Read Southern Rengma Naga JOSHUA 20 Bible Online

JOSHUA 20 - Southern Rengma Naga bible

JOSHUA 20

¹Npugü le Joshua ka zoshü

²Israel nyu ka zoshü lo tse, “Ale Mosa no pe hagun ka zoshü lotse johokeshü Techwenkelo nyida dan kejü lo.

³Thyüshwülo-o me boshvu kela gü no khenzoti tse kebin nrhio tsüka gülo nrün genyu.

⁴A-le tin-o nyida hidan nme ka gü nyida khinrun nyu jokerabin ka nyu hontse layo pe sharhi ju ka zoshü. Tson-o anyugun le a-no nyida gü nyu yüo, tsüka binlo nrün genyu bin nme pe a-tsüti.

⁵Khenzo titse fü kehü güle a-sithen-o tsüka ryüe, nyida tsügü nyu temi le a-khipe tsü gü ben ka shü nya. A-le a-nyunkenta genyu mvu le thyüshwülo-o temi gü boshvu kela genyu anyugun le a-ntsen lo mvu loshvu.

⁶Süda mhundyü nyu a-jünkera la lo tsü gwenkho ka Püshü Kengun thyü kebin gü le sila kemvuthen a-le nyida tsü gü nyu bin logwa. Tsüsiki nyu ranio a-rünyi nyu gun logwa.”

⁷Tson-o anyugun le Jordan nkhün Naftali rincho ki Galil nyu Kedesh, Efraim rincho ki Shekem; lo Juda rincho ki Hebron khikha lo.

⁸Jordan nphozin Jeriko npho kipon kazü kesi gü sun ketejon ki Reuben kazü nyu Bezer; Gad kazü Gilead ka Ramoth; lo Manasseh kazü Bashan ka Golan tse kejülo.

⁹Israel nyu aphu lo tesin anyu dan nyu yhun kehü ligü higü genyue tse anyugun le techwenkelo nyida hidan kejülo. Lihigü thyü shwülo-o me boshvu kela gü no khenzo titse fü kehü ben nyu tin lo nrün genyu; süda mhundyü a-jokera rimvutse a-boshvu lo nrün ndi.