Read Southern Rengma Naga EFESANYU 3 Bible Online

EFESANYU 3 - Southern Rengma Naga bible

EFESANYU 3

¹Higühi genyu ale Paul, hagun Juda kemvunyu phin tsü rüchün-o Khrista Jisu dothyü hünyo.

²Hagun genyu Sunggigü le nshwikenjün lotho gü khipe atsüla kethyü hagun ko no shabin nda, ale n ngü ka jo keshanyu thu shüla se atale.

³Tsügü tsü le Khrista le a-npvü jo kentsun tsin pe ahishü laso.

⁴Hagun kotsü swüshü yatselo, ale Khrista rüla jo kentsun tsügü kesha tsü hagun ko shalo ti.

⁵A-le kenshün apostelnyu dan lo sidyükeshanyu dan ka Kapugü genyu ntsoka tsin kebin hihontse nmhundyü keyhun temi nyu danka we tsü tsinpe hi kentsen thyü shü mvu.

⁶Jo kentsuntsüle a-konle jolokegwa gü genyu Juda kemvunyu ko Judanyu zen-o kenya kerhün, lo kengüo min nme ge lo zanketho kecha kethyü dan, lo Khrista Jisu genyu zokenjü gü kenjün lo nrün dan laso.

⁷Ano Sunggigü le a-kekvu no thyülo kehü a-le me shwikenjün lotho atsü kela gü kenrun nyu tsügü lothyü hünyo.

⁸Kenshün nyu dan nyu keshen tsin nyu aphu dannyu keshen tsin gü ahi no, Khrista kenya sha tilo keho zope Juda kemvunyu hishü lotse.

⁹Lo temi aphu no tha aphu thyü keshü gü Sunggigü ge nduka nyu le kebu kenjü jo kentsun gü le nyuyo tsekethyü sha tsentsülo nrün genyu shwikenjün higü hi khipe aka shüshü.

¹⁰Tson-o ntsoka tsangge lokethyü keda ju lo kekvunyu dan no kehun ge Sunggigü do aphu shalo nrün genyu.

¹¹Tsügü tsü le Npugü Jisu Khrista genyu a-le rhi pe kethonthen thyü titse kehü gü tsüle.

¹²Khrista tsügü genyu ngun le a-tenyen-o a-zen kesha kelo genyu peche-o a-ki gükelo gwünzin.

¹³Tsügenyu ale hagun phin kegwa rüchün-o kenjünthyü kelo ale hagun no tsü rüchün pe hagun tsonrüzi nya lotse bin nyo; tsü aphu hagun genyu kegwa le.

¹⁴Higenyu ale Pvügü mhundyü nyu khosen hünyo.

¹⁵A-kanyu tsangge-e kazü nyue kami zantho kechacha kethyü hyulo.

¹⁶Kechamvule a-no a-kenya kegwa khipe hagun tsüo A-kapugü no kekvu pe hagun nyun ki kehü kapugü thyü nkvu shü.

¹⁷Ketenyen nyu Khrista no hagun nyun ki binlo,hagun no hagun mentsen yügü kesonyu binlo-o

¹⁸kenshün nyu aphu zen-o nne sha gungü tilo keho

¹⁹Khrista nkeso a-kethonkeda, a-ketetso lo a-kentsun, dikhoyo rüchün tilo kegwa thyülo, tson-o Sunggigü no hagun kesü thyülo letse nda.

²⁰Lo a-kekvu tsü no nnyun nyu nle hi rüchün kehü aphu so-e thyü shülo kegwa gü.

²¹A-no nthen teyhün nyu ki-e kethonthen kehun nyu lo Khrista nyu zan kechwigü thyülo. Amen.