Read Southern Rengma Naga JOSHUA 2 Bible Online

JOSHUA 2 - Southern Rengma Naga bible

JOSHUA 2

¹Tson-o Joshua le Akakia kensenbin ka temi mihvu nipe no kebu-o gü Kanan kazü lo Jeriko nyida gü rüzü lo tse ahza hoshü. Au le nyida günyu ryüo tsüje Rahab tse kethyü keyüla chün ketyü gi nme kanyu nsen.

²Jeriko nyu raja gü le Israel nyu peha le kazü rüzü titse tsüje ryü le tse nyülo,

³tsügenyu a-le me nipe Rahab kishüo: “N kanyu kebin hvu tsüle n kazü apentha rüzü titse ryübin nle! Au zen chwi ryülo!”

⁴Tsontsin tsügi le a-jokenishü, “Temi peha le a ka ki ryü le, ai au le dikipon ryü yo ale shamvu. Yhüko che kela sika Khinrun khin kela mhundyü au le tin la le. Au le dikipon gü yo ale hyumvu, ai hagun le whütse au then gü lo hülo kelai le.” (Rahab le au zen ka soge kü gü a-le ron yhün pe kequen kenjü hensin kebu la.)

⁷Raja gü temi dan temi dan le nyida gü nkenla lo khinrun gü khin la. Anyugun le rüzü keryü Israel nyu hvu fü gü Jordan pfükethü keti gü.

⁸Rüzü keryü hvu le zhü gü kela mhundyü Rahab le ka soge küo

⁹au ka zoshü, “Npugü le kazü higü pe hagun tsü laso tse ale sha bin nyo. Rünyi hinyu temi aphu a-kerüshvu laso.

¹⁰Hagun le Ijipt nken chwi kejü ka dihontse Npugü le Kenhon Zida no sin layo agun le nyülo. Lo Jordan npho zin dihontse hagun le Amor raja Sihon lo Og au dushvu layo tsüko nyülo laso.

¹¹Agun le tsü rüla nyülo ntsin nshvu la sele; hagun rüla shape agun kepeche ndi shü laso. Npugü hagun Sunggigü le tsang tsesoge lo kazü higüe Sunggigü.

¹²Tsügenyu ale hai njün keshü hontse a kaminyu njün shüti tse kethyü Sunggigü zan sen-o swen shülo, lo ano hai jo tenyen lo nrün zansü nme pe atsü lo.

¹³Hagun le apvü, ajvü, atsünyu lo a tsasikezen ju lo anyu kami aphu kenishü titse hai jo hoshü lo! Agun dushvula nya lo!”

¹⁴Tsontsin au le a-ka, “Ayi le zo keshü hontse thyümvu yatselo Sunggigü no ayi keyhun khilo lalo! Ayi le nyuthyü bin yo nle tsü pe temi nme kae zomvu yatselo, Npugü le kazü higü pe agun tsü keshü ka agun le nge thyü kezü thyü shüti.”

¹⁵Rahab le nyida gü chwida nsüo ka kethyü nyu bin hü, tsü genyu a-le kafüphe ka au no ron nme sü pechon tsenla.

¹⁶Tsügi le au ka, “Raja gü temi le hai hyu loshvu laryü rincho ki kü lalo. A nyugun le rani ryüla kemvuthen jonshen tsüki kebu tselo. Tsüsi kinyu hai kesha thyü gunlo.”

¹⁷Au le a-ka zoshü, “Nle ayi no zoshwishü lo tse-o ayi le zokeshü gü tsü rüchün bin ti.

¹⁸Nle higü hi thyümvu loshvu. Agun le kazü higü hü keryü ka ron kenhon higü pe nle ayi no tsen kelo kafüphe ka phin la. Tson-o Npvü, Njvü, ntsünyu lo npvü kaminyu aphu zen ryü nkanyu shü lalo.

¹⁹Lihigüe ka gü nken chwio sila yatselo, tsüle a-npfü a-kemu, agun gemvu; ai lihigüe ka günyu nzen bin-o nthyünnyü laya tselo tsüle ayi ge le.

²⁰Tson-e, ayi le nyuthyü bin yo nle pe me ka zoshü kela we nle ayi no zoshwishü kenjü hi then kemvui.”

²¹Tsügi le a-kendo lao au nishü la. Tson-o au le tin lalo a-le ron kenhon gü tsü pe a-kafüphe ka phin la.

²²Rüzü kegü hvu le rincho ki kü gü kebu bin. Raja gü temi dan le jonshen lojvü a-phu nyu au fü kendilao Jeriko ki rani ryüla.

²³Tsüselo rüzü kegü hvu le rincho ge tsenryü Jordan züri pfüthüo Joshua ki rani ryü. Au le nyunyu thyü layo aphu pe a-ka zoshü,

²⁴tson-o a-ka, “Npugü le kazü higü apentha pe ngun tsü kela sha tsentsü laso. Tsünyu temi aphu ngun rüla sha pe a-kerüshvu laso,” tsonshü.