Read Southern Rengma Naga JOSHUA 13 Bible Online

JOSHUA 13 - Southern Rengma Naga bible

JOSHUA 13

¹Joshua le then sala. Npugü le a-ka zoshü, “Nle then sa laso, ai lolo nrün kazü kechon le bin zun,

²Filistia lo Geshur kazü aphu,

³lo tesin zin Avvim kazü aphu. (Ijipt nyu terhi ki Shihor züri gerho gü tesozin Ekron terhi keti tsü le kanan nyu kazü le tse hü; Filistian nyu raja le Gaza, Ashdod, Ashkelon, Gath, lo Ekron tse nyu yhun hü.)

⁴Binsin kethyü aphu Kanan nyu kazü, lo Mearah (tsüle Sidon nyu hon) ka gü Amor nyu terhi ki Aphek keti;

⁵Gebalit nyu kazü; Lebanon aphu ka gü npho ti, Hermon kazüthun tesinzin Baalgad gerho gü Hamath kazü kenchon keti.

⁶Hile Lebanon kazüthun lo Misrephoth Maim au jaka yhun kebin Sidon nyu kazü aphu kesin. Israel nyu le kethün shülo ale temi hidan aphu hüshwi lati. Ale nka johokeshü hontse nle kazü gü kenjün pe Israel nyu tsü mvu loshvu.

⁷Tsügenyu ntsoka kazü hi kenjün pe tsipwen tekü lo Manasseh tsipwen ponha dan tsüo no pe anyu hon thyü lo.”

⁸Reuben, Gad lo Manasseh tsipwen ponha tsele Npugü go gü Mosa le kazü pe anyugun tsüo hyulo laso; tsüle Jordan npho zin.

⁹Anyugun kazü le gü Aroer ti (Arnon ketejon teka) kazü ketejon tsü lvu ka nyida gü lo Medeba ka gü Dibon keti a-sun ketejon aphu kesin.

¹⁰Tsüle gü Ammon nyu terhi lo Amor nyu raja gü Sihon le Heshbon nyu keda thyüo sen kethyü nyida ju aphu sin

¹¹Tsü le Gilead, Geshur lo Maakah lojvü, Hermon kazüthun aphu, lo gü Selekah keti Bashan aphu sin.

¹²Tsüle Ashtaroth lo Edrei ka gon kethyü Rephaim nyu kenkhin gü Og rajaphün sin. Mosa le temi hidan so kvu lao anyu hü shwila.

¹³Tson-e Israel nyu le Geshur lo Maakah temi dan hüshwi mvu la; anyugun le nthu keti Israel nyu dan nyu yhun bin.

¹⁴Mosa le Kazü pe Levi tsipwen tsü mvu. Npugü le Mosa ka zokeshü hontse, kershvubin ge rope Npugü Israel Sunggigü rüshvu kethyü ka anyugun le anyu jün hyulo ti.

¹⁵Mosa le kazü peha pe Reuben tsipwen nyu no gwen lotse anyu tsüla.

¹⁶Anyugun kazü le gü Aroer keti (Arnon ketejon teka) ketejon tsü gü lvu ka nyida gü lo Medeba kehun thunsun ketejon aphu sin.

¹⁷Tsüle Heshbon lo thunsun ketejon ge nyida dan: Dibon, Bamoth Baal, Beth Baalmeon,

¹⁸Jahaz, Kedemoth, Mephaath,

¹⁹Kiriathaim, Sibmah, ketejon nyu rincho ge Zerethshahar,

²⁰Bethpeor, Pisgah kazüthun bonhü dan, lo Beth Jeshimoth sin.

²¹Tsüle thunsun ketejon nyida aphu lo Heshbon nyu gon kethyü Amor nyu raja gü Sihon rajaphün apentha sin. Mosa le Sihon lo Midian nyu kegon ju Evi, Rekem, Zur, Hur, lo Reba so kvula. Anyu aphu raja Sihon kazü nyu keda thyü.

²²Israel nyu le dushvu kela dan nyu Beor nyu gü Balaam temvü gü ko bin.

²³Reuben tsipwen kazü terhi nkhün zin le Jordan. Nyida lo rünyi hidan pe Reuben tsipwen ge kami dan no a-hon thyü lo tse tsüla.

²⁴Mosa le kazü peha pe Gad tsipwen ge kami dan ko no a-hon thyü lotse tsüla.

²⁵Anyu kazü le Jazer lo Gilead nyida aphu, Ammon nyu kazü ponha Rabbah npho zin gü Aroer keti sin;

²⁶anyugun kazü le Heshbon ka gü Ramath, Mizpeh lo Betonim ti, Mahanaim ka gü Lodebar nyu terhi ti.

²⁷Jordan ketejon nyu Beth Haram, Bethnimrah, Sukkoth, Zaphon lo Heshbon nyu raja gü Sihon rajaphün asen dan sin. Nkhün zin anyu terhi le Jordan züri ka gü tesozin Galil zi keti.

²⁸Nyida lo rünyi hidan pe Gad tsipwen ge kami dan no anyugun hon thyülo tse tsüla.

²⁹Mosa le kazü peha pe Manasseh tsipwen ponha kami dan no a-hon thyü lo tse tsüla.

³⁰Anyu kazü le gü Mahanaim lo Bashan aphu sin--Bashan raja gü Og rajaphün apentha pe Bashan nyu kebin Jair nyu rünyi hentsero sin.

³¹Tsüle Gilead ponha pe Bashan rajaphün nyu Og nyida Ashtaroth lo Edrei sin. Hi aphu pe Manasseh nyu gü Machir kami dan tsüla.

³²Tsühontse Mosa le Moab nyu kazü ketejon nyu kehü ka Jeriko lo Jordan npho zin kazü gü kenjün shüla.

³³Ai Mosa le kazü nme-e pe Levi tsipwen jün thyümvu. A-le anyugun ka anyu hon le mele tha pe Npugü Israel Sunggigü kershvu ka anyugun jün le bin nle tse zola.