Read Southern Rengma Naga 1 THESSALONIANYU 3 Bible Online

1 THESSALONIANYU 3 - Southern Rengma Naga bible

1 THESSALONIANYU 3

¹Kekhin ki, a gun le tsü n yhen sin bin loho la. Tsügenyu agun le Athen nyu agun npvü bin ti tse rhi lola.

²Lo nsikezen gü, Khrista jolokegwa nyu Sunggigü go gü Timothi nipe no hagun ketenyen nyu hagun thyü nkvu shü lotse lo hagun thukeyhun shü lotse shüle.

³Tsüle kenjün kethyü hidan hi genyu temi nme-e no ketenyen nyu nnula mvu nrün genyu. Hidan hi teno kethyü le ngun khvü tse kethyü hagun le hagun npvü shabin nyo.

⁴Kechamvule ale hagun zen kebin ka-e ngun le kenjün thyü titse kethyü nchwenyu hagun ka zoshü so; lo tsühontse thyü kethyü hagun-e shabin ti.

⁵Lo higenyu, ale nyhen sin loho kela ka ale hagun ketenyen shalo nyüo me nipe hagun ki shü hünyo, kechamvule kesemen gü no tha peha ka hagun semen la-o a tha kethyü tsü lope kenrun thyü kela kenshvu genyu.

⁶Ai ntsoka we Timothi le hagun ki rani-o aki ryü laso, lo a-le hagun ketenyen lo keso, lo hagun le aphin rüchün zin-o ale hagun hyushü nyü kebin hontse hagun-e a hyu shü nyü bin tse kethyü jo kegwa tsüdan senryüo a tesha shü so.

⁷Tsügenyu apvünyu ju, hagun ketenyen genyu ale kenjün kethyü nyu lo a shekese nyu anyun bwenlo laso.

⁸Lo hagun le Npugü nyu so nko kelo we ale rhünlo laso.

⁹Tson-o hagun genyu ale Sunggigü mhundyü nyu akenyü kelo aphu genyu ale hagun genyu dihontse Sunggigü shwen ti sela!

¹⁰Ale hagun zen-o kemhun hyu shü lo hagun ketenyen timvu kebin no tilo kenyü genyu tsangben tsangzün ayhen thyüo hibin hünyo.

¹¹Lo n gun Sunggigü n gun Pvügü lo n gun Npugü Jisu no ano hagun ki ryülo kegwa tson tsinshü nda no.

¹²Lo Npugü no hagun nyun thyü pe ale hagun so kehü hontse hagun no khinyunyu-e lo temi aphu so kenye kelo gü thyülo.

¹³Tson-o a-no hagun nyun thyü nkvu pe Sunggigü npvü mhundyü nyu hagun no nshün pe nmulo keho thyü bin-o Npu Jisu le a-temi kenshün nyu dan zen ni tsükeryü nyü tikelo gü thyülo nye.