Read Southern Rengma Naga JOSHUA 18 Bible Online

JOSHUA 18 - Southern Rengma Naga bible

JOSHUA 18

¹Israel nyu le kazü gü lo kelo siki Shiloh ka kehun-o Npugü phika gü pe shü.

²Israel nyu kazü pe a-jün thyü kemvu tsipwen tsenyü le bin zun.

³Tsügenyu Joshua le Israel nyu ka zoshü, “Hagun le gü Npugü hagun pvübon nyu Sunggigü le pe hagun ketsü kazü lolo mvuo dithen ki kesedun bin tila?

⁴Kami nme ka misheshen pe atsü shülo. Ale anyugun nipe kazü gü a-pentha rhio anyugun kami le lonyü kebin kazü men zü loti. Tson-o anyugun le aki niryü ti.

⁵Lo kazü gü kenjün pe jün tsenyü thyüo; Juda le tesin zin a-kazü nyu lo Josef le tesozin a-kazü nyu tse bin ti.

⁶Lo kazü jün tsenyü dan hi rüla thu senryü a tsüshü. Tson-o ale hagun genyu Npugü ngun Sunggigü ka shün-o whe shwiti.

⁷Tson-e Levinyu we hagun kecha nyu zen-o kazü a-jün hyu loho, anyugun le Npugü püshükeda lotho tsüle anyu jün genyu. Lo Gad, Reuben, lo Manasseh kami ponha tse le Jordan nphozin anyu kazü hyulo laso tsü le Npugü gogü Mosa le pe anyugun tsü laso.”

⁸Joshua le jo hidan pe anyugun senthyü shüo temi dan le kazü gü men zü titse gü, “Gü kazü gü aphu ho shüo tsü men zü lo njüo rani aki ryülo. Tson-o hika Shiloh nyu ale hagun genyu Npugü ka shün-o whe shwiti le.”

⁹Tsügenyu temi dan le kazü gü aphu nyu güo dihontse kazü gü kenjün pe jün tsenyü thyü ti yo, lo tsünyu rünyi zan dan thulo. Tson-o anyugun le ranio Shiloh kensenbin nyu Joshua kiryü.

¹⁰Joshua le anyugun genyu Npugü ka shün-o whe shwio Israel nyu tsipwen nsen kebin dan kazü a-jün jün pe tsüla.

¹¹Benjamin tsipwen kami dan hon pe tsü teri. Anyugun kazü le Juda lo Josef au ja nyu.

¹²Anyugun terhi le tesozin Jordan ka bin zen-o ndun nsin gü Jeriko bonhü ti lo nkhünzin le rincho kazü dan nken gü Bethaven kazü kesi keti.

¹³Lo tesinzin le Luz (Bethel tse ko kehü gü) nkhünzin nshe gü Ataroth Addar, Beth Horon ketsenyo gü tesinzin kazüthun gü ti.

¹⁴Lo kecha zin terhi gü le, tesinzin kezünio kazüthun higü nkhünzin gü Juda kami hon Kiriath Baal (nmvue Kiriath Jearim) ka gü. Hile nkhünzin terhi

¹⁵Tesinzin terhi le Kiriath Jearim teka bin zen-o Nephtoah zükenthün ka gü.

¹⁶Tson-o tsüka nshe gü Hinnom ketejon so kebin kazüthun pha nyu, Rephaim ketejon gü te tesozin gü. Tson sen-o tesinzin gü Hinnom, ketejon pfüthüo Enrogel denzin Jebusnyu kazü te tesinzin ti.

¹⁷Tsüle tesozin kezünio Enshemesh lo Adummin kentsun zin Geliloth ka gü. Terhi gü le tson nshe gü Bohan tso ti, (Bohan le Reuben nyu)

¹⁸Jordan ketejon so kazü zun gü nken gü. Tson-o kazü ketejon nyu nshe,

¹⁹Beth Hoglah zun tesozin nken-o kesi zida tesozin Jordan züri le tsun yü kebin keti. Hile tesinzin terhi.

²⁰Jordan le npho zin terhi. Benjamin tsipwen kami le gwen titse hyukelo kazü rhi le hidan hi.

²¹Benjamin tsipwen kami hon nyida dan le Jeriko, Beth Hoglah, Emek Keziz,

²²Beth Arabah, Zemaraim, Bethel,

²³Avvim, Parah, Ophrah,

²⁴Chepharammoni, Ophni, lo Geba: nyida tseryü kenyhun lo tsü kehun rünyi dan.

²⁵Lo Gibeon, Ramah, Beeroth,

²⁶Mizpah, Chephirah, Mozah,

²⁷Rekem, Irpeel, Taralah,

²⁸Zela, Haeleph, Jebus (nmvue Jerusalem,) Gibeah, lo Kiriath Jearim: nyida tseryü pezi lo tsü kehun rünyi dan kosin. Hile Benjamin tsipwen kami le a-hon thyü titse hyukelo kazü.