Read Southern Rengma Naga FILIPINYU 3 Bible Online

FILIPINYU 3 - Southern Rengma Naga bible

FILIPINYU 3

¹Tsüselo apvünyu ju, Npugü no shekerhün pe hagun tsü salo. Thu keshü si nme thu nipe hagun ka shü yatse-e aketekhi mvule, hagun le tsügenyu gwakvu kethyü gwünzin.

²Tehidan genyu hagun petsü binlo chi, hagun nsü nshvu kehünyu genyue hagun petsü binlo a-gikerü rokethyü nyu genyue hagun petsü lo.

³Ngun hile gikerünyu ketsin, ngun we Kapu günyu Sunggigü rüshvu hünyo, lo Khrista Jisu genyu nsherhün hünyo, nthyü gü we tenyen hümvu.

⁴Peha le nthyü ge kethyü gü tenyen hü züle tse yatselo, awe tsünye ki ketekho kvu kethyüi.

⁵Nnyukelo jon tetsenyü agirü kelonyu, ale Israel nyu, Benjamin tsipwen nyu, ale Ibri ketsin nyu; tejvü kipon rüchün solo ale Farisinyu.

⁶Yhen kethyü kipon rüchün solo ale kehun kenshwen nyu; tejvü nyu kebin ju kezen genyu ntsen nshün lo tsekethyü kipon rüchün solo temi nme a nkhinlo ho.

⁷Tson yatse-e tha tsü aphu a mhundyü ka gwa letse kehü ju tsü ale ntsoka we Khrista genyu tha tsüdan tsüle gwa letse hümvu laso.

⁸Tsünyeki ale Npugü Jisu Khrista thakesha kegwa tsingü zen kendyü solo tha lihie ale tsü no tha letse bin mvu so; ale a-genyu thatsü aphu nmhen kü laso.

⁹Ale Khrista hyulo lo a-no a-nyun ki ahyulo nrün genyu ale tsüdan tsü pe kerhu khekela hontse laso; tson-o tejvü nyu kehü ju kezen genyu ale ntsen nshün kelo chünlo mvule, Khrista ketenyen genyu tsügü tsüle ketenyen sen-o Sunggigü kanyu kentsen nme hyu kelo le.

¹⁰Ale Khrista zenkeshalo njüo a-le rhünni keso kekvu gü shalo, lo a-le kenjün kethyü ka a-zen-o kenjün thyülo njüo a-kesi ka jvü hontse loti tsekethyü genyu.

¹¹Tson-o ako kesinyu rünni solo titse ketenyen genyu.

¹²Ale ntsoka tsüdan tilo la so nmvue gwa tilo sele tse zobin mvu; tsü tilo titseo hü gun jü nyo; tsüle Khrista Jisu le ryüo a tenlo kela genyu.

¹³Apv"nyu ju, ale tsü tilo laso tsekethyü rüchün bin mvu; ai a kerüchün gü le asikipon kehü rüchün mvuo a mhundyü ki kehü gü hü tenge tse hünyo.

¹⁴Khrista Jisu nyu Sunggigü le tesoki tha nme pe atsü titseo ako bin, ale tsügü hü gun zhü nyo.

¹⁵N gun kapu denzin peshü kelanyu aphu n nyun le tsühontse rüchün külo nu; lo hagun peha le thakecha rüchün binlo Sunggigü le higühi tsin pe hagun hishü ti.

¹⁶Tson yatse-e ngun le then gun ryüo hiti kelo jvü nyu tsonchü nishü nu.

¹⁷Apvünyu ju, hagun ko azen-o kesithen lo chi, lo agun le hagun mhundyü rio tsin pe hagun hikeshü dan nriryü binlo.

¹⁸Temi kechon ki rüla ale gwün kechon ki hagun ka zoshü so, lo ntsoka-e ale chüo hagun ka zoni shü titse bin nle, temi tsüdan keyhun le Khrista krus gü shwikerüchün nyu thyü laso.

¹⁹Temi tsüdan le hisiki nkela ti, anyugun ginda le anyugun terogü, anyugun kekejo tsüle anyugun kenyü gü, lo anyugun le kazü hinyu rüla fü kehü gwüzin.

²⁰Ngun we tsangge temi le. Tsügenyu nne nkenikelo Npugü Jisu Khrista keryü khwen bin nyo.

²¹A-le a-npvü a-kendo thyüo tha aphu thyü pe a-hensin shülo kegwa kekvu gü sen-o nmin tenrenla lo kegwa higü hi thyü kelu pe a-min gigvü kethyü gü hontse loti.