Read Southern Rengma Naga JOSHUA 11 Bible Online

JOSHUA 11 - Southern Rengma Naga bible

JOSHUA 11

¹Hazor nyu raja gü Jabin le Israel nyu kekvu rüla shalo ntsin a-le me nipe Madon raja gü Jobab, Shimron lo Achshaph tse ka raja hvu,

²lo tesozin rincho ki raja ju, Galil zida tesinzin Jordan ketejon, rinchopha ki, lo züda kerhon Dor khokeni ki shü.

³A-le jolo nipe Jordan lizin hizin kebin Kanan nyu, Amornyu, Hitnyu, Periznyu lo rincho ki kebin Jebus nyu, lo Hermon kazüthun pha ki yhun kehü Mizpah kazü nyu kebin dan ko tsü shü.

⁴Anyugun le anyu shüpahü aphu kesin pe rihü le chon pe züda seka hachon hontse zenryü. Anyugun le keru lo terigari ko kechon le bin.

⁵Raja hidan le aphu kerhün lo-o Israel nyu zen teri thyü titse ryü Merom züri ka kensenbin thyülo.

⁶Npugü le Joshua ka zoshü, “Anyugun nshvu nya. Sendu ki higwenkho ka Israel nyu genyu ale anyu aphu dushvu lati. Hagun no anyu kerupha duse lao terigari dan ro lati.”

⁷Tson-o Joshua lo a-temi aphu gü anyugun le shamvu kebin ka Merom züri nyu a-nyu whe.

⁸Npugü le anyugun so kvukelo pe Israel nyu tsüla, Israel nyu le anyu hü gü tesozin Misrephoth Maim lo Sidon ti, lo npho zin Mizpah ketejon kishü. Shwikerüchün nyu nme ndila kemvuthen teri thyü.

⁹Npugü le zokeshü hontse Joshua le anyu ge thyüshü: a-le anyugun keru pha duse la lo terigari dan rola.

¹⁰Tson-o Joshua le rani ryü Hazor lolo-o tsünyu raja gü dushvula. (Tsügwenkho ka Hazor le rajaphün tsüdan aphu dan nyu kekvu tsin.)

¹¹Anyugun le tsünyu temi aphu dushvu la; temi nme-e khe shümvu, lo nyida gü rola.

¹²Joshua le Npugü go gü Mosa le johokeshü hontse nyida tsü aphu lolo-o raja ju, lo temi aphu dushvula.

¹³Tson-e Israel nyu le kazüthun ki nyida we nme romvu, Joshua le Hazor ro kela tsü nti.

¹⁴Israel nyu le nyida hidan ka kanyü minketsen lo senru dan pe anyu hon thyülo. Ai temi we nme-e no rhün mvu tse aphu dushvula.

¹⁵Npugü le joho pe a-go gü Mosa tsüshü lo Mosa le tsü pe Joshua tsüshüo a-le tsü zen lo. Npugü le Mosa ka johokeshü dan aphu a-le thyülo.

¹⁶Joshua le kazü tsü aphu-- rincho, rinchopha, tesozin lo tesinzin, Goshen kazü aphu, lo tsü khüzin kazü kesin lo Jordan ketejon-e tse lolo la.

¹⁷Kazü gü le tesinzin Edom khoka Hala kazüthun ka gü tesozin Baalgad keti, lo Hermon kazüthun khüzin Lebanon ketejon ti. Joshua le gwenkho kethon kazü hidan ka raja ju zen teri thyü, ai a-le aphu lolo njüo anyugun dushvu la.

¹⁹Israel nyu zen gwatho kela le Gibeon nyida nti, tsünyu Hivnyu peha le yhun bin. Kecha aphu teri thyüo lokü lo.

²⁰Npugü le anyugun no Israel nyu zen kega titse rhilo-o anyugun nmula njüo nkeshü la titse lo shwi njün mvu tse aphu dushvula nrün thyüshü. Hile Npugü le Mosa ka johokeshü.

²¹Higwenkho ka Joshua le gü Hebron, Debir, Anab lo Juda lo Israel kazü rincho aphu nyu yhun kebin Anakim tse ko kehü thungi dan nkela. Joshua le anyugun lo anyu nyida ju nke shüla.

²²Anakim ju nme-e khe pe Israel nyu kazü nyu shümvu, tson-e Gaza, Gath lo Ashdod ka peha khe njü.

²³Npugü le Mosa ka johokeshü hontse Joshua le kazü gü apentha lolo. Tson-o Joshua le Israel nyu kami nmeme no a-hon thyü lotse kenjün pe anyugun tsüla. Tsüselo temi dan le teri thyümvuo rüyü lo.