Read Southern Rengma Naga 2 KORINTHIANYU 4 Bible Online

2 KORINTHIANYU 4 - Southern Rengma Naga bible

2 KORINTHIANYU 4

¹Tsügenyu, Sunggigü le ashwinjün-o lotho higü hyu kelo genyu ale ashesela hümvu.

²Tsonkethyü mvule ale kekebu tho lo kejokepvü tson dan tsü khela so; ale kekhen kekho-o mesa lo Sunggigü jo kemvu zo hümvu, ketsin gü keben nyu ale Sunggigü yhühyu nyu yhun hü, lo temi ligühigüe no arüla kegwa shalo titse ale ayhen thyü hünyo.

³Lo ale sen-o jünzo kehü jolokegwa gü kebu yatselo, nkela nrün nyu dan mhundyü nyu nti kebula kehü gwünzin.

⁴Kechamvule Sunggigü hontse kethyü gü Khrista jolokegwa keben gü no me gwün nbenlo nrün genyu, kazü higü terogü le tenyen hü kemvunyu dan yhütyü thyüpo laso.

⁵Kechamvule ale a npvü arüla zo mvule Khrista Jisu le Npugü letse kethyü jünzo hü, lo a we Jisu genyu hagun gonyu thyüla sele.

⁶Tson-o, “Keben no kezün gwün nbenlo,” tse nduka kezo gü tsü le Sunggigü. Jisu Khrista mhun ge zankechwi kethyü Sunggigü keben gü khishü nrün genyu a-le anyun gwün nben shü laso.

⁷Ai kekvu keda tsügü tsüle ahon mvule Sunggigü hon tse meno shalo nrün genyu kenya higü hi pe nnyon no kethyü ala higü nyu bin hünyo.

⁸Likipon hikipon mele a nthyü nnyü hüe anyun gwamvula hü mvu, anyun gwün kesedun hünyo, ai ashesela hümvu.

⁹Mele a nshwen nyhün hünyo, ai Sunggigü le akhela hümvu, mele avüshyela hünyo, ai a nkelo hümvu.

¹⁰Meno amin ge Jisu le rhün hü kela shalo nrün genyu ale amin ge Jisu sigü khipvü zin hünyo.

¹¹Kechamvule meno sila lo kegwa athyü min ge Jisu le rhün kehü shalo nrün genyu ale akeyhun le a-zintse kenshvu nyu bin hünyo.

¹²Tsügenyu kesi le age a-tho thyü bin hü, ai kerhün le hagun ge a-tho thyü bin hü.

¹³Ketsinlesü nyu thu kenjü le, “Ale zo hünyo, kechamvule ale tenyen kehü genyu,” ketenyen kapu tsügü nyu ako zo hünyo, kechamvule ale tenyen kehü genyu.

¹⁴Lo Sunggigü Npugü Jisu thyü nrhün kelogü le ako pe Npugü Jisu sin-o thyü nrhün sen gunryüo hagun zen-o a-mhundyü nyu bin sinlo titse kethyü ale tsü shabin nyo.

¹⁵Tha hi aphu hagun genyu le, lo tson-o Sunggigü shwikenjün le temi ti chon kenye kelo hontse anyugun le chenkeno kehi thyü pe Sunggigü zankechwi thyü ti.

¹⁶Tsügenyu ale shesela hümvu, tsonkethyü gü mvule tegwen min higü le ndi güzhü lae anyun ki kebin mingü le khenyütsen a-keshün thyü gwen gwen tse hünyo.

¹⁷Kechamvule keshanyu jaka akenjün kethyü keshe gü genyu kethonthen bin kehü zankechwi thyü nrün kensu gü thyü nchon shülo kehü genyu.

¹⁸Tsügenyu ale tha hyu kehü ju fü mvule hyu kemvu gü fü hünyo; kechamvule hyu kehü gü we keshanyu jaka gwünzin ti; ai hyu kemvu gü we kethonthen bin nrün genyu.