Read Southern Rengma Naga EFESANYU 4 Bible Online

EFESANYU 4 - Southern Rengma Naga bible

EFESANYU 4

¹Tsügenyu ale Npugü genyu dothyü kehügü, hagun no hagun kozen yükeryü hagun keko tsügü nyu yhun kekü thyü binlo tseo hagun ka hi hünyo.

²Hagun npvü hagun rüchün keshen thyülo, ketekho nya, hagun nyunthon lo nnyun kekheni sen-o khinyu khinyu solo.

³Kapugü nyu kengü nme thyü kelo gü zenzin hülo titse kethyü hagun yhenthyülo.

⁴Min nme, lo Kapue nme, tsühontse hagun keko-e sidyü nme genyu hagun ko kelo le.

⁵Npu nme, ketenyen nme, baptism nme,

⁶lo ngun aphu sokebin, lo aphu zen kehü, lo ngun aphu ge kehü ngun aphu Pvügü, tsügü tsüle Sunggigü.

⁷Ai Khrista le ndo keshü kho, shwikenjün ndo pe ngun aphu tsü laso.

⁸Tsügenyu, “A-le tesoki kü kethyü ka, donyu kechon pe a-sin zen küla; lo kenrun nyu tha pe temi dan tsü laso,” tsonkethyü zo njü.

⁹A-le küla tsekethyü jo gü tsüle a-kon le a-le kazü ketsenyo nyu ki yüle tse zo ole?

¹⁰A-le aphu ka hülo nrün genyu tsükeryü tsüle tsang aphu so-e kensin gü so.

¹¹Lo a-le khinyu no apostel thyülo tse, khinyu no sidyükesha thyülo tse, khinyu no prosar thyülo tse, khinyu no pastor lo khinyu no senkethyü thyülo tse zoshü.

¹²Tsüle kenshün nyu ju no gwün ndolo nrün genyu lo KHrista min gü thyü nsolo nrün genyu.

¹³Tson bin-o ngun aphu ketenyen nyu lo Sunggigü Nyugü rüla kipon kengü nme thyü peshülo-o Khrista yhun kho thyülo nrün genyu.

¹⁴Tsüselo tson-o temi do sen-o nthyü nshvu kehü zü kenkhün no nwhün pe likipon hikipon shü nrün senkethyü jo no nkevü kehü ntsenyu hontse loho so.

¹⁵Ai keso sen-o jo ketsin zolo, lo tha aphu nyu min kü gü nkehun pe gü Khrista kipon shülo.

¹⁶Tson-o a-ge yhun kebin aphu kerhünron no tsüge senküo keren gungü min tsügü thyü kelo genyu kengüo min nme ge zan thokecha kethyü nyu aphu a-kekvu hyu külo njüo yhulo hünyo, tson-o keso genyu chon ketsin soryü hünyo.

¹⁷Npugü nyu ale kezo lo zoshwi keshüle higü hi: Juda kemvunyu le a-kenrun rüchün kehü hontse hagun we tson-o yhunlo shvu.

¹⁸Kechamvule anyugun le thasha pe zünla kethyü genyu; lo anyugun nyun kerü genyu shalo mvula-o anyugun le Sunggigü le khi keshü kerhün tsügü nyu anyugun khikho laso.

¹⁹Anyugun le kekejo nme shamvu tseo nshün kemvu aphu thyü nyü, keyhun kehio a-npvü a-hope serikemvunyu shü laso.

²⁰Ai hagunle Khrista sha kelo we tsühontse mvu.

²¹Khrista ge kebin ketsin gü pe hagun senthyü lo hagun le tsü nyülo laso.

²²Tsügü tsüle nduka hagun jvü gü, temi whengü, a-npvü a-bokechala kenyü genyu gwamvu ketsin tsin tse kethyü gü tsü rhola.

²³Lo Kapu gü nyu hagun nyun no keshün thyünilo.

²⁴Tson-o keyhun keshün gü no hagun thyü pe kentsen kenshün nyu Sunggigü hontse kethyü gü khi benlo chi.

²⁵Tsügenyu hagun lihigüe kenku tsü khela njüo hagun kazon nyu zen-o jo ketsin zo külo chi. Kechamvule ngun le min nme ge zan ketho kechacha genyu.

²⁶Hagun nyun nta-e kezü kemu we thyüla nya. Hagun nyun nta pe tsan yhüko no chela nya.

²⁷Satan bin pha shü nya.

²⁸Nduka rühu kehünyu no rühu ni nya; tsonkethyü gü mvule a-no tha pe rhokedyü nyu tsüzhün lo nrün genyu a-no a-yhen thyüo a-ben lope thakegwa thyülo.

²⁹Kentsü kenchen jo nmeno nmün nyu chwiryü nya, ai hagun jo kenyü nyu no gwalo nrün genyu zokezü ka jo kegwa nti zolo.

³⁰Sunggigü Kapu Kenshün gü kemvu thyü nya; hagun rhinlo nrün jon gü genyu a-le hagun ge mohor vülo laso.

³¹Hagun me nyun gwünkekhün kethyü jo, shochün shokhü, nyun kenthün, lo me kesü kethyü aphu khipe ketekho kethyü sin-o khela lo.

³²Sunggigü le Khrista genyu hagun shwi njün-o hagun kemu jü kela hontse hagun ko khinyu khinyu shwi njün-o nyun kenjü gü sen-o kemu jü pe ketsülo chi.