Read Southern Rengma Naga JOSHUA 14 Bible Online

JOSHUA 14 - Southern Rengma Naga bible

JOSHUA 14

¹Israel nyu temi dan le dihontseo Kanan kazü Jordan nkhün zin kazü gü kenjün layo tsü rüla. Püshükeda gü Eleazar, Nun nyugü Joshua lo Israel tsipwen dan nyu kami sharhi ju le tsü kenjün pe süda gü tsüshü.

²Npugü le Mosa ka johokeshü hontse, Jordan nkhün zin kami teküo ponha dan tsü whe shwio kazü kenjün pe anyu tsüla.

³Mosa le Jordan npho zin kazü gü kenjün pe kenyhun-o ponha tsüla so. (Josef tsipwen kenjün pe kenyhun thyüla: Manasseh lo Efraim.) Tson-e, Mosa le Levi nyu jün kazü pe tsümvu. Tsü sunka anyugun le a-nyu yhun nrün nyida lo anyu senru genyu lojvü tse hyulo.

⁵Npugü le Mosa ka johokeshü hontse Israel nyu le kazü kenjün lo.

⁶Khenyüme Juda kaminyu temi peha le Gilgal ka Joshua kiryü. Tson-o Keniz nyu Jephunneh nyugü Kaleb le a-ka, “Kadesh Barnea ka Npugü le Npugü temi gü Mosa ka nle lo agenyu zokeshü nle sha bin nyo.

⁷Ano kazü ri lotse Kadesh Barnea ka Npugü go gü Mosa le a nikeshü tsüle a-keyhun le chen henzi la. Ale jo ketsin sen niryü a-ka zoshü.

⁸Temi azen kegü temi dan le ngun temi thyü pe no nshvula. Ai ale Npugü a Sunggigü jozen tishü.

⁹Tsü genyu, Mosa le ale kedü kelo kazü tsüpe ale lo anyenyu dan hon thyüti tse aka johoshü bin nle.

¹⁰Ai Npugü le Mosa ka tsü zo keshü chen henzi pvün thyülaso. Tsüle Israel nyu le kazü kesi nyu ho kehü ka, lo Npugü le zoshwikeshü hontse a ntsen-o ano yhun ryüo hiti bin nle. A shwishüta! Ale chen hentetse pvün laso,

¹¹ai Mosa le a nikeshü nyü kenko hontse nthue ale nko binzun le. Ale nthue nko-o teri nmvue thakecha lihi-e thyü logwa bin zun.

¹²Tsügenyu tsünyü ale lo a temi jule jolo sen keryü ka Npugü le aka zoshwishü kenjün hontse rincho kazü gü pe atsü lalo. Tsüka Anakim tse kehü thungi temi dan le chwida khwe sao nyida thyü bin nle tse agun le nka zokeshü gü tsü. Npugü le zokeshü hontse Npugü le azen hüo, ale anyugun hüshwi loti ado.”

¹³Tsontsin Joshua le jochü pe Jephunneh nyu gü Kaleb tsüo Hebron nyida gü pe a-honthyü lo tse tsüla.

¹⁴Nthu keti Hebron le Keniz tsipwen hon thyü bin zun, a-le ketsin thyüo Npugü Israel Sunggigü jozen kelo genyu.

¹⁵Himhundyü we Hebron hile Arba nyida gü tse kohü. (Arba le Anakim dan nyu kedatsin thyü hü.) Ntsoka we kazü gü nyu kebwe le bin lo.