Read Southern Rengma Naga GALATIANYU 2 Bible Online

GALATIANYU 2 - Southern Rengma Naga bible

GALATIANYU 2

¹Tsüsiki chen tseryü pezi siki ale Barnaba lo Tita ko sin tseo Jerusalem ki ni nsin.

²Lo tsüle Sunggigü le ano gülo tse atesha keshü genyu ale nsin; tson-o ale Juda kemvunyu mhundyü ka jolokegwa gü zope senthyü keshü rüla anyugun ka zoshü. (Sharhinyu dan nti ka zoshü) ale senthyü kehü nmvue senthyü gunkeryü gü tsüno thajo thyüla lo kenshvu genyu.

³Ai azen kehü gü Tita le Griknyu yatse-e a-no girülo tse tenge mvu.

⁴Ai npvünyu ketsin kemvu kebu yüryü kebin dan tsüdan le nle Jisu Khrista genyu nkekhin ndila sele tsekethyü tsü shao tejvü pe nphinlo titse nkuo yüryü kebin gwünzin.

⁵Jolokegwa ketsin gü tsüno hagun zen binlo nrün genyu ale gwünkho keshanyu ka-e anyugun jo we zen shwi mvu.

⁶Ai teshwen keshanyu bin din kethyü dan, anyugun le lihi thyü bin-e awe anyugun kenkhin ndi; Sunggigü tsü le temi so kechacha thyüla hümvu; tha tsüdan tsü le age we tha keshün nme mvule.

⁷Ai tsonkethyü gü mvule jolokegwa pe gikerünyu dan ka zolo tse Pitor tenyen kela hontse, jolokegwa pe girükemvunyu ka zolo tse kethyü atenyen kela anyugun le hyu loso.

⁸Kechamvule gikerünyu genyu apostel tho lope Pitor tsükela gü le Juda kemvunyu dan genyu apostel tho tsülo pe atsükela genyu.

⁹Lo shwikenjün hi khipe atsü kela shalo ntsin Jakob lo Kefa lo Johan nyugun kachon dan hontse teshwen pvü kehü dan le a, lo Barnaba tse ayi no Juda kemvunyu ki gunlo tse lo anyugun le gikerünyu ki gunti tseo kengü nme kethyü zansü anyugun ben njüzin pe ayi ben sü.

¹⁰Lo anyugun le ayi no rhokedyünyu phin rüchün shü lotse shü, lo ako tsügü tsü thyüshü nnyü sa bin nyo.

¹¹Ai Kefa le Antiok nyu keryü ka ale a-mhuntsun a-kemu zoshü; a-le mu kela genyu.

¹²Kechamvule temi peha le Jakob ki bin-o keryü mhundyü a-le Juda kemvunyu zen-o tyütsü bin, tson-o tsüdan le gunryü ntsin gikerünyu dan nshvuo rani gü a-npvü kecha thyü tin kela genyu.

¹³Tsühontse Judanyu kechanyue a-hontse ketsin thyü kemvu genyu ketsin kemvu tsünyu Barnaba ko kozen tinla.

¹⁴Ai ale anyugun le jolokegwa ketsin gü nyu joketsin zokemvu hyulo-o ale anyugun aphu mhundyü nyu Pitor ka, “Nle Judanyu yatselo Judanyu hontse yhunlo mvuo dihontse Juda kemvunyu no Judanyu jvü hontselo lotse zologwa ti la?” tsonshü.

¹⁵Ngun le ngun nnyulo nyemhun ka Juda kemvunyu mvule, Judanyu le la.

¹⁶Ai Jisu Khrista ketenyen genyu kemvu we tejvü nyu thyü mvulo keshvu thyü kelo genyu temi nme-e ntsenlo hümvu tsekethyü sha, Khrista ketenyen genyu ntsenlo nrün genyu ngun le Khrista Jisu tenyenlo laso, lo tejvü gü genyu kemvu so, kechamvule tejvü tho genyu temi nme-e thyü pe ntsenlo nrün ndi.

¹⁷Ai ngun yhenthyü keshü nyu Khrista ge ntsenlo hü yatselo, ngun npvü ngun le kemunyu, tsekethyü hyulo hü, tsüle Khrista le kemu lokethyü nyu letse logwa le? tsonlo shvu.

¹⁸Ale anpvü borho kela dan thyüni yatselo ale tejvü gü gwünrho kelanyu so.

¹⁹Kechamvule Sunggigü kipon rhünlo nrün genyu tejvü gü ge tejvü kipon si laso.

²⁰Ale Khrista zen-o krus ge ahü laso; ale yhun sin bin mvu laso; ai Khrista le anyun nyu yhun bin nyo; lo ntsoka ale thyümin nyu yhun kebin keyhun higü hile, aso kehü lo agenyu aphou hoshü kela Sunggigü Nyugü ketenyen nyu kehü nti le.

²¹Ale Sunggigü shwikenjün gü pe a-kenrun thyüla hümvu; kechamvule ntsen kelo le tejvü gü genyu yatselo Khrista kesi le a-kon ndi laso.