Read Southern Rengma Naga GALATIANYU 1 Bible Online

GALATIANYU 1 - Southern Rengma Naga bible

GALATIANYU 1

¹Temi kanyu mvu, nmvue temi genyu kemvu, ai Jisu Khrista lo Npvü Sunggigü, kesinyu dan nyu Khrista thyü nrhün kelo gü.

²Lo azen kehü apvünyu ju aphu azen kengüo kelu keshü khipe Galatianyu kehun aphu tsüshü le.

³Npvü Sunggigü lo Jisu Khrista no shhwikenjün lo nyun kebwen pe hagun ketsügü thyülo.

⁴Npvü Sunggigü kendo hontse hizon ka serikemvu kazü hinyu nkenchwilo titseo nkemu genyu a-le a-phou hoshü.

⁵A-no kethonthen zankechwi gü thyülo. Amen.

⁶Khrista le shwikenjün genyu hagun ko kelogü, hagun le whütse tsü nrhio jolokegwa kechaki güzhü laso.

⁷Lo tsügü tsü le jolokegwa kecha le bin kethyü genyu mvu, ai temi peha le hagun ketekhio Khrista jolokegwa gü zo nshvu kehü gwünzin.

⁸Ai agun metse nmvue tsangge jolonyue ale nduka zope hagun senthyü keshü gü mvuo jolokegwa kecha pe hagun senthyü hülo tsünyu no gwa tsenyü khü.

⁹Agun le nduka hagun ka kezo hontse ale ntsoka-e tsü zoni hünyo, temi lihigüe hagun le nduka hyukelo gü mvuo jolokegwa kecha zope hagun senthyü hü yatselo, a-no gwalo tsenyü khü.

¹⁰Kha, ale temi so fühü le, Sunggigü so fühü nla? Lo ale temi kenyü thyü titse ayhen thyü hü nle? Ale ntsokhin temi kenyü thyü hü yatselo ale Khrista go thyülo nrün ndi.

¹¹Apvünyu ju, ale senthyü kehü jolokegwa gü tsüle temi kanyu ryü mvu tsekethyü hagun no shalo nyü bin nyo.

¹²Kechamvule ale temi kanyu tsügü tsü hyulo mvu, nmvue mele tsü zope asenthyü shümvu, ai Jisu Khrista le a-npvü tsü tsinpe ahi keshü genyu.

¹³Lo hagun le nduka ale Judanyu jvü gü zen kehü ka ajvü arüla-e sha hü ti, ale Sunggigü kehun gü shwirüchün-o tsü bokemhüla titse ayhen thyüsa hü.

¹⁴Tsügenyu ale apvü abon nyu nyünnyü jvü sen-o ayhenthyü-o a-sü a-dan nyu Judanyu jvü nyu keritsin nyu nme thyü soryü.

¹⁵Ai Sunggigü le shwikenjün nyu a nnyukelo mhundyü ano a-lothyü titse akhipe kecha thyüo akolo laso.

¹⁶A-le a-nyugü pe ahishüo ano arüla jolokegwa pe Juda kemvunyu dan nyu zoshü lotse kethyü ka dihontse tiyo tse ale temi nme ka-e shün mvu.

¹⁷Nmvue a mhundyü ki apostel thyülo kerinyu dan fü, Jerusalem nyue nsin mvu, ai ale Arabia nyu nshyela, tson-o Damaska nyu nigun.

¹⁸Tson-o tsüsiki ale Kefa zen ketenoshü titseo Jerusalem ki nsin gü jonryü pvün a-zen bin.

¹⁹Ai Npugü sikezen gü Jakob kehyu nyeki apostel kechanyu nme-e hyumvu.

²⁰Ale thu pe hagun tsüshü kebin dan le, Sunggigü yhühyu ka zoshü. Jo hile kenku jo kemvu.

²¹Tsüsiki ale Siria lo Kilikia kazü kipon ryülo.

²²Lo tsü keti tsüle ale Judia nyu dan zen kemhun hyuo kesha mvu.

²³Ai anyugun le, “Nduka ngun nshwen kehügü le ntsoka we a-le bokemhüla titse kehü ketenyen gü zope me senthyü tinla sele tsekethyü mele kezo nyülo.”

²⁴Tson-o anyugun le agenyu Sunggigü shwen sala.