Read Southern Rengma Naga EFESANYU 5 Bible Online

EFESANYU 5 - Southern Rengma Naga bible

EFESANYU 5

¹Tsügenyu hagun le a-nyenyu a-kesonyu hontse Sunggigü hontse titseo hagun yhen thyü lo.

²Khrista le n gun so-o n gun genyu a-npvü a-phu hope Sunggigü mhundyü nyu tharün kenyü rokeshü hontse nrora thyü laso, tsühontse hagun ko keso no hagun jvü thyü hülo nye.

³Ai keyüla, nshünkemvu aphu, lo tha ketepen, hidan zan hi hagun dan nyu zo-e zü mvu; kenshün nyu dan nyu le tson zü.

⁴Kejokemvu nmvue nsükemvu jo, zozü mvu; tsonkethyü gü mvule Sunggigü kipon kerüno sa tse hü zü.

⁵Lo keyüla kehünyu, nshün kemvu nyu, thamen kezü rüshvu kehünyu, tha tepen kehünyu, le Khrista keda kethyü nyu lo Sunggigü kipon a-jün ndi le tsekethyü hagun le higü hi sha tsentsülo chi.

⁶Temi nme no jo kenrun jo tsü zope hagun sala nya. Kechamvule ngüka zokeshü dan thyü kehü genyu Sunggigü nyunkekhü le mezo zen hükemvu nyenyu ge gun kehü genyu.

⁷Tsügenyu hagun le tsüdan zen-o thame thyü nya.

⁸Hagun le nduka we zün laryü, ntsoka we Npugü genyu benlo kela hontse; keben gü nyenyu hontse yhunlo.

⁹Kechamvule njvü kegwa, kentsen, lo joketsin kezo aphu nyu keben gü sha le bin kü kethyü genyu.

¹⁰Tsügenyu tha lihi ka-e Npugü kenyü gü tsü rüchünlo.

¹¹Kezün gü tha a-sha gwalo hükemvu dan zen kepvüshen nya,tsonkethyü gü mvule tsüdan khishwi shü.

¹²Kezün ki thyü kehü thodan tsüle zoe zokeja kethyü genyu.

¹³Ai keben gü no yüryüo gwün nben shülo tha aphu hyu tsentsü tse chwiryü la hünyo. Tha lihi aphu hyu tsentsü tse chwiryüla kehü tsüle keben gü le ben shü kehü genyu gwünzin.

¹⁴Tsügenyu a-le, “Zhü kehü gü, kesinyu soryülo, lo Khrista le ngwün nben loti,” tsonshü.

¹⁵Tsügenyu hagun le nyu tsethyü hü yole, hagun npvü rüchün ryülo chi, thashakemvu nyu hontse mvule thakeshanyu hontse lo.

¹⁶Nje ntsenyü hile serikemvu genyu a-gwünkho kegwa ka nyhen thyülo.

¹⁷Hagun pin bin nya, ai Npugü kendo le nyu yo shalo chi.

¹⁸Lo zu tsüo nzeü nya, zu le nbo nshvula kehü genyu; tsonkethyü gü mvule Kapu gü no hagun kesü thyülo.

¹⁹Ketsin khwen, ketsin lü lo kenshün lü dan thyüo khinyunyu nthonlo, lo hagun nyun ketsin thyüo, lüthyü lo baja khun pe Npugü shwenlo.

²⁰Tha lihika-e Npugü Jisu Khrista zan nyu Sunggigü shwen zinlo.

²¹Lo Khrista rühvuo hagun khinyunyu hensin bin nyülo.

²²Menunyu hagun Npugü nyu kehü hontse hagun npvü hagun nyepvünyu hensin hülo.

²³Kechamvule Khrista le Kehun gü pe kethyü hontse me nyepvünyu ko a-nu pe genyu. Khrista we a-min gü tsüle kehun gü, kenikelo gü.

²⁴Kehun le Khrista jo zen kehü hontse, tsühontse me nunyu ko tha lihi ka-e a-npvü a-nyepvünyu jo zen hülo.

²⁵Me nyepvünyu ju, hagun ko Khrista le kehun so lo tsügenyu a-phu hokeshü hontse hagun nunyu solo chi.

²⁶Kechamvule a-jo nyu zü pe sü kenshün thyüla-o kehun no nshünlo nrün genyu.

²⁷Tson-o tsü no nshün lo zegwalo nrün genyu, kerhu nmvue tesentemvu kethyü nmeno a-ge bin mvu-o a-npvü lolo kenyü genyu.

²⁸Tsühontse me nyepvünyu le a-nunyu so pe a-npvü a-keso hontse lo hüzü. Temi lihigüe a-nunyu so kehü nyu le a-npvü a-so hünyo.

²⁹Temi següe a-npvü a-thyü min shwi ntsü hümvu, tsonkethyü gü mvule Khrista le kehun gin thyü lo shwi so kehü hontse a-ko tsonhü zü.

³⁰Kechamvule nne Khrista ge zan tho kecha kethyü nmeme genyu.

³¹higenyu temi le a-pvü a-jvünyu khelao a-nunyu zen yhun tin lati, tson-o au kengü nme thyü tin lati.

³²Jo higü hile ntsun sa, ale Khrista lo kehun au rüla kezo le.

³³Hagun lihigüe hagun nunyu so pe hagun npvü hagun keso hontselo; lo me nunyu ko a-npvü a-nyepvünyu rühvulo.