Read Southern Rengma Naga EFESANYU 2 Bible Online

EFESANYU 2 - Southern Rengma Naga bible

EFESANYU 2

¹Lo hagun ko nduka jozen kemvu lo hagun kemu genyu sihü.

²Lo tsüka tsü hagun le ntson ntsenyü jvu sen-o tsang lo kazü au ja nyu kehü kekvu dan kedagü kendo zen hü, lo tsüle ntsoka me jo zen hü kemvu nyenyu ju nyun thyüshü kehü nthyü nshvu shü kehü kapu gü le.

³Nyu tsüdan dan nyu agun aphu-e nduka nthyü nmin le thyünyü kehü tsü nkendo kenron thyüo temi kechanyu dan hontse yhun so gü Sunggigü nyun gwünkekhün pe a-nyunkenta kethyü nyu nyenyu ju thyü tinla.

⁴Ai Sunggigü le a-nyu bwen sao a-le nsori kethyü genyu nsoni kehü gwünzin le.

⁵Tsügenyu nle nduka tejvü gü gwünzü sen-o si tinla-e a-le nthyü nrhün pe Khrista sinlo laso. A-le hagun shwikenjün genyu hagun kenilo laso.

⁶Tson ketsin thyü le. A-le ngun kesun pe Khrista sinlo-o, Khrista genyu nno a-zen-o tsangge bin kelo thyülo laso.

⁷Kechamvule Jisu Khrista genyu nshwikenjün le a-jvü gwa-e gwaritsin kethyü sidyüki keyhun nyue no shalo nrün genyu.

⁸Lo hagun hile ketenyen genyu shwikenjün ka kenikelo gwünzin; lo tsüle hagun kegwa hagun kekvu genyue kemvu.

⁹Sunggigü le hagun shwikenjün genyu le, hagun tho kegwa genyue mvu, kechamvule hagun nme-e no ketekho nyü kemvu genyu.

¹⁰Tsüntimvule ngun hile a-tho dan me le, thakegwa thyülo tseo Khrista Jisu genyu nko kelo gwünzin. Sunggigü le nno tha tsüdan tsü thyü hülo tse kethyü genyu nchwennyu ndo sen hü laso.

¹¹Tsügenyu hagun le nduka hagun thyü gü ge Juda kemvunyu thyüo nben lope kethyü nthyü ge gikerünyu no hagun zen kekhonie hümvu, lo Israelnyu zen kesenye-e mvu, lo zope kenjü kipon hagun jün ndi amon?

¹²Tson-o hagun sidyüe ndi, keyhun higü nyu hi-e hagun le hagun tero-e ndi kethyü, tsü hagun si rüchün shü shwilo.

¹³Ai nduka nithenki hüe ntsoka we hagun le Jisu Khrista genyu kebin dan le Jisu Khrista zi tsü no hagun zen-o a-khonni gunryü laso.

¹⁴Lo Khrista le a-npvü gwaketho gü senryü n gun tsü shüo Judanyue lo Juda kemvunyue no nme thyü shü laso. A-npvü a-zi lope a-chvü nyu khinthü pe keyhun thyüo tsü genyu anyugun no kenrhi kehü gü borhe pe nme thyü laso.

¹⁵Kechamvule a-le tsühontse kegwa thyüla-o tsühvu lope mishün nme thyü pe a-sinlo laso.

¹⁶Lo a-le tsühontse shwikerüchün gü nyeki kvulo lao krus gü genyu tsühvu thyü kesin pe nme thyü pe Sunggigü zen kengü gwalo nrün genyu.

¹⁷Tson-o a-le ryüo hagun nithen ki kehünyu ka-e gwatho gü lo kekhoni ka kehü nyu ka-e gwaketho jo lope senthyü.

¹⁸Lo Khrista genyu ngun le lukipon hikipon hüe Npugü genyu nne ngun Pvügü ka gunlo gwa kelo gwünzin.

¹⁹Tsügenyu hagun le ntsoka we tesin rünyi kechanyu mvuso, ai kenshün nyu ju lo Sunggigü kaminyu ju zen-o kami nme nyenyu thyülo so.

²⁰Hagun le tsoka hontse apostel nyu lo sidyü keshanyu le binzen pe bin kenjü gü ge ka thyülo so. Khrista Jisu le a-npvü ka tsügü nyu a-quen tsingü nyu keda tsingü.

²¹A-ge ka kethyü tso aphu ketunkeren gungü Npugü genyu kenshün Kershvuka nme thyülo güzhü laso.

²²Lo hagun ko Khrista genyu kesin pe Kapugü no bin nrün Sunggigü ka nme thyü loso.