Read Southern Rengma Naga KOLOSINYU 4 Bible Online

KOLOSINYU 4 - Southern Rengma Naga bible

KOLOSINYU 4

¹Npu nyu dan, hagun ko tsangge hagun Npu nme le bin nyo tsekethyü rüchün-o hagun gonyu ge a-kezü gü lo kenjü gü thyülo.

²Kehi thyü zin binlo, khwen lo lüthyüo Sunggigü shwen binlo.

³Lo ale a-genyu dothyü kebin Khrista jo kentsun gü zope me hishülo nrün genyu Sunggigü no kakhin shye pe ayi tsülo tse ayi genyu ko hi binlo.

⁴Tson-o ano zokezü gü zo tsentsü shülo nrün genyu.

⁵Tegwenki nyu zen kengü kethyü ka ndo gwa salo; gwünkho kegwa hyu kelo ka tsünyu senthyü kegwa thyülo.

⁶Hagun jokezo no tsi pe yün kethyü hontse meno nyünyü ho kethyü jo zolo, tson-o hagun lihigü joe keni nishü kezü keni keshü jvü shalo.

⁷Tukika le arüla aphu pe hagun ka zoshü ti, a-le keso asikezen nyu nme, a-le ketsin thyüo kengüo lothyü kehünyu nme le.

⁸Hagun no ayi rüla shalo titse lo a-no hagun thukeyhun shü nrün rüchün-o ale a-nipe hagun ka shü lenye.

⁹Hagun dan nyu temi nme, joketsin zo kehü keso asikezen gü Onesimus le au ryü zhü nyo. Au le hagun ka hinyu tha thyü kebin aphu zoshü ti.

¹⁰Ayi kengüo lothyü kebin gü, Aristarka le hagun kelu shü le nye, lo Barnaba sikezen gü Mark ko hagun kelushü le nye. (A-rüla hagun ka zokeshü tsü hagun le hyulo laso; a-le hagun ki ryülo zenlo nye).

¹¹Lo Jisu Justa le tse ko kehü gü ko hagun kelu shü le. Hidan hile gikerünyu dan nyu chwikeryü dan le, anyugun le azen kengüo Sunggigü keda genyu thathyü hü, tson-o anyugun le keche sa ryü le.

¹²Hagun dan nyu Epafra tsekethyü, Jisu Khrista gonyu nme le hagun kelu shü le. A-le hagun no Sunggigü kendo sha n tsenlo njüo nnumvu lo peshülo titse hagun genyu a-yhenthyü kehi thyü zin bin hünyo.

¹³Lo a-le hagun lo Laodikianyu, lo Hirapolinyu genyu a-kekvu thyü kehü ale shabin nyo.

¹⁴Ngun keso Luk dawa keshagü lo Dema ko tse hagun kelu shü le.

¹⁵Laodikianyu npvü nyu ju lo Nimfa lo a-kanyu kehun kehü ju ka ale anyugun kelu shü le tse zoshü nye.

¹⁶Hagun le lesü higü hi swülo lo khipe Laodikianyu kehun kono swü nye, lo hagun genyu Laodikianyu dan ka lesü nme le ryü ti laryü tsü swü nye.

¹⁷Lo Arkipa ka, “Npugü ka lotho hyu kelo gü tsü thyü pen shülo,” tse zoshü nye.

¹⁸Ale Paul a npvü aben lope hagun kelu keshüjo hi thu shü le. Tegiron pe aphin sen kehü rüchünlo; shwikenjün gü no hagun zen bin kelo gü thyülo.