Read Southern Rengma Naga FILIPINYU 1 Bible Online

FILIPINYU 1 - Southern Rengma Naga bible

FILIPINYU 1

¹Khrista Jisu go gü Paul, lo Timothi hvule khipe Filipinyu kebin Khrista Jisu nyu kehü kenshün nyu aphu, kehun sharhi dan, lo tsünyu chülo thyü kehünyuka keshü.

²Npvü Sunggigü lo Npu Jisu Khrista kanyu chwikeryü shwikenjün lo nyun kebwen gü no hagun zen bin kelo gü thyülo.

³Ale hagun rüchün kelo tsenyü Sunggigü shwen bin hünyo.

⁴Hagun phin kerüchün genyu ale hikeso tsen asherhün sao hibin hü nyo.

⁵Kechamvule hagun le jolokegwa gü tenyenlo nyeka ryüo nthu keti azen kecheo lotho thyü kehü genyu.

⁶Hagun nyunki thakegwa bin zen keshü gü, a-le tsü thyü bin-o Jisu Khrista jon le keryü nyü thyü penshü nrün, ale tenyen tsentsü bin nyo.

⁷Lo hagun le anyun nyu kebin genyu ale hagun aphu genyu tsonkethyü rüchün bin nyo; kechamvule aphin pvü kebin ka-e lo jolokegwa gü nopen lo a-kegwa jün zo kebin ka-e hagun le azen-o shwikenjün gü tsü kerhün kü kethyü genyu.

⁸Lo Jisu Khrista kenjünkethyü nyun gü sen-o ale hagun aphu nnyüho bin hü tsekethyü Sunggigü le a-npvü shabin nyo.

⁹Tsüntimvule hagun no ketsin thakesha gü lo kegwa keshvu sha kekholo kehü lo keso nyu min kethünlo nrün genyu, ale hagun genyu hibin hü nyo.

¹⁰Tson-o hagun no thakegwa tsingü kejülo-o Khrista jon le keryü nyü nshün lo mumvu bin loti.

¹¹Khrista nyu kentsen keseri hyukelo tsü pe hagun süpvüo Sunggigü shwen lo azan kechwi thyülo.

¹²A pvünyu ju, himhundyü ki a ge tha lihile ryü kethyü tsü aphu jolokegwa zochon sinlo nrün genyu tsekethyü ale hagun no sha shü nyü.

¹³Kechamvule aphin zen kehü tsüle Khrista lothyü kehü genyu letse kethyü kedagü rikhun nyu aphu-e lo me kechanyu aphu-e sha tsentsülo kela genyu.

¹⁴Tsüntimvule Npugü zan nyu kehünyu kechon kile aphin pvüo hon kehü genyu tenyen tsentsü lo-o nshvu mvu tse Sunggigü jo sen-o zo peche kvulo laso.

¹⁵Temi dan me we meno anyugun shwen titse kethyü genyu lo me zen kenyi-o Khrista zope me senthyü hünyo, ai peha we thakegwa rüchün-o zo hünyo.

¹⁶Tsühvu tsü nme kipon le ano jolokegwa nopen lotseo akejülo laso tsekethyü shao akeso genyu thyü hünyo.

¹⁷Ai kechanyu we a-nyun njün-o mele aphin zen kehü ka hi ano anyunkenjün thyü titse rüchün-o azen kenyun rhün nyü kemvu genyu Khrista zo-o prosar thyü hünyo.

¹⁸Tson yatse-e thame mvule kerokon yatse-e nmvue ketsin thyühü yatse-e lithyü hithyü hüe meno Khrista rüla shalo hü zü, lo tsügenyu ale a sherhün, lo a sherhün bin ti.

¹⁹Kechamvule hagun kehi genyu Jisu Khrista Kapu gü le ache keshü genyu, siki a hoshüla titse kethyü ale shabin nyo.

²⁰Ale si-e rhün-e lihi thyüe kejola loho, lo ale peche sao, nduka hontse ntsoka-e aphu hi genyu Khrista no zan kechwi thyü ti, ale tsütenyen-o nnyü kehü gü tsügü tsüle a-npvü thyü pen shüti.

²¹Kechamvule awe rhünhü-e Khrista genyu, lo sila-e a genyu kechwi.

²²Ale amin higü hinyu rhün binlo atho genyu thakegwa peha le nichwiryülo gwa, tsonlo ale digü kejülo tiyo ale shamvu.

²³Ale tsühvu nme kipon-e gü ntsen mvu bin nyo. Ale tin lao gü Khrista zen bin tinla nyü bin, tsügü we gwakvu nrün genyu;

²⁴ai amin hinyu binsin tselo hagun genyu gwakvu ti.

²⁵Tsügenyu tsügü tsü tenyen tsentsü kethyü genyu ale bin ti, hagun no ketenyen nyu gwa kvulo lo hagun kenyülo nrün genyu ale hagun aphu zen bin titse kethyü ale shabin laso.

²⁶Tson-o ale hagun zen kehyu nio hagun no agenyu Khrista Jisu nyu hagun kenyü salo nrün genyu.

²⁷Hagun le Khrista jolokegwa temi thyülo kekünyu thyüo hagun npvü hagun temi zen yhunlo nye; tson-o ale hagun zen kehyu-e nmvue, jolokegwa ketenyen tenyu hagun kapue no kerhün pe nme thyüo kengü hagun yhen thyü kehü ano hagun rüla shalo lo asherhün ti.

²⁸Hagun kenrhinyu nshvu lanya. Nshvu kemvu tsüle anyugun le kenke nyu gun ti. Ai hagun we Sunggigü ka hyu kelo kvu kelo zansü le.

²⁹Tsüle hagun no Khrista tenyenlo nrün genyu ntimvule, a-genyue kenjün thyü sinlo nrün genyu.

³⁰Ale nduka anyun nkhi-o ayhenthyü gun keryü hagun le kehyu hontse ntsoka-e tsühontse kehü hagun le sha, hagun ko tsü hontse hagun yhenthyülo chi.