Read Southern Rengma Naga 2 KORINTHIANYU 9 Bible Online

2 KORINTHIANYU 9 - Southern Rengma Naga bible

2 KORINTHIANYU 9

¹Lo kenshünnyu dan le kekeche rüla we ale thushü mvue gwa.

²Kechamvule hagun ko keche nyü bin kethyü tsü ale sha kebin genyu. Lo hagun Akayanyu le chenme mhundyü ndo senbinla sele tse kethyü rüla tsü Makedonia nyu mhundyü nyu hagun zope amhun thyü hü. Lo hagun shekerhün tsügü genyu anyugun temi kechon no a-nyun pe shü soryüla le.

³Ai ale npvünyu ju nikeshü le hagun genyu amhun thyü kehü jo dan no jo higü nyu a-kenrun thyüla mvu nrün genyu le, kechamvule hagun no ndo binlo lotse ale zokeshü hontse hagun no ndo binlo kenyü genyu le.

⁴Tsonmvuo Makedonianyu temi peha le azen gunryüo hagun le ndo sen bin kemvu hyulo yatselo; hagun tenyen ngwasa tse hüo, hagun nti mvule ako no kejapfü loti.

⁵Tsügenyu akerüchün le apvünyu ju no amhundyü rio hagun ki gunryü mvulo shvu ti ado tse rüchün, lo hagun le himhundyü ki zoshwishü kenjü dan tsü ndonron sen bin-o thyülo tsekethyü genyu mvule hagun nyun nyu shünyüo shülo nrün genyu le.

⁶Hagun hi rüchünlo, ligühigüe ntsi kerho pe gwünshülo kerho gvülo ti, lo ntsi kechon pe gwünshülo kechon gvü loti.

⁷Temi ligühigüe no kenyon kenyü, nmvue thyü mvulo shvu tse nyao, a-npvü a-nyun nyu rhikelo hontse hoshülo; kechamvule Sunggigü le a-kenyüo hoshü kehünyu so kehü genyu.

⁸Lo Sunggigü le hagun shwinjün-o tha lihi-e pe hagun kesükela thyüshü logwa, tson-o hagun no tha seni nyu hagun kesü thyüo thatho kegwa lihie thyüsa shü loti.

⁹Tsü rüla hihontse thu njü, “A-le nhosa pe kendinyu tsüshü; a-keso le kethonthen bin ti.”

¹⁰Lo ntsi khipe ntsi kegwün gü tsüshü kehügü lo ketyüketsü khishü kehü gü le hagun le tha hyulo kehü tson dan thyü nchon shü ti, tson-o hagun no kentsen keseri gvüsa loti.

¹¹Lo a-le hagun no a-zintse nho sa tseo tha khipe me tsülo nrün genyu lihie khipe hagun tsüsa shüti, tson-o hagun no tha khipe agun ben nyu shüo agun no sen gungü me ketsü genyu mele Sunggigü shwe ti.

¹²Kechamvule lotho higü thyü keshü le kenshünyu dan rhokedyü gwünkhin keshü ntimvule tsügenyu temi no Sunggigü shwen kenye salo kehü genyu.

¹³Hagun le jolokegwa tenyen lo zen kehü hagun tho higü sen keryü genyu, lo hagun le nho sa tseo tha hope anyugun-e lo kechanyue tsü keshü genyu temi kechon le Sunggigü shwe ti.

¹⁴Lo hagun ka tha hyukelo dan le Sunggigü le hagun shwinjün sa kehü tsin keshü gü genyu hagun nnyüho tseo hagun genyu kehi thyü ti.

¹⁵Rhinhi tilo keho hon kenrun nyu khipe ntsü kehü Sunggigü cheno sale!