Read Southern Rengma Naga JOSHUA 22 Bible Online

JOSHUA 22 - Southern Rengma Naga bible

JOSHUA 22

¹Tsüselo Joshua le Reuben, Gad lo nphozin kebin Manasseh kami dan ko kequen shü.

²A-le anyugun ka zoshü, “Hagun le Npugü gogü Mosa le hagun no thyü lotse ahza hokeshü lo ale johokeshü aphu thyü shü laso.

³Gwenkho hi aphu nyu hagun le hagun tsasikezen Israel nyu khela mvu. Hagun le pütsü satse Npugü hagun Sunggigü johokeshü then ryü.

⁴Npugü hagun Sunggigü le zoshwishü kenjü hontse, ntsoka we a-le kerüyü pe Israel nyu tsü laso. Tsügenyu ranio Npugü gogü Mosa le pe hagun ketsü Jordan nphozin hagun kaki gunlo.

⁵Lo Mosa le hagun ka johokeshü tejvü gü tsü zen hüti tse rüchün tonlo: Npugü hagun Sunggigü solo, a-kendo thyülo, a-johokeshü zenlo, a-ka ketsin zolo, lo nnyun lo nkeyhun aphu sen a-lo thyülo.”

⁶Joshua le jochü pe anyugun tsü lo johidan zoshüo kaki anyugun nishü la: “Hagun le senru, rakagi, suna, lazo, tegi lo phinya kechon sen-o n nyasa tse kaki rani gun zhü nyo. Hagun le hagun shwikerüchün nyu hon khikelo pe hagun pvüshen zen kenjün lolo.” Tson-o anyugun le gunla. Mosa le Jordan nphozin kazü pe Manasseh tsipwen ponha ju tsüla, ai a-sen ponha dan Jordan nkhünzin Israel kechanyu sin-o Joshua le kazü pe anyugun tsüshü.

⁹Tson-o Reuben, Gad lo nphozin kebin Manasseh dan le kaki rani gunla. Anyugun le Kanan kazü Shiloh ka Israel nyu kecha dan khelao Npugü le Mosa zen-o anyugun ka johokeshü hontse anyugun kazü Gilead ki güla.

¹⁰Reuben, Gad lo nphozin kebin Manasseh kami dan le Geliloth ka ryülo lo Jordan nkhün zin hü ketse ka, anyugun le züri gü se nyu kershvubin keda, kegwa nme thyüshü.

¹¹Mele Israel nyu kecha dan ka zoshü, “Nyülo! Reuben, Gad lo nphozin kebin Manasseh kami dan le Jordan züri n gun denzin Geliloth ka kershvubin nme thyülo la sele.”

¹²Israel nyu le johi nyükelo ka gü nphozin kebin kami dan zen terithyü titseo apentha ryü Shiloh ka kequenlo.

¹³Tson-o Israel nyu le püshükeda gü Eleazar nyu gü Phinehas nipe Gilead kazü ki Reuben, Gad, lo nphozin kebin Manasseh kami dan kishü.

¹⁴Nkhünzin kebin tsipwen tseryü ka kami nme nyu kami pe thyü kebin sharhi nyu nmeme tseo anyu mi tseryü le Phinehas zen gü.

¹⁵Anyugun le Gilead kazü nyu Reuben, Gad lo nphozin kebin Manasseh dan kiryü,

¹⁶tson-o anyugun le Npugü temi apentha sun ka anyugun ka zoshü, “Hagun le nyuthyüo gwakemvu hi gü thyü pe Israel nyu Sunggigü ntsun bin nla? Hagun le hagun genyu kershvubin higü thyüo Npugü jozen mvuo a-ntsun bin nyo! Hagun le a-then bin mvu laso!

¹⁷Peor ka ngun kemu genyu Npugü le kempen shaja senryü a-temi dan ge keshü rüchün lo mvu ole? Tsügenyu nthu keti ngun le kenjün thyü bin nle. Kemu tsü nti le rünyu mvu ole?

¹⁸Hagun le ntsoka we a-sithen mvu sele tse ole? Hagun le nthu a-ntsun shülo a-le senduki Israel nyu aphu ge a-nyunta ti.

¹⁹Hagun kazü günyu Npugü kershvubin thyü zümvu yatselo, Npugü Phika le kebin a-kazü kipon ryüta. Agun denzin kazü peha khilota. Ai Npugü ngun Sunggigü kershvubin nyeki kershvubin kecha thyü sin-o Npugü nmvue agun ntsun nya.

²⁰Zerah nyugü Achan le nkela lotse nmu kela kanyü rüla zokeshü zenmvu kela genyu dihontse layo rüchün shüta; tsügenyu Israel nyu apentha no shaja hyulo. Achan kemu genyu a-nti simvu.”

²¹Tsontsin Reuben, Gad lo nphozin kebin Manasseh tsipwen kami dan le nkhün zin kebin kami pe dan jo kenishü:

²²“Kekvutsin gü le Sunggigü! A-le Npugü! Kekvutsin güle Sunggigü! A-le Npugü! Agun le nyu genyu hithyü yo a-le shabin, lo agun le hagun kono sha lonyü! Agun le Npugü ntsun lo a-tenyen mvuya tselo agun no yhunsin binnya!

²³Agun le Npugü jozen mvuo rope kerüshvu nmvue shyenikerüshvu, nmvue kepfüshe kerüshvu genyu agun npfü kershvubin thyü yatselo, Npugü no shaja pe agun tsüta.

²⁴Nmvu! Agun le hi kethyü le siki hagun tsipwen le agun tsipwen ka, ‘Hagun le Npugü, Israel nyu Sunggigü zen nyu kethyüi le bin la? tsonzo solo kenshvu genyu le.

²⁵A-le Jordan khipe hagun Reuben lo Gad temi lo agun jaka terhi thyü shü laso. Hagun le Npugü zen thame kethyüi ndi.’ Tson-o hagun tsipwen le agun tsipwen no Npugü rüshvu mvu lalo gwa.

²⁶Tsügenyu agun le rope rüshvu nmvue tha hope rüshvu titse kershvubin thyümvu,

²⁷tsonkethyü gü mvule siki shehen dan genyu agun lo hagun jaka tsüle ngun le a-kenshün Phika gü mhundyü nyu rope kerüshvu lo kepfüshe kerüshvu sen-o Npugü rüshvu hü ketsin tse kethyü zansü nme le. Hile hagun tsipwen no agun le Npugü zen thame kethyüi ndi tse mvulo nrün genyu.

²⁸Agun kerüchün le, tson so yatselo agun tsipwen le, ‘Shwishü! Agun bon nyu le Npugü kershvubin hontse thyü njü. Tsüle rope kerüshvu nmvue rorathyü nrün genyu mvu, ai agun lo hagun genyu zansü le.’

²⁹Agun le kershvubin nme thyülo-o tsü ge rope kerüshvu nmvue shyeni kerüshvu nmvue rora thyüo Npugü ntsun nmvue a-sithen mvu lati tsemvu. Agun le a-le kehü Phika gü mhundyü ka Npugü ngun Sunggigü kershvubin nyeki kershvu kecha lihi-e thyü loho.”

³⁰Püshükeda gü Phinehas lo a-zen kehü nkhünzin kebin kami pe, sharhi mitseryü dan le Reuben, Gad, lo nphozin kebin Manasseh kami dan jo nyu anyugun kenyü la.

³¹Tson-o Eleazar Püshükeda gü nyugü Phinehas le anyugun ka zoshü. “Ntsoka we Npugü le ngun dan nyu bin tse kethyü agun le sha laso. Hagun le Npugü ntsun mvu, tsügenyu hagun le Npugü shaja nyu Israel nyu kenishü laso.”

³²Tson-o Phinehas lo sharhi ju le Gilead kazü nyu Reuben, lo Gad temi dan kheo rani Kanan ki gü Israel nyu dan ka tsü rüla zoshü.

³³Israel nyu le tsüsha pe anyugun kenyüo Sunggigü shwenla. Anyugun le gü Reuben lo Gad dan zen teri thyü anyugun kazü nkela titse kera nimvula.

³⁴Reuben lo Gad temi dan le, “kershvubin higü le Npugü le Sunggigü tse ngun aphu genyu jünkezo nme le, tse zoshü.” Lo anyugun le tsü zan tho pe “Shahu” tse kola.