Read Southern Rengma Naga KOLOSINYU 1 Bible Online

KOLOSINYU 1 - Southern Rengma Naga bible

KOLOSINYU 1

¹Sunggigü kendo nyu Khrista Jisu apostel gü Paul lo asikezen gü Timothi hvule-

²Khipe Kolosinyu kebin Khrista genyu nshün lo joketsin nyu tsasikezen thyü kebin dan tsü shüle. Npvü Sunggigü kanyu chwikeryü keso lo nyun kebwen güno hagun zen bin kelo gü thyülo.

³Ayi le hagun genyu hikethyü ka Npugü Jisu Khrista A-pvü Sunggigü shwen bin hünyo.

⁴Kechamvule hagun le Khrista Jisu tenyen kehü lo Sunggigü temi dan aphu so kehü agun le nyü kelo genyu.

⁵Sidyü tsügü tsüle jolokegwa le ryü hagun tilo kerikanyu ketsin jo tsügü tsü hagun le nyülo laso.

⁶Jolokegwa tsügü le kazü aphu nyu a-sha nshao minkenye ryüo hagun tilo, tson-o hagun dan nyu Sunggigü shwikenjün sha tsentsü kelo nyü ryüo nthu keti hihontse bin nyo.

⁷Jo tsügü tsü hagun le ngun kengüo lotho thyü kehü ngun keso gü Epafra ka shalo. A-le n gun sunka ketsin thyüo Khrista lothyü hünyo.

⁸Lo a-le Kapugü le khipe hagun ketsü keso gü rüla-e pe agun ka zoshü.

⁹Hi genyu ayi le hagun rüla shakelo nyü ryüo nthu keti hagun genyu hibin hü nle. Kapu gü le khikeshü thakesha lo keka kepe sen-o Sunggigü kendo thakesha gü no hagun kesü thyü lolo tse hibin nyo.

¹⁰Tson loyatselo hagun le Npugü kendo gü lo a-kenyü gü thyü zin-o yhunlo ti; tson-o hagun keyhun le thatho kegwa aphu nyu hagun sha no bin loti, lo Sunggigü rüla kesha nyu min kenye loti.

¹¹Hagun no a-zankechwi kekvunyu, kekvu aphu pe hagun thyü nkolo-o, shekerhün thyü nyhenhi binlo nda.

¹²Shekerhün thyüo Sunggigü nthyü pe nno a-temi dan zen-o keben raja phen nyu njün hyulo kekü thyü keshü Pvügü shwenlo.

¹³Kechamvule a-le kazü kenke günyu n zen chwiryülo-o n khipe a-nyu a-sogü raja nyu shü kelo genyu.

¹⁴A-genyu nhoshü laso, lo n kemu dan jüshü laso.

¹⁵Khrista le nyhütyü pe hyulo keho Sunggigü hontse kethyü gü, tha aphu n yhun keshü mhundyü n nyulo kela nyuri gü.

¹⁶Kechamvule a-genyu tha aphu n yhunlo, tsangge-e kazü nyue, kehyu dan-e hyu kemvu dan-e, kekvu dan-e lo Npu dan-e lo kekvu kesen nyu aphu a-le, lo a-genyu nyhun külo.

¹⁷A-le tha aphu mhundyü ki nyu hü lo a-genyu tsüdan aphu a-pepvü pvü a-bin ka bin lo le.

¹⁸A-le a-min, kehun gü tsügü pe gü, a-no tha aphu nyu keda tsin gü thyü nrün genyu, binzen gü lo kesinyu dan nyu n nyulo keri gü thyü.

¹⁹Kechamvule Sunggigü le a-jvü tsü aphu no Khrista ge bin titse kethyü le a-kendo kela genyu.

²⁰Lo krus ge chwikeryü Khrista zipe gwatho lao tha aphu no a-zen kengü gwa kü lati tsekethyü genyu; a-genyu kazü nyu nmvue tsangge-e zen a-ki ryü ti.

²¹Hagun ko nduka we, tha gwakemvu thyüo hagun nyun ki Sunggigü shwinyü kemvu nyu thyü hü.

²²Ai ntsoka we hagun no a-mhundyü nyu nshün, rhumvu lo mu lokeho thyü titseo Khrista min lo a-zi genyu hagun zen kengü gwalolaso.

²³Hagun sidyü kegwa le kebin jolokegwa nyülo kelagü nyu tsü kelukenyon la mvutse, tsekho binlo yatselo tsühontse loti; jolokegwa tsügü pe kazü nyu temi aphu ka jünzo shü laso, ale Paul ako jolokegwa lotho higü hi thyü tin laso.

²⁴Ale n tsoka hagun genyu kenjün thyü bin-e a sherhün bin nyo; kechamvule Khrista le a-min gü, tsüle kehun gü sunka kenjünthyü kebin kon gü a thyü min kenjün kethyü nyu tsü thyü pen shü bin nyo.

²⁵Sunggigü jo gü meno sha kegwa thyülo titseo hagun genyu Sunggigü lotho keda hinyu ano lotho nyu nme thyü laso.

²⁶Ketsin jo kentsun tsügü pe nduka yhunkeri nyu dan kebu njüo henshwi pe a-temi dan hishü laso.

²⁷Sunggigü le Juda kemvunyu dan nyu kenya zan kechwi kethyü jo kentsun higü hi pe me tesha shü titse kethyü a-kenyü la. Jo kentsun tsügü tsüle hagun nyu kebin Khrista gü, nsidyü zankechwi kethyü gü.

²⁸Tsügenyu a hile Khrista rüla pe temi aphu ka zo hünyo, lo ahile temi lihigüe no Khrista nyu peshülo-o khipe Sunggigü tsülo titseo thakesha aphu sen-o meno petsü lolo tse me senthyü hü nle.

²⁹Tsühontselo titseo anyun nyu kebin Khrista le khikeshü kekvu gü sen a hokeli lo ayhen thyü hünyo.