Read Southern Rengma Naga JOSHUA 10 Bible Online

JOSHUA 10 - Southern Rengma Naga bible

JOSHUA 10

¹Jerusalem nyu raja gü Adonizedek le Joshua le Jeriko lo tsünyu raja gü ge thyü keshü hontse Ai lo lo-o tsü nke shüla lo a-raja gü dushvu kela rüla shalo. Tsüntimvule a-le Gibeon nyu le Israel nyu zen gwatho lao anyu dan nyu yhun kebin rülae shalo.

²Jerusalem nyu le hi shape nshvu sala, kechamvule Gibeon le a-raja kebin nyida kecha hontse gon; tsü le Ai nye gonkvu, lo a-temi dan-e teri gwasa.

³Tsü genyu Adonizedek le jolo nipe Hebron raja Hoham, Jarmuth raja Piram, Lakish raja Japhia lo Eglon raja Debir tse tsüo:

⁴“Ryü a cheo Gibeon whe lo, anyugun le Joshua lo Israel nyu zen gwatho kela genyu,” tsonshü.

⁵Tson-o Jerusalem, Hebron, Jarmuth, Lakish lo Eglon tse Amornyu raja pvün le kerhün-o Gibeon hun pfüo whe.

⁶Gibeon nyu le jolo nipe Kensenbin Gilgal ka Joshua tsüo: “Agun khela nyalo, kedagü, whütse ryü agun keche, lo kenishü lo! Rincho ki kebin Amornyu raja aphu kerhün-o ryü agun whe bin nle!”

⁷Tsügenyu Joshua lo rihü kegwatsin dan sin-o rihü apentha Gilgal nyu tsonchü shü.

⁸Npugü le Joshua ka zoshü, “Anyu nshvu nya. Ale kvukelo pe ntsü laso. Anyugun nme-e nmhundyü so bin loho.”

⁹Tson-o Joshua lo a-rihü dan le Gilgal nyu khensin tsonchü ryü Gibeon ka Amor nyu le shamvu kebin ka anyu whe.

¹⁰Npugü le Amornyu thyü pe Israel rihü dan mhundyü nyu kvulo hola. Israel nyu le Gibeon nyu anyugun dushvu, lo anyugun hü tsü gü Beth Horon kazüthun kenchon lo tesinzin anyugun whe-o Azekah lo Makkedah keti gü.

¹¹Amornyu le Israel rihü dan mhundyü tin-o kazü kenchon ki nshe kezhü Npugü le tegwün kedada no anyugun jon gü Azekah ti, Israel nyu le dushvu kethyü nyeki tegwün le chonkvu jon shvula.

¹²Npugü le Israel nyu no Amornyu nyekvu kelo jon nyü Joshua le Npugü ka zoshü. Israel nyu mhundyü nyu a-le zo-o, “Yhüko, nnu nyao Gibeon so sun tinla. Shye, Aijalon ketejon so sun tinla.”

¹³Senye gü le anyu shwikerüchün nyu so kvulo la kemvuthen yhüko le nnu mvuo sun tinla lo shye le ketu mvula. Hi Jashar lesü nyu thu njü. Yhüko le tsanglu ka sun tinlao khenyü me shü che mvula.

¹⁴Tsü mhundyü lo tsü siki-e Npugü le temi jozen keshü tsünyü hontse kethyü jon ndi. Npugü le Israel nyu kipon bin-o kega!

¹⁵Tsüsiki Joshua le Israel rihü dan zen-o kensenbin Gilgal ki rani ryüla.

¹⁶Amor raja pvün ju le tin gü Makkedah tsokü nyu kebu tinla.

¹⁷Tsü ka temi peha le anyugun hyushüo anyu le dika kebu bin yo Joshua ka zoshü.

¹⁸Tsontsin a-le zoshü, “Tso keda peha pe tsokü gü khin lao, temi peha no tsüka bin-o khwelo,

¹⁹ai hagun we tsüka bin nya. Shwikerüchün nyu nri tseo sizin gü anyu whelo; anyugun no rani-o nyida ki gun nya! Npugü hagun Sunggigü le anyugun so kvukelo pe hagun tsü laso.”

²⁰Joshua lo Israel nyu dan le anyugun dushvu la, ai peha le nyida gü chwida hensin kebu tin lao dushvu lomvu la.

²¹Tson-o Joshua temi aphu rani-o anyu kensenbin Makkedah ka ryüla. Kazü tsügü nyu temi nme Israel nyu kentsun jo zo nshvula.

²²Tsüselo Joshua le zoshü, “Tsokü gü khinsheo raja pvün dan tsü zen aki ryülo.”

²³Tson-o tsokü gü khinsheo Jerusalem, Hebron, Jarmuth, Lakish lo Eglon tse ka raja ju zen chwiryü,

²⁴Joshua kishü, tsontsin Joshua le Israel nyu aphu ko shüo, a-zen-o chwikethyü kedanyu ju no anyugun pha pe raja hidan gunda kedü lo tse ahza hoshü. Lo anyu gun le tsonshü.

²⁵Joshua le a-hensin kedanyu ju ka zoshü, “Nshvu nmvue shese nya. Peche lo nko bin lo, Npugü le hagun shwikerüchün nyu aphu ge hihontse shü nrün genyu.”

²⁶Tson-o Joshua le raja ju dushvu lao pe senbin pvün ge hü la, anyugun min no tson bin-o ngwün gü ti.

²⁷Yhüko chela ntsin Joshua le anyugun min khisheo shwe pe anyugun le kebu kehü tsokü günyu shü lalo tse ahza hoshü. Tson-o tso kedada pe tsokü gü nkelao, tsüdan le nthu keti tsünyu bin nyo.

²⁸Tsünyü Joshua le Makkedah hüo lo lo njüo tsünyu raja gü dushvula. A-le nyida tsünyu temi nme-e no tin mvutse dushvu bula. A-le Jeriko raja gü ge thyü keshü hontse Makkedah raja ge thyüshü.

²⁹Tsüsika Joshua le Makkedanyu a-rihü dan zen gü Libnah hü.

³⁰Npugü le nyida higü lo a-raja so kvu kelo ko pe Israel nyu tsüla. Anyu le tsünyu temi nme nrho shü mutse aphu dushvula. Anyugun le Jeriko raja gü ge nyu hontse thyü yo tsü hontse raja gü ge thyüshü.

³¹Tsüsika, Joshua le Libnah ka a-rihü dan zen gü Lakish hunpfü lo njüo tsü whe.

³²Teri kethyü jon hvu günyü tsüko Npugü le Lakish so kvu kelo pe Israel nyu tsüla. Tson-o anyugun le Libnah ka hontse nyida tsü gü nyu ko temi nme nrhoshü mutse aphu dushvula.

³³Gezer nyu raja gü Horam le Lakish nyu keche ryü, ai Joshua le raja tsügü lo a-rihü dan so kvu lo-o anyugun nme no rhün mvula.

³⁴Tsüsika, Joshua le Lakish ka a-rihü dan zen gü Eglon hun pfü lo njüo whe.

³⁵Anyugun le tsünyü tsü lolo-o Lakish nyu thyü keshü hontse temi aphu dushvula.

³⁶Tson-o Joshua le Eglon ka a-rihü dan zen rincho ki kü gü Hebron wheo

³⁷lolo la. Nyida tsünyu raja gü, a-temi aphu lo tsükhoho rünyi nyu temi dushvu küla. Joshua le Eglon nyu thyü keshü hontse nyida tsü gü nmu lao nkeshü la. Tsünyu kebin temi nme no rhün mvu.

³⁸Tsüselo Joshua le a-rihü dan zen Debir ki rani ryüo tsü whe.

³⁹Nyida tsü gü tsünyu raja lo tsü tekho rünyi aphu lolo la. Anyugun le tsünyu temi aphu dushvula. Joshua le Hebron lo Libnah lo tsünyu raja hvu ge thyü keshü hontse Debir lo tsünyu raja ge thyüshü.

⁴⁰Joshua le kazü gü apentha lolo la. A-le rincho ki raja ju, npho kipon nyu, lo rincho phaki nkhün zin pe tesin zin kazü kesin sin-o lokü lola. A-le temi nme nrhoshü mvutse, aphu dushvula. Npugü, Israel nyu Sunggigü le johokeshü hontse.

⁴¹Joshua le teri thyü sen-o tesinzin Kadesh Barnea ka gü züda kho Gaza ti, lo Goshen kazü aphu, lo tesozin Gibeon keti lolo la.

⁴²Joshua le gwen gwa teri thyü kechwi ka raja hidan lo anyugun kazü aphu lolo la, Npugü, Israel nyu Sunggigü le Israel nyu sunka teri thyü kebin genyu.

⁴³Tsüsiki Joshua lo a-rihü dan le rani anyu kensenbin Gilgal ki ryüla.