hünyo.

¹³Lo Israel nyu dan le keben gü nri bin-e no tinla lo hyumvula kethyü thyü mvu nrün genyu Mosa le phi lope a-mhun sun kelo hontse, a gun we tson hü mvu.

¹⁴Ai anyugun nyun rüla so; tsügenyu nthu keti-e kejopen kejozen pe bin kenjü a-whe gü keswü ka a-kesun le bin hünyo, kechamvule Khrista nti le tsü sen tin kela genyu.

¹⁵Ele, nthu hi keti Mosa tejvü dan swü keso ka a-kesun tsügü le anyugun nyun ge bin hünyo.

¹⁶Tson-e temi le nyun kelu-o Npugü denzin niryülo a-kesun tsügü khila hünyo.

¹⁷Lo Npugü tsüle Kapugü; lo lika hikae Npugü Kapu le kebin ka n kekhin ndila hünyo.

¹⁸Ai ngun aphu nmhun sun mvuo Npugü zankechwi kethyü gü nrio, nthyü kelu pe zankechwi kethyü Npugü Kapugü nyu tsü keryü nyu thyü kelu pe zankechwi nyu zankechwi kecha gü nyu a-hontselo hünyo.