Read Southern Rengma Naga KOLOSINYU 3 Bible Online

KOLOSINYU 3 - Southern Rengma Naga bible

KOLOSINYU 3

¹Hagun le Khrista sin-o pen solo laya tselo, Sunggigü njüzin bin kela Khrista le kebin teso ge hon dan fülo.

²Hagun nyun pe kazü nyu hon dan mvu le tesoge kebin hon dan rüchün lo.

³Kechamvule hagun le silao hagun kerhün ron pe Khrista kesin-o Sunggigü ben nyu kebu pe bin laso.

⁴Ngun kerhünron bin gü Khrista le me yhühyu thyü keryü nyü, hagun ko a-zen zankechwi thyüo meno hagun hyulo ti.

⁵Tsügenyu hagun kazünyu nthyü min le nnyü kehü: Keyüla, nshün kemvu, serikemvu thyü kenyü, lo thaketepen tsü pe teromen kerüshvu hidan hi boshvula lo.

⁶Tha hidan hi genyu Sunggigü nyunkekhü le ryü zhü nyo.

⁷Hagun ko gwüngwa nme tsünyu bin hü, hagun le tsünyu yhun kehüka.

⁸Ai ntsoka we nyun kenta, nyun kekhü, n jvü gwakemvu, metsin kethyü, nmün nyu kemokenu jokezo hidan hi aphu khela lo.

⁹Khinyunyu sa nya, kechamvule hagun le temi whengü lo a-tho aphu khekela si genyu.

¹⁰Tsüntimvule hagun le temi keshün gü khiben lo laso, tsügü thyü kenshün nipe thakesha ketsin nyu a-nyhun keshü gü hontselo hünyo.

¹¹Tsühontse Griknyu lo Judanyu, gikerünyu lo girükemvunyu, Skithianyu, do, do kemvu, tson bin ai Khrista le tsüdan aphu hon, lo a-le tsü aphu dan nyu hü kü.

¹²Tsügenyu hagun Sunggigü le kejülo kela hontse nshün lo a-sonyu thyülo kela genyu, me shwikenjün ketekho kemvu, nyun ketsenyo, bwen kethyü lo nyun kethon,

¹³khinyunyu ge a-keshathyü tsekehü, khinyu nyu ge kenyo ai jü pe ketsülo, Npugü le hagun kemu jü pe hagun ketsü hontse hagun ko me kemu jü pe tsü mvulo shvu.

¹⁴Lo tsü aphu nyeki tha lihi-e phin kerhün pe nme thyülo kehü gü keso gü khi benlo.

¹⁵Khrista nyun kebwen no hagun nyun ntsenlo, kechamvule hagun no tsü sen-o min nme thyülo nrün genyu hagun kokelo le.

¹⁶Khrista jo no hagun nyun nyu bin kegwa thyülo, ketsin lü, kenshün lü lo Kapu lüthyüo hagun khinyunyu kesenthyü lo thukeyhun bin lo; lo hagun nyun ki Sunggigü shwen zin binlo.

¹⁷Tsüntimvule hagun jo nyue, hagun thonyue, thalihi kethyü aphu ka Npugü zan nyu thyülo, lo a-genyu n Pvü Sunggigü shwenlo.

¹⁸Me nunyu dan, hagun nyepvünyu jo zenlo, kechamvule Npugü nyu kehü nyule tson hüzü kethyü genyu.

¹⁹Menyepvünyu dan, hagun nunyu solo, anyugun nshwen nya.

²⁰N tsenyu dan, thalihi ka-e hagun pepvünyu jo zenlo chi; kechamvule tsühontse kethyü tsüle Npugü le a-kenyü kehü genyu.

²¹Mepepvünyu dan, hagun nyenyu nyun gwün kekhün nya; anyugun shese lalo keshvu genyu.

²²Megonyu dan, thalihi ka-e kazü hinyu hagun npu nyu jo zenlo; me yhühyu ka me kenyü thyü titse kethyü genyu mvu ai hagun nyun njüo Npugü kenshvu nyu thyülo.

²³Hagun no tha lihi thyülo tse-e temi lothyü mvule Npugü lothyü kebin hontseo thyülo.

²⁴Hagun le Npugü kanyu kenya hagun chün hyulo ti tsekethyü tsü shalo. Hagun le Npugü Khrista lothyübin nyo.

²⁵Kechamvule thyüzü kemvu thyü kehünyu le a-le thyüzü kemvu chün hyu loti; a-le temi nme so kecha thyü hümvu.