Read Southern Rengma Naga EFESANYU 6 Bible Online

EFESANYU 6 - Southern Rengma Naga bible

EFESANYU 6

¹Ntsenyu ju, hagun ko Npugü nyu hagun pepvünyu jo zenlo; tsonlo a-zü kethyü genyu.

²Npvü njvü rühvulo chi, tsonlo yatselo hagun le gwa loti.

³Lo hagun rünyi nyue rhünthon loti, jo higü hile thazo kenjü keri gü le.

⁴Lo mepepvünyu ju, hagun ko hagun nyenyu nyun gwünkekhün nya; tsonkethyü gü mvule Npugü kenyü kethyü tson ketsin lo gwalo mvulo keshvu zope anyugun senthyü lochi.

⁵Tegonyu ju, hagun ko Khrista ge thyü keshü hontse hagun nyun njü-o hagun sokekvu kebin hagun npunyu kenyü kemvu thyü kela nshvu sa tseo tsüdan jo kezen nyu thyülo nye.

⁶Me kehyu ka me kenyü thyü kehünyu jvü hontse la mvule Khrista gonyu, nyun ketsin thyü Sunggigü kenyüthyü kehünyu dan jvü hontse lo chi.

⁷Tson-o temi genyu mvule Npugü genyu hontse hagun shekerhün thyüo hagun tho thyülo.

⁸Hagun le do metse do kemvu metse tha kegwa thyü kehü tsü aphu Npugü ki tha tsü aphu hyunilo ti tsekethyü jo higü hi shalo nye.

⁹Lo npunyu ju, hagun ko anyugun ge tsü hontse thyülo, lo anyugun kesü kedün shü nyü bin-e hagun kekhenilo, kechamvule anyugun lo hagun Npugü le tsangge bin, lo a-le temi nme so kecha thyü hümvu tsekethyü hagun ai sha bin kela genyu.

¹⁰Jo kekhin gü le, Npugü lo a-kekvu kedanyu nko bin lo chi.

¹¹Satan tedo nshün kemvu dan zenkenren binlo nrün genyu Sunggigü ka hyu kelo teri ronye aphu khipvülo chi.

¹²Kechamvule nle zen kega kehü le temi mvule kedanyu, kekvu nyu, lo hizonka kazü nyu kehünyu sokeda thyü kehünyu, lo tsang lo kazü hvu janyu kehü nshün kemvu kapu-e zen kega hünyo.

¹³Tsügenyu hagun semen keryü nyü kega binlo nrün genyu Sunggigü ka hyu kelo teri ronye sen külo; tson-o sen külo lo sobin lo.

¹⁴Ketsin gü pe hagun senphin pvülo, kentsen keseri shüntyü khi lulo.

¹⁵Kegwa thyükela jolokegwa gü pe senthyü lo tseo hagun tenyen keshü gü tsü pe hagun phaje thyülo,

¹⁶lo aphu nyeki a-jvü gwakemvu gü, mah pe levü tsi kethyü aphu bokemhü lalo gwa nrün genyu ketenyen gida khipvülo.

¹⁷Kenikelogü tsü khipe hagun perün thyülo, lo Kapugü ka hyu kelo zhethon gü, tsüle Sunggigü jo gü, tsü khilo.

¹⁸Hagun Kapugü nyu lihi gwünkho ka-e hibin lo, tson-o kenshün nyu aphu genyu khela mvu lo hisin hisheo perhin perho binlo chi.

¹⁹Tson-o jolokegwa jo kentsun gü pe zo titseo a mün kvu keshü ka ano pecheo zoshülo nrün genyu agenyu-e hibin lo.

²⁰Kechamvule jolokegwa gü kezo ka ano pecheo zokezü nyu tsü zoshülo nrün genyu.

²¹Hagun no ale nyu tsethyü binyo lo nyuthyü bin yo tsekethyü arüla shalo nrün genyu Tukika joketsin zo-o Npugü lothyü kehü gü, asikezen gü asokegwa gü le a-npvü tha aphu zope hagun hishü ti.

²²Lo hagun no arüla shalo nrün genyu, lo a-no hagun nyun thukeyhun shülo nrün genyu ale a-nipe hagun ka shüle nye.

²³A pvünyu ju, hagun kegwa gü thyü binlo, Npvü Sunggigü lo Npugü Jisu Khrista kanyu ketenyen keri kethyü keso gü no hagun zen binlo.

²⁴Shwikenjün gü no Npu Jisu Khrista so rühvu ketsin thyü kehünyu aphu zen bin kelogü thyülo.