Read Southern Rengma Naga JOSHUA 23 Bible Online

JOSHUA 23 - Southern Rengma Naga bible

JOSHUA 23

¹Kethon siki Npugü le anyugun hun kebin shwikerüchün dan nyu kenshvu kendi pe Israel nyu tsüshü. Tsü gwenkho tsüle Joshua le püshü sala,

²tsügenyu a-le Israel nyu aphu, püshü nyu, sharhinyu, kerathünyu, lo kedanyu ko shüo zoshü. “Ale ntsoka we thenri laso.

³Hagun genyu Npugü hagun Sunggigü le senye hi dan ge thyükeshü aphu hagun le hyu laso. Npugü hagun Sunggigü le hagun genyu teri thyü gun ryü.

⁴Ale hagun no gwenlo lotse nphozin Jordan züri lo nkhünzin Mediterranean zida keti, n thue binzun kethyü dan kazü lo ale lolo kela kazü aphu pe hagun tsipwen dan tsü laso.

⁵Npugü hagun Sunggigü le hagun mhundyü nyu anyugun no tesen lati, hagun le kethün shülo a-le anyugun hü lati. Npugü hagun Sunggigü le zoshwishü kenjü hontse hagun le anyu kazü lo loti.

⁶Tsügenyu pütsüo Mosa tejvü lesü gü nyu thu kenjü aphu zenlo. Tsü nme-e khe lanya,

⁷tson-o hagun dan nyu kebin temi hidan zen kengü nya, nmvue anyugun tero zan zo nmvue zan tsüdan zo-o swe nmvue nkhün-o tsüdan rüshvu nya.

⁸Tsonkethyü gü mvu le ntsoka keti hagun le thyü kebin hontse Npugü nku lo.

⁹Hagun le kethün keshü ka Npugü le senye gon lo kvusa kethyü dan hü laso, lo nme-e hagun mhundyü so-o hagun nren lomvu.

¹⁰Hagun temi nmele yie me hü lagwa, a-le zoshwishü kenjü hontse Npugü hagun Sunggigü le hagun genyu terithyü bin nyo.

¹¹Tsügenyu pütsü sao Npugü hagun Sunggigü solo.

¹²Hagun le ranio hagun dan nyu kebin senye dan ki gü hagun kelo tin laya tselo,

¹³hagun le kethün keshü ka Npugü hagun Sunggigü le senye hidan hümvu lati tse sha tsentsü lo. Tsügü mvule anyugun le hagun genyu chwa, nmvue tekhwünkü lo n süren kevü vü nmvue hagun yhütyü ka tsehü hontse lati. Lo Npugü hagun Sunggigü le khikeshü kazü kegwa gü nyu hi hagun nme-e no kebin then tsü no bin ti.

¹⁴“Ntsoka we a kesi gwenkho le ryü laso. Hagun aphu hagun nyun ki lo hagun keyhun nyu Npugü hagun Sunggigü le zoshwishü kenjü hontse thakegwa aphu pe hagun tsüla so tse shabin nyo. A-le zoshü kenjü aphu then; nme-e khela mvu.

¹⁵Ai a-le zoshwi keshü nme-e khe kemvu hontse gwakemvu dan ko aphu thyü pen ti.

¹⁶Npugü le hagun no thyü lotse johokeshü Kejozenkelo gü thyü mvuo tero kecha lothyü lo rüshvu tinla yatselo a-le a-nyunkenta nyu shaja pe hagun tsüti, tson-o whütse a-le khi keshü kazü kegwa higü nyu hagun nme n sen mvu lati.”