Read Southern Rengma Naga JOSHUA 1 Bible Online

JOSHUA 1 - Southern Rengma Naga bible

JOSHUA 1

¹Npugü go gü Mosa kesi siki, Npugü le Nun nyu gü Mosa keche gü Joshua nthonshü.

²A-le zoshü, “Ago gü Mosa le si laso. Tsügenyu ntsoka ndalo njüo nle lo Israel nyu aphu Jordan pfüthü gü ale pe anyugun tsü kebin ka zü gü nyu yülo.

³Ale Mosa ka zoshükela hontse hagun le kedü kelo kazü aphu pe nle lo Israel nyu tsü laso.

⁴Hagun terhi le tesinzin kazü kesi ka nsin gü tesozin Lebanon kazüthun keti; Npho zin Eufrates züri kedagü ka gü Hitnyu kazü pfüthü nkhün zin Mediterranean zida ti.

⁵Joshua, nle rhün kebin then temi nme no n nyekvu loho. Ale Mosa zen kehü hontse nzen hüti. Ale a-zintse nzen hüti; ale nkhela loho.

⁶Nko, lo peche binlo, nle sharhi gü thyüo temi hidan no ale anyugun pvübon nyu ka zoshwishü kenjü kazü gü nkhenlo nrün genyu.

⁷Nko lo peche binlo; Ago gü Mosa le pe nketsü tejvü apentha then titse rüchün tonlo. Tsü nme-e khela nya, tson loya tselo lika hika güe nle gwa loti.

⁸Hagun le rüshvu kethyü ka a-zintse tejvü lesü gü swülo. Nhenyu lo kheje ki-e tsü rüchünlo, lo tsünyu thu kebin aphu zen titse rüchün tonlo. Tsonyatselo hagun le gwakenye chwi loti.

⁹Ale nno nko lo peche binlo tse johokeshü tsü rüchün lo! Nshvu nmvue shesela nya, Ale Npugü n Sunggigü, nle lika hika güe nzen hüti.”

¹⁰Tsüselo Joshua le ahza pe sharhi ju tsüshü

¹¹kensenbin rhi gü temi dan ka, “Ketyüketsü peha ndolo, Jon shen jaka hagun le Jordan züri pfüthü gü Npugü hagun Sunggigü le pe hagun ketsü kazü gü nkhenlo nrün genyu.”

¹²Joshua le Reuben, Gad lo Manasseh tsipwen ponha dan ka zoshü,

¹³“Npugü go gü Mosa le hagun ka, Npugü hagun Sunggigü le Jordan npho zin kazü higü pe hagun no hagun hon thyüti tse zokeshü tsü rüchün lo.

¹⁴Hagun nunyu, hagun nyenyu, lo hagun senru le hika binti, ai rihüdan le terikanyü nda pfüo hagun tsasikezen dan che nrün genyu rio züri gü pfüthü chwi ti

¹⁵anyugun e Jordan nkhün zin Npugü hagun Sunggigü le pe anyu ketsü gü nkhenlo kemvuthen. A-le Israel tsipwen aphu no rüyü kelo khishü lalo, hagun le rani ryüo Npugü go gü Mosa le pe hagun tsü kela Jordan npho zin hagun kazü gü nyu bin loti.”

¹⁶Anyugun le Joshua jo kenishü, “Nle zokeshü aphu agun le thyüti lo lika hikae nle agun nishü lo güti.

¹⁷Agun le azintse Mosa jozen kehü hontse njo zen ti, lo Npugü n Sunggigü no a-le Mosa zen kehü hontse nzen hülo!

¹⁸Ligü higü ntsun nren nmvue njozen kemvu gü no si lati. Nko lo peche binlo!”