Read Southern Rengma Naga KOLOSINYU 2 Bible Online

KOLOSINYU 2 - Southern Rengma Naga bible

KOLOSINYU 2

¹Ale hagun, lo Laodikia nyu, lo amhun hyukemvu kechanyu dan aphu genyu a yhenthyü bin kehü hagun no sha nyü.

²Tson-o anyugun no keso nyu kengü nme thyü kelo hontse anyugun nyun peche, lo kenya kechon le kebin tsü hyu tsentsülo nrün genyu. Tsonlo yatselo anyugun le Khrista nyu kebin Sunggigü le kebu kenjü gü shalo ti.

³Khrista genyu tha kesha lo kekokepe aphu kebu pe bin njü nyo.

⁴Ale jo hipe hagun ka kezo le temi nme no ketsin kemvu zope hagun zen kenyio hagun sala nyü kemvu genyu le.

⁵Kechamvule ale thyü min nyu hagun zen bin mvu ai kapu nyu hagun zen hü nyo lo hagun le Khrista ketenyen nyu nnumvu kebin hyu-o a sherhün bin nyo.

⁶Hagun Npugü Khrista Jisu lope hagun hon thyülo kela hontse, a-nyu yhunlo.

⁷Hagun mentsen ntsun yügü a-ge binlo, a-ge yhunlo, tson-o hagun senthyü keshü hontse ketenyen nyu nkolo, lo Sunggigü keshwen no hagun kesü thyü pvülo.

⁸Temi nme no temi thakesha lo temi tedo pe hagun kevü sentin la mvu nrün genyu petsü lonye, tha tsüdan tsüle temi jvü so, tsüdan tsü le Khrista jvü mvule, kazü hinyu ntsenyu senkethyü jvü keri dan le.

⁹Kechamvule Khrista ge Sunggigü keyhun jvü aphu sen-o yhun kelo genyu.

¹⁰Lo me sogon kebin lo kekvu sen kebin aphu pe gü, kerhün kesü kela kethyü gü ki gunryü laso.

¹¹A-genyu hagun ko girü kela genyu kemu thyü min gü yhünlao ben no thyü kemvu gikerü kecha nme hagun ge thyülo laso.

¹²Baptaiz kethyü tsüle a-sin-o sun laso, lo kesinyu dan nyu a-thyü nrhün kelo gü, Sunggigü kekvu tsü hagun ko tenyen kelo genyu a-sin-o thyü nrhünlo laso.

¹³Lo hagun le kemu nyu si bin ai Sunggigü le n gun kemu aphu jü shü lao Khrista sin-o n gun thyü n rhünlo laso.

¹⁴A-le n gun khin pvü bin kehü tejvü dan tsü aphu kati laso, krus ge hüo tsü aphu thyü pe ndi laso.

¹⁵Krus tsügen Khrista le kazü tsü gü nyu keda dan lo kekvu dan nye kvulo-o me mhundyü nyu anyugun nye kvulo kela pe me hishü.

¹⁶Tsügenyu temi nme no ketyüketsü, nmvue nga, nmvue shekerhünjon, nmvue Sabbath jon zope nmu nya chi.

¹⁷Tsüdan tsü aphu gunryü titse kebin gü shye dan le, ketsin gü le Khrista.

¹⁸Nnpvü nrüchün ketsenyo pe temi peha tsemin ki tha hyule tseo a-npvü a-le me nye gwa kvule tse, lo tsenyo-o tsangge jolonyu-e rüshvu kehünyu no n nmula nya.

¹⁹Min gü aphu akekere dan genyu kerhün ron le gungü a-pe tsügü zen-o kehüsü pvüo min kenyelo kehü gü tsüle Sunggigü ki ryü kehü, anyugun le pe tsügü ge sen nko pvü bin mvu.

²⁰Hagun le Khrista zen-o si laso tson-o kazü higü kapu dan ben nyu chwi laso, tsonlo nyuthyüo tejvü gü then-o kazü higü nyu nyu hontse yhun hü nla?

²¹“Kesü tsenyü,” “Botsenyü,” tse hü nla?

²²Gwüngwa nme we sen hü, ai tsü aphu lihi kemvu laso.

²³Tha tsüdan tsü aphu shwi pe thakesha Sunggigü kerüshvu, nthyü ketsenyo, nthyü min nthyü nnyü kethyü hontse; ai tha tsüdan tsüle nthyü min le nnyü kehüdan kekheni kelo kon ndi.