Read Southern Rengma Naga JOSHUA 21 Bible Online

JOSHUA 21 - Southern Rengma Naga bible

JOSHUA 21

¹Levinyu kami sharhi jule Püshükedagü Eleazar, Nun nyu gü Joshua lo Israel kami sharhi ju aphu kiryü.

²Tson-o Kanan kazü Shiloh nyu anyugun ka zoshü, “Npugü le Mosa ka johokeshü le agun no yhun nrün nyida dan lo agun senru genyu tsü kehun tehen kebin kazü tse pe agun tsülo tseshü.”

³Tsügenyu Npugü le johokeshü hontse Israel nyu le nyida lo anyugun kazü peha sin pe Levinyu tsüla.

⁴Levi kami ka Kohath pfüphun dan nyida dan pe tsü rishü. Juda, Simeon lo Benjamin tse kazü nyu nyida tseryü kenshen pe Aaron Püshükeda gü tsipwen tsüshü.

⁵Efraim, Dan lo nkhünzin kebin Manasseh kazü nyu nyida tseryü pe Kohath pfüphun a-sen dan tsü.

⁶Issakar, Asher, Naftali lo nphozin kebin Manasseh kazü nyida tseryü kenshen pe Gershon pfüphun tsü.

⁷Reuben, Gad, lo Zebulun kazü nyu nyida tseryü kenyhun pe Merari pfüphun tsü.

⁸Npugü le Mosa ka johokeshü hontse Israel nyu le whe shwio nyida lo senru chvükelobin hidan pe Levinyu tsü shü.

⁹Judah lo Simeon au kazü nyu nyida khipe

¹⁰Aaron tsipwen ka Kohath pfüphun Levi tsipwen nyu yhun keryü dan ketsü le hi. Anyugun jün thyü pe tsü terishü.

¹¹Judah rincho ki Arba nyida (Arba le Anak a-pvü) ntsoka Hebron tse ko kela gü lo tsükehun senru chvükelo bin tse pe anyugun tsüla.

¹²Tson-e nyida gü lobu dan lo rünyi dan we pe Jephunneh nyugü Kaleb no gwen lotse tsü laso.

¹³Hebron (techwenkelo nyida nme) nyeki, nyida hidan pe püshükeda gü Aaron tsipwen dan tsüla: Libnah,

¹⁴Jattir, Eshtemoa,

¹⁵Holon, Debir,

¹⁶Ain, Juttah, lo Beth Shemesh pe senru chvükelo bin sin. Juda lo Simeon kami ka nyida tekü.

¹⁷Benjamin ka zü ka nyida pezi pe anyugun tsü: Gibeon, Geba,

¹⁸Anathoth, lo Almon pe senru chvükelo bin sin.

¹⁹Aphu kesin le nyida tseryü kenshen lo senru chvükelo bin sin tse pe Aaron tsipwen püshükeda dan tsüla.

²⁰Efraim kazü nyu nyida peha pe Levinyu kami kecha Kohath pfüphun tsü.

²¹Nyida pezi pe anyugun tsüla: Efraim rincho ki Shekem lo senru chvükelo bin (techwenkelo nyida nme,) Gezer,

²²Kibzaim, lo Beth Horon pe senru chvükelo bin sin.

²³Dan kazü ka nyida pezi pe anyugun tsüla: Eltekeh, Gibbethon,

²⁴Aijalon, lo Gathrimmon pe senru chvükelo bin sin.

²⁵Manasseh nkhünzin nyida kenyhun pe anyugun tsüla: Taanach, lo Gathrimmon pe senru chvükelo bin sin.

²⁶Kohath pfüphun kami hidan le nyida tseryü lo anyugun senru chvükelo bin tse hyulo.

²⁷Levinyu Gershon pfüphun gü le nphozin kebin Manasseh kazü nyu nyida kenyhun hyulo: Bashan nyu Golan (techwenkelo nyida nme) lo Beeshterah pe senru chvükelo bin sin.

²⁸Issakar kazü nyu anyugun le nyida pezi hyulo: Kishion, Daberath,

²⁹Jarmuth, lo Engannim pe senru chvükelo bin sin.

³⁰Asher kazü nyu anyugun le nyida pezi hyulo: Mishal, Abdon,

³¹Helkath, lo Rehob pe senru chvükelo bin sin.

³²Naftali kazü nyu anyugun le nyida kenshen hyulo: Galil nyu Kedesh, pe senru chvükelo bin sin (techwenkelo nyida nme) Hammoth, Dor lo Kartan lo anyugun senru chvükelo bin sin.

³³Gershon pfüphun kami kechacha dan le hyukelo kerhün le nyida tseryü kenshen pe senru chvükelo bin sin.

³⁴Levinyu a-sen Merari pfüphun le Zebulun kazü nyu nyida pezi hyulo: Jokneam, Kartah,

³⁵Dimnah, lo Nahalal pe anyu senru chvükelo bin sin.

³⁶Reuben kazü nyu anyugun le nyida pezi hyulo: Bezer, Jahaz,

³⁷Kedemoth, lo Mephaath pe senru chvükelo bin sin.

³⁸Gad kami ka anyugun le nyida pezi hyulo: Gilead nyu Ramoth, pe senru chvükelo bin sin (techwenkelo nyida nme,) Mahanaim,

³⁹Heshbon, lo Jazer pe senru chvükelo bin sin.

⁴⁰Tson-o kerhün le nyida tseryü kenyhun pe Merari pfüphun gü tsüla.

⁴¹Israel nyu le sen kebin kazü nyu nyida henzi-o tetse tsüdan kehun senru chvükelo bin sin pe Levinyu tsüla.

⁴³Npugü le pe anyugun tsü titse anyu pvübon nyu ka zoshwi shü kenjü hontse a-le kazü aphu pe Israel nyu tsüla. Anyugun le tsü lolo njüo tsünyu binlo.

⁴⁴Npugü le anyugun pvübon nyu ka zoshwishü kenjü hontse a-le kerüyü pe kazü tsügü aphu nyu shüshü. Npugü le shwikerüchün nyu nme no soryü anyugun ntsun lo mvula.

⁴⁵Npugü le Israel nyu genyu thyü titse zoshwi keshü aphu thyü küshü.