Read Southern Rengma Naga JOSHUA 17 Bible Online

JOSHUA 17 - Southern Rengma Naga bible

JOSHUA 17

¹Jordan nkhünzin kazü peha pe Josef nyuri gü Manasseh tsipwen tsü. Manasseh nyuri gü Makir le Gilead a-pvü, a-le teri kekvu nyu nme, tsügenyu Jordan nkhünzin Gilead lo Bashan tse pe a-tsüla.

²Jordan nphozin kazü pe Manasseh kami a-sen dan tsü: tsüdan le Abiezer, Helek, Asriel, Shekem, Hepher, lo Shemida. Hile Josef nyu gü Manasseh tsipwen peche ju lo anyugun le kami pe dan.

³Manasseh nyu Makir, tsü günyu Gilead, tsügü nyu Hepher, tsügü nyu Zelophehad le a-nyu peche ndi, tenunyu nti. Anyugun zan le Mahlah, Noah, Hoglah, Milkah, lo Tirzah.

⁴Anyugun le püshükeda gü Eleazar, Nun nyugü Joshua lo Sharhi dan ki gü zo, “Npugü le agun shvunye peche dan hontse agun no gwen nrün kazü pe agun tsü lotse Mosa ka johoshü le,” tson shü. Tsügenyu Npugü le johoshü kenjü hontse anyugun shvunye peche dan zen-o kazü anyu jün pe tsüla.

⁵Tsü kon ka Manasseh le Jordan nphozin jün tseryü sin-o Gilead lo Bashan hyulo,

⁶a-nyu tenu lo peche dan-e kazü pe a-jün thyükela genyu. Gilead kazü we pe Manasseh tsipwen kecha dan tsüla.

⁷Manasseh kazü le Shekem npho zin Asher ka gü Mikmethath keti. Tson-o tesinzin terhi le Entappuah temi dan kazü sin.

⁸Tappuah kehun kazü dan le Manasseh hon, ai terhi nyu Tappuah rünyi gü tsüle Efraim nyenyu hon.

⁹Terhi gü le nshe gü Kanah rinyu keti. Rinyu gü tesin zin nyida dan tsüle Manasseh kazü nyu bin-e tsü le Efraim hon. Manasseh terhi le rinyu gü sozin gü Mediterranean zida keti.

¹⁰Efraim le tesinzin, lo Manasseh le tesozin, Mediterranean zida gü le nkhün zin au terhi. Asher le teso nkhün zin, lo Issachar le teso nphozin.

¹¹Issachar lo Asher au kazü nyu Manasseh hon Beth Shan lo Ibleam, lo tsü kehun rünyi dan, tsü nti mvu le Dor (rhon kebin gü,) Endor, Taanak, Megiddo, lo tsü kehun rünyi dan le bin.

¹²Tson-e Manasseh temi dan le nyida tsünyu yhun kebin dan hüshwi lomvu, tsü genyu Kanan nyu le tsünyu yhun ryü bin.

¹³Israel nyu le kvu soryü lo-e anyugun le Kanan nyu hi aphu hüla mvu, ai tsü dan kemvu thyü pe no anyugun tho thyü hü.

¹⁴Josef tsipwen dan le Joshua ka zoshü, “Nyuthyüo nle kazü jünme nti pe agun no agun hon thyülo tse khishü hü nla? Npugü le jochü pe agun tsüo agun temi chonsa kebin genyu.”

¹⁵Joshua le anyugun jo kenishü, “Hagun temi chonrio Efraim rincho tsüle hagun genyu she rilo, gü Periz nyu lo Rephaim nyu dan kazü chün tsü gü kendo pe hagun hon thyülo,” tsonshü.

¹⁶Anyugun le zonishü, “Agun genyu rincho kazü tsüle nrünri, ai ketejon nyu kebin Kanan temi Beth Shan lo tsühun kebin rünyi dan lo Jezreel ketejon nyu kebin dan we tegi kerugari le bin.”

¹⁷Tsontsin Joshua le Efraim lo nkhün zin kebin Manasseh tsipwen dan ka zoshü, “Ketsin thyü hagun le temi chon lo kvusa bin nyo. Hagun no jünme nti pe hagun hon thyü loho.

¹⁸Rincho kazü dan tsü le hagun hon thyüti. Tsüle chün yatse-e gü kendo lo-o pehazin lo kecha zin keni keti pe hagun hon thyülo. Lo Kanan nyu le tegi kerugari le bin kvusa bin-e hagun le anyugun hü lati.”