Read Southern Rengma Naga JOSHUA 24 Bible Online

JOSHUA 24 - Southern Rengma Naga bible

JOSHUA 24

¹Joshua le Israel nyu tsipwen aphu no ryü Shekem ka kequen lo. A-le püshünyu, sharhinyu, kerathünyu lo Israel nyu keda nyu koshüo anyugun le Sunggigü mhundyü nyu ryü.

²Joshua le temi aphu ka zoshü, “Npugü Israel Sunggigü le hizo bin nyo: ‘Nduka hagun bon nyu le Eufrates züri perezin yhun-o tero kecha rüshvu hü. Bon nyu tsüdan nyu nme le Abraham lo Nahor au pvü Terah.

³Tsüka ale Eufrates perezin hagun bon Abraham ko lo njüo a-tson rio Kanan apentha nken ryü. Ale tsipwen kechon pe tsüshü. Ale Isak pe a-tsüshü,

⁴lo ale Jakob lo Esau au pe Isak tsüshü. Ale Esau no gwen lotse Idom rincho pe a-tsüshü, ai hagun bon Jakob lo a-nyenyu ju le Ijipt ki nshela.

⁵Kenkhin ki ale Mosa lo Aaron au nishü, ale kenjün kethyü keda senryü Ijipt ge shü. Ai ale hagun tson ri chwiryü la:

⁶Ale Ijipt nyu hagun bon nyu zenchwiryü, lo Ijipt nyu le terigari lo keru sen-o anyugun hüryü. Ai hagun bon nyu le kenhon zida tikelo ka

⁷ano anyugun keche lotse akoshü, lo ale kezün pe Ijipt nyu anyu jaka shüla. Ale zida gü no Ijipt nyu so hen lao anyugun nrhe shvula. Ale Ijipt nyu ge nyuthyü shüyo hagun le sha. “ ‘Hagun le gwenkho kethon kazü kesinyu yhun.

⁸Tsüka ale hagun zenryü Jordan nphozin yhun kehü Amor nyu kazü ka shü. Anyugun le hagun zen kenren ai ale anyugun sokvukelo pe hagun tsü. Hagun le kethün keshü ka ale anyugun nkelao hagun le anyugun kazü khilo.

⁹Tsontsin Moab raja, Zippor nyu gü Balak le hagun nren. A-le josin pe Beor nyu gü Balaam ki shüo no shochün pe hagun tsü lotse zo.

¹⁰Ai ale Balaam khwenyü kemvu genyu a-le jochü pe hagun tsü, hihontseo ale Balak ben nyu hagun kenishü.

¹¹Hagun le Jordan pfüthüo Jeriko ki ryü. Jeriko nyu temi le Amornyu, Periznyu, Kanan nyu, Hitnyu, Girgash nyu, Hivnyu, lo Jebusnyu hontse hagun nren. Ai ale anyugun aphu so kvukelo pe hagun tsüla.

¹²Hagun le kethün keshü ka Amor raja hvu hüla nrün genyu ale au khipe kenshvu nyu shüla. Hagun jenthon lo hagun levü le thame kethyüi ndila.

¹³Hagun le tsühü kemvu kazü lo thyü kemvu nyida dan ale pe hagun tsüshü. Ntsoka we hagun le tsünyu yhun-o hagun le sen kemvu vainsha lo oliv bin ge a-sha tyü bin nyo.’ ”

¹⁴Joshua le zonio, “Tsügenyu ntsoka we tseri lo joketsin zo-o Npugü rühvu lo a-lothyü lo. Hagun bon nyu le Mesopotamia lo Ijipt nyu rüshvu kehü tero dan nrhilo-o Npugü nti lothyülo.

¹⁵Hagun le a-lothyü nyümvu yatselo, hagun le digü lothyü tiyo nthu kejülo, hagun bon nyu le Mesopotamia ki rüshvu kehü gü tile, ntsoka hagun le a-kazü nyu yhun kebin Amornyu tero gü tiyo. Ai ale lo a kami nyu we, agun le Npugü lothyüti.”

¹⁶Temi dan le zonishü, “Agun le Npugü kheo tero kecha rüshvu loho!

¹⁷Npugü ngun Sunggigü le Ijipt nyu do nyu ngun pepvünyu lo ngun zen chwiryü, lo a-le ndun tho thyü keshü dan ngun le hyu laso. Ngun le lika hika güe ngun le nkenchwi keryü senye aphu ka a-le ngun ntsenshü.

¹⁸Ngun le kethün-o kazü higü nyu keryü ka, Npugü le hi nyu keyhun Amornyu aphu hüla. Tsügenyu agun ko Npugü lothyüti; a-le ngun Sunggigü le.”

¹⁹Joshua le temi dan ka zoshü, “Ai hagun le Npugü lothyü lomvu ado. A-le kenshün Sunggigü, a-le hagun kemu jüshü loho. A-le a-kentsun nyu nyhebin loho,

²⁰lo hagun le a-khelao sin rünyi kecha tero lothyü lo a-le raniryü hagun ntsun lo shaja pe hagun tsüti. A-le himhundyü hagun genyu gwa hüe, a-le hagun nke lati.”

²¹Temi dan le Joshua ka zoshü, “Nmvu! Agun le Npugü lothyü ti.”

²²Joshua le anyugun ka zoshü, “Hagun le Npugü lothyü titse kejülo kela hagun npfü kemisha dan so.” Anyugun le zoshü, “Ele, agun le shahu danle.”

²³“Tsonyatselo hagun le sen kehü sin rünyi kecha tero dan tsü khela lo, lo Npugü Israel Sunggigü jozenketsin thyü titse hagun johoshülo,” tsonshü.

²⁴Tsüselo temi dan le Joshua ka zoshü, “Agun le Npugü ngun Sunggigü lothyüti. Agun le a-johokeshü zen ti.”

²⁵Tsügenyu Joshua le tsünyü temi dan genyu kejozen kelo nme thyülo, a-le tsüka Shekem nyu tejvü lo then nrün dan pe anyugun tsüshü.

²⁶Joshua le johokeshü hidan pe Sunggigü tejvü lesü ka thulo. Tson-o a-le tsokeda nme pe Npugü kerüshvuka khoka teshobin gü hensin senshü.

²⁷A-le temi aphu ka zoshü, “Tso higü le ngun shahu. Tsüle Npugü le ngun ka kezo aphu nyülo laso. Tsügenyu tsüle hagun no Npugü hagun Sunggigü ntsun mvu nrün genyu shahu thyüo bin nle.”

²⁸Tson-o Joshua le temi dan nishüo, nme me tse ranio a-kazü ki gunla.

²⁹Tsüsiki, Nun nyu Npugü gogü Joshua le a-keyhun chentsio tseryü ka sila.

³⁰Anyugun le Efraim rincho tesozin Gaash kazüthun nyu a-npfü a-kazü Timnah Serah ka a-sunla.

³¹Joshua le rhünkebin then Israel nyu le Npugü lothyühü, lo a-kesi siki-e Npugü le Israel nyu genyu thyükeshü aphu kehyu sharhi ju le yhun kebin then tsü hontse thyü.

³²Josef ru, Israel nyu le Ijipt ki sen gun keryü gü pe Jakob le Shekem a-pvü Hamor nyenyu juka rakagi tsime pe heikelo lobu günyu sunla. Josef tsipwen dan le kazü higü gwen hü.

³³Aaron nyugü Eleazar le si lao pe Efraim rincho ki a-nyugü Phinehas tsü kela Gibeah tse kethyü rünyi nme ka sunla.