Read Southern Rengma Naga FILIPINYU 4 Bible Online

FILIPINYU 4 - Southern Rengma Naga bible

FILIPINYU 4

¹Tsügenyu apvünyu ju, aso kegwa ju, ale nnyü kehü ju, akenyü ju lo akeda perün ju hagun Npugü nyu tsekho binlo nye.

²Ale Iuodia lo Suntuki au no Npugü zan nyu kenyun rhün binlo tseo au ka zoshü hünyo.

³Lo ketsin gunda kekhen kerhün kethyü gü, ale n-kono tenunyu tsühvu keche shü kethyü le asherhün; kechamvule au le jolokegwa lotho nyu Klement sin-o azen lotho thyü kehü kerhün tsü lesü nyu zan thulo kela kecha ju zen-o yhenthyü gun keryü genyu.

⁴Hagun Npugü nyu sherhün zinlo. Ale kezosi zoni-e hagun sherhünlo.

⁵Hagun nyun kenzhü temi lihigüe no shalo chi. Npugü kho nni bin laso.

⁶Thame rüchün pe hagun nyun leho nya, ai tha lihikae kehithyü lo hagun kapu rüshvu lo Sunggigü shwen-o hagun kehi tsü Sunggigü no shalo chi.

⁷Lo nyun kebwen Sunggigü, nle sha tilo keho gü le Khrista Jisu nyu hagun nyun lo hagun kerüchün dan ntsen sen binlo ti.

⁸Tsüselo apvünyu ju, ketsin, teshwen, kenjü, kenshün, nkenyü ho kethyü lo rühvulo kekü thakegwa hihontse kethyü pe hagun nyun kesü thyülo.

⁹Hagun le aka sha kelo lo nyü kelo dan, ajo nyue lo atho nyue kehyu dan tsü thyü hü yatselo nyun kebwen khipe ngun tsüshü kehü Sunggigü le hagun zen bin loti.

¹⁰Hagun le aphin rüchün kehü genyu Npugü nyu asherhün sa bin laso; hagun le ketsin thyü aphin rüchün ai gwükho hyulo mvu hü.

¹¹Ale jo hi kezo le arhodyü kebin genyu zomvu, kechamvule awe lihi thyü yatse-e kekenyo ndi.

¹²Ale rhodyü kethyü lo kesükela kethyü jvü sha, lithyü hithyüe, lihi gwünkho ka-e ale shabin nyo; kechon bin-e lo nnyon-e nnya-e lo ndi-e ale tedo tsüdan sha laso.

¹³Athyü nkvu shü kehü gü nyu ale tha aphu thyülo gwa.

¹⁴Ai hagun le a rhokedyü nyu a keche keshü hi gwa sale.

¹⁵Lo hagun Filipinyu le ale jolokegwa jün zo sokerika, ale Makedonia nken tin kezhü ka kehun kecha nme-e azen-o tha hoshü lo khilo-e mvu ai hagun nti tsekethyü hagun ko shabin nyo.

¹⁶Ale Thesalonia nyu kehü ka-e rhodyü kebin ka hagun le gwüngwa nme nti tha nipe atsümvu.

¹⁷Ale kenrunnyu tha lokenyü genyu mvu ai hagun no kechwi hyulo kenyü genyu.

¹⁸Hagun le nipe atsükeshü ale aphu hyulo laso, agenyu chonsa so, Epaphroditus le agenyu sen mvulo keshvu hagun le khikeshü tsü aphu sen ryüo atsü shü laso. Tha hidan hile Sunggigü mhundyü nyu tha rünkegwa kerüshvu Sunggigü le lolo kekü gü le.

¹⁹A Sunggigü le Khrista Jisu zankechwi kenya nyu hagun genyu mvulo keshvu aphu pe hagun tsüti.

²⁰Ngun Sunggigü, ngun Pvügü no kethonthen zankechwi gü thyülo. Amen.

²¹Khrista Jisu nyu kenshünnyu aphu kelushü le. A pvünyu azen kebin ju le hagun kelu shüle.

²²Kenshün nyu ju aphu hagun kelu shü le, tsüdan nyu Kaisarnyu kaminyu le hagun kelu sa shü le.

²³Npugü Jisu Khrista shwikenjün gü no hagun aphu zen bin kelo gü thyülo.