Read Southern Rengma Naga 2 KORINTHIANYU 5 Bible Online

2 KORINTHIANYU 5 - Southern Rengma Naga bible

2 KORINTHIANYU 5

¹Lo kazü hinyu amin ale anyu yhun kebin phika higü hile nrhola yatse-e ben no thyü kemvu Sunggigü ka nyu hyulo nrün kethonthen bin kehü ka nme le bin laso.

²Ketsin, ale sunlo mvuo tsangge hyulo nrün tsügü pe ahen kelo nnyü ho bin hünyo.

³Lo tson-o ka tsügü khibenlo yatselo ale a kemben kethyü hyu mvula nrün genyu.

⁴Kechamvule ale phika higü nyu kebin kae sunlo keho thyüo anyun kenkhi thyü bin hünyo, tsügü tsü le higü rho kela rüchün mvule kerhün gü no sila lo kegwa higü hi nyülo lao tsangge hon gü khibenlo nyü bin hünyo.

⁵Lo higü higenyu ndo nron keshü gü tsüle Sunggigü, lo a-le hasen Kenshün Kapu khipe ntsüla so.

⁶Tsügenyu ale anyun peche zin bin hünyo. Ale athyü amin ka higü nyu kebin then Npugü zen binlo hü mvu tsekethyü ale sha bin nyo.

⁷Kechamvule ale hyuo yhun hü mvule tenyen-o yhun kehü genyu.

⁸Ai ale anyun pecheo yhun kehü le ale amin higü nyu bin mvule Npugü ka ki a-zen bin nyü kvu bin nyo.

⁹Tsügenyu ale ka higü nyu metse nmvu metse a-kenyü kon thyü titse kethyü ayhen thyü hünyo.

¹⁰Kechamvule ngun ligühigüe Khrista le me ketso nrün bin gü mhundyü nyu so kü mvulo keshvu genyu; lo tsükatsü nle nmin higü nyu kebin ka thyü kela dan, kegwae keshvue nchün hyulo ti.

¹¹Lo Npugü shye nshvu mvulo keshvu shao ale temi dan ka zo hünyo; lo a kerüchün le hagun ko hagun nyun ki tsügü tsü shabin ado tse tenyen.

¹²Ale a npvü ajünzo pe hagun hini titse kethyü gü mvu, ai a genyu hagun le ketekho sa zü kethyü le kebin, temi a-nyun nyu mvule tegwen kipon ketekho kehünyu dan ka tha zoni shülo nrün do tsin pe hagun hishü nyü bin nyo.

¹³Kechamvule ale kelu tinlae tsüle Sunggigü lotho genyu le, nmvue ale ntsen hüe tsüle hagun genyu kegwa le.

¹⁴Kechamvule Khrista keso gü le a ntsen sen hü nyo, tson-o temi nme le aphu sunthyüo sila, tsügenyu aphu sila so tsekethyü awe tenyen tsentsülo laso.

¹⁵Lo rhün hü kelanyu no yhun-e a-npvü a-genyu mvule a-genyu si-o rhünnilo kelagü genyu yhunlo nrün genyu a-le aphu sun thyü si laso.

¹⁶Tsügenyu nle himhundyü ki temi jvü nyu Khrista nmu hüe ntsoka gerho tsühontse sinmvu kela hontse temi jvünyu temi nme-e nmu sin nya gwün.

¹⁷Tsügenyu temi ligühigüe Khrista nyu bin kelanyu le, a-le temi keshün nme laso; tha when ju ndi laso; lo hire, tsüdan aphu a-keshün kü laso.

¹⁸Lo athyü pe ano Khrista genyu a-zen kengü gwa nilo kela, lo kengü gwani kelo lotho khipe atenyen keshü gü, Sunggigü ka nyu tha aphu chwiryü.

¹⁹Lo Sunggigü le Khrista nyu bin-o kazü gü thyü pe anyugun no a-zen kengü gwanilo laso; tson-o mele a-mhundyü nyu thyüzü njüe me nmu mvu laso, lo tson-o kengü gwanilo kela jo gü pe atenyen shü laso.

²⁰Tsügenyu ale Khrista jolonyu thyü hünyo, tson-o Sunggigü le asen-o age me ka zo tenge hünyo.

²¹Ngun genyu Sunggigü le kemu nme-e sha kemvu gü kentsen gü thyülo nrün genyu.