Read Southern Rengma Naga 1 THESSALONIANYU 5 Bible Online

1 THESSALONIANYU 5 - Southern Rengma Naga bible

1 THESSALONIANYU 5

¹Ai apvünyu ju, tsühontse kethyü le nyu gwünkho ka tiyo thu pe hagun tsü mvue gwa.

²Kechamvule Npugü le keryü le kerühu nyu le khejenyu ryü kehü tsü hontse ti.

³Temi le, “Kenshvu ndi so, lo nyun le keho ndi so,” tse zo keso ka, tsükatsü tenunyu le nnyu titse a-gin thyü whütse ryü kehü hontse kenke le anyugun ge gwen tse ryü ti, lo anyugun le thame thyüo tsü nrhilo ho.

⁴Ai apvünyu ju, hagun le kezün nyu bin-o tsang keben jon tsügü no kerühu nyu hontse hagun ka ryü titse bin mvu.

⁵Kechamvule hagun aphu keben gü nyenyu lo tsangkeben nyenyu kethyü genyu. Ngun we kheje ki nmvue kezün gü nyenyu mvu so.

⁶Tsügenyu ngun we kechanyu hontse zhü bin mvule chon binlo, lo n nyun-e a-kho thyü binlo.

⁷Kechamvule zhü bin kehü nyu le kheje ki zhü bin hünyo, lo zu tsü nzeü bin kehü nyu le kheje ki nzeü bin hünyo.

⁸Ai ngun we keben gü nyenyu genyu ketenyen lo keso shüntyü gü khilu lo lo nkenilo nrün sidyü nrin kebin gü pe n perün thyülo, lo nnyun a-kho thyü binlo.

⁹Kechamvule Sunggigü le nno nyunkekhü kipon gun titse mvule n Npugü Jisu Khrista kipon kenikelo hyulo titse ndo kebin genyu.

¹⁰Nle chon bin metse lo zhü tinla metse nno a-zen-o rhünlo nrün genyu a-le ngenyu sila.

¹¹Tsügenyu hagun le thyü kebin hontse khinyu khinyu nyun thyü kepeche lo khinyunyu thyü ngwa binlo.

¹²Lo a pvünyu ju, ale hagun no hagun dan nyu jolokegwa lotho thyü kehünyu lo Npugü kipon hagun so ge bin-o hagun tsenro kehünyu rühvulo lotse hagun ka zo tenge shü bin nyo.

¹³Anyugun lotho genyu anyugun rüchün tetso sa lonye. Lo hagun-e hagun dan nyu kengü gwa binlo.

¹⁴Lo a pvünyu ju, ale hagun no serikemvunyu tsenro lo, lo a-thin gwakemvunyu thyü kepeche binlo tse lo kvu kemvunyu keche binlo tse lo anyugun aphu ge hagun nyun thonlo lotse hagun thukeyhun shü bin nyo.

¹⁵Temi nme-e gwakemvu thyü pe gwakemvu pu kethun ni nya, tsonkethyü gü mvule khinyunyu ge lo temi aphu ge-e tha kegwa thyü shü titse fü zinlo.

¹⁶Sherhün zinlo.

¹⁷Kehi thyü tüla mvu binlo.

¹⁸Tha lihi ka-e Sunggigü cheno zin binlo; kechamvule Khrista Jisu genyu hagun no tsühontse kethyü le Sunggigü kendo kethyü genyu.

¹⁹Kapugü bokemhüla nya.

²⁰Sidyü jo kezo nkhin nya.

²¹Tha lihi-e gwa le shvu yo shwi petsü shü, tson-o kegwa gü tsü tezen tsekho bin lo.

²²Gwakemvu lihi-e nrhilo.

²³Lo bwenye tse kethyü Sunggigü no hagun thyü kenshün pen shü; tson-o hagun kapu lo hagun kerhünronzin lo hagun min-e ntsen kegwa thyü bin-o Npugü Jisu Khrista le keryü nyü nmulo keho nyu thyülo nda no!

²⁴Lo hagun ko kehü gü le tenyelo kü; lo a-le tsühontse thyü loti.

²⁵Apvünyu ju, agun genyu hi binlo.

²⁶Kenshün nyu kenbo kethyü jvü ka npvünyu ju aphu kelu shü le nye.

²⁷Ale hagun no lesü higü swü pe npvünyu ju aphu hikü shü lotseo Npugü zan sen-o hagun ka zo tenge shü le nye.

²⁸Npugü Jisu Khrista shwikenjün gü no hagun zen bin kelo gü thyülo.