Read Southern Rengma Naga 1 THESSALONIANYU 2 Bible Online

1 THESSALONIANYU 2 - Southern Rengma Naga bible

1 THESSALONIANYU 2

¹Lo apvünyu dan, ale hagun ka gunkeryü le thaja thyüla mvu tsekethyü hagun-e shabin nyo.

²Agun le himhundyü ki Filipi nyu kenjün thyü lo kejopvü sa tsekethyü hagun le shabin nyo, ai agun le mele agun ntsun sa kebin nyu agun le Sunggigü nyu pecheo Sunggigü jolokegwa gü zope hagun hishü.

³Kechamvule ale hagun ka zo kehü le njükemvu, nmvue nshün kemvu, nmvue me kesa nyu thyü bin kemvu genyu.

⁴Ai Sunggigü le arüchün ngwao jolokegwa gü pe atenyen kela hontse ako tsühontse pe me ka zo hünyo, temi kenyü thyü titse nmvue nnyun njü bin le mvuyo, tsekethyü shwi kehü Sunggigü kenyü thyü nyü hünyo.

⁵Kechamvule ale thame ka-e me rühvu rüno kethyu rothyüo mesa nmvue mehon tepen rüsi kehü, hagun le sha kemvu hontse Sunggigü le a jün zo bin nyo.

⁶Nmvue ale Khrista kipon apostel thyüo akekvu bin tsekethyü zolo gwa bin-e ale hagun ka-e lo kechanyu ka-e temi denzin teshwen pvü hü mvu.

⁷Tson-e ale hagun dan nyu kebin ka mejvü nyu le anyenyu nucha kegwa thyü kehü hontse bwenye tseo yhun le.

⁸Tson-o hagun so njün ho kethyü genyu hagun shwi pe akenyü ho tseo Sunggigü jolokegwa gü ntimvule akeyhun-e khipe hagun zen kenjünlo nyü ho hüle.

⁹Kechamvule a pvünyu ju, ale Sunggigü jolokegwa zope hagun zen kehü ka, agenyu meno kenjün thyü la mvu nrün genyu ale atho thyü lo kenjün thyü kethyü hagun-e hagun si rüchün hü ti.

¹⁰Lo ketenyen nyu dan, ale hagun ge nshün lo tsenton lo meno anmulo keho thyü yole hagun le shabin nyo.

¹¹Tsüntimvule a-pvü le a-nyenyu ge kethyü hontse ale hagun nme me tsekethyü thukeyhun lo thyü kepeche lo tsenro ryü.

¹²Tson-o hagun kope a-npvü a-keda lo a-zankechwi nyu shü kebin gü Sunggigü hon thyü kekü keyhun yhunlo nrün genyu.

¹³Lo hagun le aka nyu Sunggigü jo gü khikelo ka hagun-e tsüle temi jo hontse mvule, tsüle Sunggigü jo ketsin letseo zenlo laso; tsügenyu ale Sunggigü shwen bin hünyo, lo Sunggigü jo tsügü tsü le hagun ketenyen nyu dan nyu tha thyü bin nyo.

¹⁴Lo npvünyu ju, hagun-e Judia nyu Khrista Jisu genyu Sunggigü kehun dan sikethen thyülo la le; kechamvule Judanyu dan ben nyu kenjün thyü kelo hontse hagun npvü hagun rünyi ben nyu kenjün thyülo laso.

¹⁵Tsüdan le Npugü Jisu-e lo sidyükeshanyu dan-e dushvula, lo anyugun hüshwila lo tsüntimvule Sunggigü kenyü kemvu thyü lo temi aphu zen kentsun tin laso.

¹⁶Tsüdan le Juda kemvunyu dan no kenilolalo kenshvu genyu ano tsüdan nthon nyalo tseo akhin hünyo; tson-o anyugun kemu dan tsüle sü gü ti laso. Ai kekhin ki Sunggigü nyun kekhü le anyugun ge ryü bin laso.

¹⁷Ai apvünyu ju, ale jon keshanyu jaka, anyun kipon mvule amin gü le hagun zen-o kenrhikela genyu hagun njün ho tse hagun zen-o kemhun hyu shünyüo tenge tse so.

¹⁸Hagun ki gunryü nyü kethyü genyu ale Paul, hagun ki ryü nini tsenyü bin-e satan le aketekhi la le.

¹⁹Kechamvule ngun Npugü Jisu le ryü nrün ka a-mhundyü nyu a sidyü lo a shekerhün lo anyun kenyü perün le nyu ola? Tsüle hagun mvu ole?

²⁰Tsüntimvule azan kechwi kethyü lo a shekerhün tsü le hagun le.