Read Southern Rengma Naga GALATIANYU 6 Bible Online

GALATIANYU 6 - Southern Rengma Naga bible

GALATIANYU 6

¹Hire, apvünyu ju, temi lihigüe mula sele tse kethyü shalo yatselo, hagun Kapu temi ju, hagun le hagun jvü gwasa tseo temi tsühontse kethyünyu thyü njü nilo nye, lo nko kesemen tsühontse kethyü nyu yüla mvulo nrün genyu n npvü ntson shwilo.

²Lo hagun kekhvüno lo-o Khrista jvü gü thyü penlo.

³Lo temi lihigüe a-le thakon mvue a-npvü a-le tha nme thyülo kegwa rüchün hü yatselo tsünyu le a-npvü a-thyü nshvu kehü gwünzin.

⁴Ai temi lihigüe a-npvü a-rüla sha petsü binlo, tsonlo yatselo a-le a-kazonnyu genyu a-npvü a-denzin teshwen pvü loti.

⁵Kechamvule temi lihigüe a-npvü a-khvügü tsü pvükü nrün genyu.

⁶Ai temi lihigüe ketsin jo hilo pe a-senthyülo kehünyu aphu thakegwa aphu pe a-senthyü kehü gü zen kenjün lo nye.

⁷Meno nsa lanya, Sunggigü we pe keyü thyü keloi kemvu genyu, temi lihigüe a-le gwün keshü gü tsü gvüni nrün genyu.

⁸Tson-o temi lihigüe a-npvü a-thyü a-min genyu ntsi gwünshülo, a-thyü a-min genyu kenke tsü gvüni ti, ai temi lihigüe Kapugü genyu ntsi gwüshülo Kapugü genyu kethonthen kerhün gvünilo ti.

⁹Lo thakegwa kethyü kipon ntsonrüzila nya. Kechamvule thathyü hola mvu yatselo, a-gwünkho ka nle gvülo nrün genyu.

¹⁰Tsügenyu likahika metse nle thyülo kegwa ka temi aphu genyu metse, lo tson-o ketenyennyu kaminyu genyu nchon-o tha kegwa gü tsü thyülo nu.

¹¹Hire, ale lesü jvü kedada tseo anpvü arüla thu pe hagun ka shü le nye.

¹²Temi lihigüe nthyü nmin kendo nyu a-npvü a-thyü ngon nyü kehünyu le hagun no hagun girü pvülo lotse tenge kehü gwünzin; temi tsüdan le Khrista krus genyu tetsin pvülo nrün kerüchün genyu.

¹³Tsüntimvule a-girü kepvünyu le anyugun npvüe tejvü gü zen hümvu; ai temi tsüdan le nthyü nmin denzin genyu teshwen pvükelo rüchün-o hagun no hagun girülo nyü kehü gwünzin.

¹⁴Ai Npugü Jisu Khrista krus genyu a-me ale teshwen pvü loho. Agenyu a mhundyü ka we kazü nyu teshwen lo kazü kenyü aphu pe krus ge hü laso.

¹⁵Kechamvule n girü pvü metse lo nmvu metse, tsügenyu we tha lihi mvu,ai thyükenshün kelo tsüle abin gü kethyü genyu.

¹⁶Lo temi lihigüe jo hizen kelonyu aphu, lo Sunggigü temi Israelnyu no kegwa gü thyülo, lo shwikenjün güe pvükelo gü thyülo!

¹⁷Nthu gerhonyu temi nme-e no aketekhi nya gwünlo. Kechamvule ale a npvü a min ge-e Jisu genyu tejün shvu kechon pvü kehü genyu.

¹⁸Hire, apvünyu ju, Npugü Jisu Khrista shwikenjün no hagun Kapu zen bin kelo gü thyülo nye, Amen.