Read Southern Rengma Naga 2 KORINTHIANYU 6 Bible Online

2 KORINTHIANYU 6 - Southern Rengma Naga bible

2 KORINTHIANYU 6

¹Lo a-zen kengü tha thyüo hagun no Sunggigü ka nyu chwikeryü shwikenjün hyulo kela gü tsü pe kenrun nyu thyüla nyalo tse hagun ka hi tenge tse hünyo.

²Sunggigü le nyu zo shüyo nyülo: “Ale a-gwünkho toka nkhwen nyülo laso lo kenikelo tsangkeben jon gü nyu ale ncheshü laso.” Hire! Gwünkho kegwa tsüle ntsoka hile; kenikelo tsangkeben tsüle ntsoka hile!

³Meno ale lotho kethyü nyu akemu nme-e hyulo mvu nrün genyu, ale tha lihi kae me tson kekhin nme-e thyüshü hümvu.

⁴Ai ale Sunggigü go thyü kehü hontse, hoshü mvu tenge kethyü nyu, kenjün kethyü nyu, hokeli kethyü nyu, lo thyülo keshvu tsin nyu nyhenhi bin hünyo.

⁵Me no akevü nyu, do kethyü nyu, kevükeben kethyü nyu, thatho nyu, khwen kebin nyu, lo kenyon keteri nyu-e,

⁶nshün-o yhun kethyü nyu, thakesha, a-keshathyü tse kethyü nyu, me shwi kenjün nyu, Kenshün Kapugü nyu, ketsin thyüo me keso nyu.

⁷Joketsin kezo nyu, lo Sunggigü kekvu nyu, a njüzin-e lo ngwazin-e kentsen teri ronye kesen nyu,

⁸teshwen kepvü nyue lo tetsin kepvü nyu, meno arüla zo nshvu lo zo ngwa kethyü aphu nyu a kekheni hünyo. A lope mesa kehünyu hontse thyü hünyo, ai ale joketsin kezonyu le.

⁹Me le a no thasha kemvunyu hontse hüe ale thasha sa, lo ale si güzhü kelanyu hontse hüe hire, ale rhün hünyo, a nthyü nnyü sae a boshwe lomvu.

¹⁰Mele ano a nyun kenjün thyü sa kehü hontse-e ale anyun nyü zin hünyo, tha kendinyu hontse hüe temi kechon thyü pe no nnyalo hü; thame kendi hontse hüe ale tha aphu bin hünyo.

¹¹O, Korinthianyu ju, ale hagun ka tha zo a kethüla hü mvu, ale anyun khinshye kenmhun pe hagun tsüshü le.

¹²Ale hagun genyu a nyun khinkhinlo lamvu, ai hagun le agenyu hagun nyun khinkhinlo la kehü gwünzin le.

¹³Lo ale anyenyu ka kezo hontse hagun ko no ale hagun so kehü hontse hagun no a-keso tsinshü nrün genyu hagun nyun khinshye kenmhun shülo.

¹⁴Tenyen hü kemvunyu zen-o ketun mvu tse hagun gunda kekhen kerhün nya. Kechamvule kentsen lo serikemvu hvu le dihontse kepvüshen lo gwa tila? Nmvue keben lope kezün hvu tsüle nyu kerhün la?

¹⁵Khrista lope Baal hvu le nyu ka kejo rhünlo la? Nmvue ketenyen nyu le tenyen kemvunyu zen-o nyu kerhün hon le bin nla?

¹⁶Sunggigü Kershvuka güle teromen kezü zen-o nyu kenthon pe bin njü nla? Kechamvule nle rhün bin kehü Sunggigü Kershvuka le; tsü rüla Sunggigü le zo kenjü le, “Ale atemi dan nyu yhun-o anyugun dan nyu bin ti; lo ale anyugun Sunggigü thyü ti, lo anyugun no atemi thyü ti.”

¹⁷Tsügenyu Npugü le zo hünyo, “Hagun tsüdan nrhi chwiryüo hagun kecha thyülo nye. Lo tha nshün kemvu dan nme-e kesü nya nye, tsonlo yatselo ale hagun zenlo tile.

¹⁸Ale hagun pvügü thyü ti, lo hagun peche-e tenu-e anyenyu thyü ti, Kekvutsin Npugü le tson zo.”