Read Southern Rengma Naga 2 KORINTHIANYU 8 Bible Online

2 KORINTHIANYU 8 - Southern Rengma Naga bible

2 KORINTHIANYU 8

¹Apvünyu ju, Sunggigü le Makedonia nyu kehun shwinjün keshü rüla hagun ko no shanyü.

²Mele anyugun nshwen nyhün sao kenjünthyü lo rhokedyü thyü kebin nyue anyugun shekerhün thyü nhosa tse tha hoshü le.

³Lo akesha le anyugun le shülo kegwathen shüshü, lo tsünye kerüche-e anyugun kendo thyüo hoshü le.

⁴Lo anyugun le agun kengüo kenshün nyu ju kecheshü titseo me shwikenjün lotho higü hi thyü titseo agun thukeyhun sa le.

⁵Lo tsüle agun le nrin kebin nyeki-e kerüche thyü shüle! Anyugun le a-nyu npvü anyugun khipe Npugü tsüshü, lo tson-o Sunggigü kendo nyu anyugun le anyugun khipe agun-e tsüshü le.

⁶Tsügenyu agun le himhundyü ki Tita no thyü kebin hontse me shwikenjün tho hinyu hagun dan nyue thyü penshü lotseo a-thukeyhun shü.

⁷Hagun le tha aphu nyu nnya bin nyo; ketenyen nyue, jokezo nyue, lo thakesha nyue, me kecheshü nyü kethyü nyu, lo hagun le a kesonyu metse nnya bin nyo. Tsügenyu agun le hagun no shwikenjün tho ligü nyue nhoshü nyü bin nyo.

⁸Ale ahza nme hontse-e khishü bin mvu, ai me kechanyu le me yhen thyü kehü rüla pe hagun hishüo hagun le ditsüki meso ketsin thyü hüyo tsekethyü shalo kenyü genyu le.

⁹Kechamvule hagun le ngun Npugü Jisu Khrista le me shwikenjün rüla sha bin nyo; tsüle a-le nnya ai hagun phin kerüchün genyu tha kendinyu thyüla; hagun no a-tha kendi genyu nnyalo nrün genyu.

¹⁰Lo higü genyu hagun ka zoshü kebin gü le, ndunyeki binzen kelo tho thyü kebin gü tsü ntimvule thyünyü sa tse thyü penla yatselo gwakvu ti.

¹¹Tson-o hagun le thyü nsen kebin gü thyü pen kelo hontse hagun le thyünyü kebin gü thyü gunlo ti.

¹²Kechamvule hagun le hoshü nyü kethyü gü le bin yatselo, Sunggigü le hagun kendi kon mvule, hagun le nyu hoshü yo tsü lolo ti.

¹³Lo me kechanyu no rüyülo lo hagun no hagun khvü nsula titseo jo higü hi zobin mvu.

¹⁴Ai hagun no ketun kelo rüchün-o, ntsoka hagun le kesükela thyü kebin genyu pe anyugun rhokedyü shweshwishü yatselo anyugun-e khenyüme anyugun kesükela thyükelo nyü hagun shweshwishülo ti, tson-o hagun ketunkü loti tsekethyü kerüchün genyu le.

¹⁵Hihontse thu kenjü hontseo, “Kechon hyukelo gü ai rüchelo mvu, lo keshanyu hyukelo güe rhorila mvu.”

¹⁶Ai Sunggigü cheno bin nyo, kechamvule Tita nyun thyü pe no agun hontse hagun phin rüchün a-nyun nkhi kelo genyu.

¹⁷Agun le a-ni keshü genyu nti mvule a-le hagun ki gunryü nyüo jo higü le a-npvü a-kendo la le.

¹⁸Lo jolokegwa tho genyu kehun aphu ka a-rühvu kehü a-sikezen güe nipe a-sinshü le nye.

¹⁹Lo tsüntimvule Npugü zankechwi genyu lo ako lotho thyü nyü hü tsekethyü meno shalo nrün genyu a-tenyenshü kela shwikenjün lotho higü nyu a-zen-o njwenlo tse kehun le a-kejülo-o a-nishü le nye.

²⁰Lo tsügü tsüle agun le thyü kebin thaho keshü lotho higü nyu meno a-rüchün nshvu mvulo nrün genyu.

²¹Kechamvule Npugü ka kenjü ntimvule temi mhundyü nyue kenjü gü thyü titse agun le rüchün kehü genyu.

²²Lo thatho higü ka a-nyun kenkhi thyüo thyüzin kehü apvünyu nme ko pe au sinshü bin nyo, a-le ntsoka we hagun rüchün ngwa sao a-nyun nkhi kvu bin laso.

²³Lo Tita we ayi kengü nme thyü hagun lothyü kehünyu nme le, lo a-sikezen kecha hvue kehun le au nishü bin nyo; Khrista zankechwi sen gunryü nrün genyu.

²⁴Tsügenyu hagun le meso kehü lo ale shwe kehü jo tsüle a-ketsin tsekethyü kehun dan mhundyü nyu tsin pe anyugun hishü lo.