Read Southern Rengma Naga FILIPINYU 2 Bible Online

FILIPINYU 2 - Southern Rengma Naga bible

FILIPINYU 2

¹Khrista genyu hagun thyü nkolo le? Keso genyu hagun nyun bwenlo le? Kapugü nyu kengü kepvüshen lo le? Khinyunyu keshwi kenjün lo le?

²Tsügenyu hagun kerüchün nme rüchünlo, keso nme solo, lo kenyun rhünlo njüo nyun me thyülo, tson-o akenyü thyü penlo nye.

³Hagun npvü hagun jünkegwa fü nya nmvue ketekho-o thame thyü nya; ai tsenyo kehilo, hagun le menye gwakvu letse rüchün nya.

⁴Ligühigüe a-npvü a-rüla rüchün gwünzin tinla mvule khinyunyu phin rüchünlo.

⁵Khrista Jisu kendo gü tsü pe hagun nyuki shü sen hülo.

⁶A-le Sunggigü zen keme-e, Sunggigü zen ketun letse kethyü a-zan senlo mvu.

⁷Tsonkethyü gü mvule temi ngwao medo hontse thyüo a-npvü a-thyü kenmhenlo. Tson-o temi rhenrhe hontse gunryü.

⁸A-le a-thyü ketsenyo-o jokezen tson nyu kebin krus si-e thyülo.

⁹Tsügenyu Sunggigü le a-thyü pe gonsa shü, lo a-zan thyü pe zan aphu nyeki tetsosin shüla.

¹⁰Tson-o tsangge-e kazü nyue, lo kazü hensin kie yhun kehü aphu no Jisu zan nyu khosen külo nrün genyu,

¹¹lo temi aphu tse Jisu Khrista le Npugü le tse zoshwi kü ti, Pvügü Sunggigü zankechwi genyu.

¹²Lo hagun akesonyu ju, hagun le nduka Sunggigü jo kezen nyu thyü zin keryü hontse, tsühotse ayhühyu ka ntimvule ahyu kemvu ka chon kvuo hagun keni penlo nrün genyu petsü sao Sunggigü kenyü thyülo.

¹³Kechamvule a-kenyü thyü titseo hagun nyun thyü pe hagun no thyü nyü, lo zenlo kehü gü tsü le Sunggigü le genyu.

¹⁴Kenyon kenyü lo mezen kenyi nyao tha lihi-e thyülo.

¹⁵Tson-o kerhün jo tejen tsekho sen-o me hilo, kazü serikemvu nyu shyenyü hontse temi kemvu lo a-nyun kenra dan no hyu-o hagun nkhinlo keho nyu thyüo Sunggigü nyenyu kenshün nyu thyülo chi.

¹⁶Hagun le kerhün jo tsü tejen tsekho sen binlo, tsonlo yatselo Khrista jon nyü ale tsügenyu akenyülo ti; kechamvule ale kenrun nyu ayhen thyü hümvu lo a-kenrun nme genyu akekvu thyü bin kemvu genyu.

¹⁷Hagun ketenyen sen-o Sunggigü kerüshvu nyu tsü azi-e kezen shü lati ado tseo asherhün bin nyo.

¹⁸Tsühontse hagun sherhün bin lo, lo hagun shekerhün tsüpe azen kenjün lo.

¹⁹Ai ale hagun rüla shalo asherhünlo ti tse kethyü genyu thonsa mvu tse Timothi nipe hagun ka shü titse kethyü rüchün bin nle.

²⁰Temi nme a-hontse anyun sha mvu lo a-le hagun rüla rüchün pe a-nyun leho ketsin thyü kehü genyu.

²¹Kechanyu ju we Jisu Khrista rüla mvule a-npvü a-phin rüchün kü hü nyo.

²²Ai hagun le a-rüla sha tsentsü bin ti, ayi le kengü a-pvü a-nyu hontseo a-le azen-o jolokegwa kam thyü tinla so.

²³Tsügenyu arüla le nyu tse thyü tiyo sha nshwen lo-e ntsüe ale a-nikeshü rüchün bin nyo.

²⁴Lo Npugü kendo yatselo ale nshwen hagun ki ryülo titse tenyen bin nyo.

²⁵Asikezen gü azen-o kam thyü kehü gü, azen-o Khrista shüpahü thyü kehü gü lo hagun le a-nipe a rhokedyü ka-e a-no a lothyü kehü gü Epaphroditus ni nipe hagun ki shü mvulo keshvu rüchün so.

²⁶A-le hagun aphu hyu shü nyü salo kela genyu; a-le himhundyü ho kebin hagun no sha kethyü genyu a-nyun kenjün thyü sala.

²⁷Ketsin a-le ho-o si kesala le, ai Sunggigü le a-shwi njün nishü, lo a-ntimvule ano anyun gwamvu sin mvu tsitseo ashwi njün shü.

²⁸Tsügenyu ale hagun no a-shwio hagun sherhünlo, lo ako anyun gwakemvu no ndila nrün genyu ale a-nipe hagun ki shüshü sele nye.

²⁹Hagun Npugü zan nyu hagun sherhün küo a-zenlo nye; lo temi hon kethyü nyu rühvulo nye.

³⁰Kechamvule a-le Khrista lothyüo hagun le a-ge thyü nyüe thyülo keho ju thyü tseo a-le sila kesa kela genyu.