Read Southern Rengma Naga JOSHUA 3 Bible Online

JOSHUA 3 - Southern Rengma Naga bible

JOSHUA 3

¹Lonyü gü Joshua lo Israel nyu aphu nshwe so-o Akakia kensenbin khe lao Jordan ki gü tsü pfüthü kemvu ka tsünyu nsen-o khwen bin.

²Jonshen siki sharhi ju le kensenbin rhio

³temi dan ka zoshü, “Püshükeda jule Npugü hagun Sunggigü Kejozenkelo Khinpha gü pen kehü hyu shülo hagun kensenbin rhola njüo anyugun thenlo.

⁴Hagun le hi mhundyü hiki ryü mvuzun tsügenyu anyugun le tson tsin pe hagun hi ti. Ai Kejozenkelo Khinpha gü khonni nya; kilometer nme kho siki bin lo,” tsonshü.

⁵Joshua le temi dan ka zoshü, “Hagun thyü kenshünlo, Npugü le senduki hagun dan nyu nduntho thyüshü nrün genyu.”

⁶Tson-o a-le püshükeda ju no Kejozenkelo Khinpha gü pen-o temi dan mhundyü ri lolo tse shü. A-le kezo hontse anyugun le thyülo.

⁷Npugü le Joshua ka zoshü, “Ale nthu nyuthyü shü tiyo tsüle Israel nyu aphu no nle kedanyu nme letse n rühvu lo ale Mosa zen kehü hontse nzen kehü sha so lati.

⁸Kejozenkelo Khinpha pen kehü Püshükeda juka, anyugun no ryü züri gü ti lolo, züzhen nyu so tselo tse zoshülo.”

⁹Tsüselo Joshua le temi dan ka, “Hika ryüo Npugü hagun Sunggigü le nyuzo shü tiyo nyülo.

¹⁰Hagun le ketu gü lo a a-le ketsin thyü Kanan nyu, Hitnyu, Hivnyu, Periznyu, Girgashnyu, Amornyu lo Jebusnyu hü lati. Tson-o kerhün Sunggigü le hagun dan nyu kehü hagun le sha loti.

¹¹Kazü aphu so Npugü zen Kejozenkelo Khinpha gü le hagun mhundyü rio Jordan pfüthü kegü ka.

¹²Tsügenyu ntsoka Israel tsipwen nme ka temi nme me tse mi tseryü kenyhun kejülo.

¹³Kazü aphu so Npugü zen Kejozenkelo Khinpha pen kehü püshükeda ju le apha pe zünyu shülo, Jordan zü le tsun mvu lati, nsheryü kejü zü gü le bin nme ka sun tin lati.”

¹⁴Tsüle logvü gwenkho ka, lo züri gü le da bin. Temi dan le Jordan pfüthü titse kensenbin nken keshü ka, püshükeda ju le Kejozenkelo Khinpha gü pen-o anyu mhundyü rihü. Püshükeda ju le züri gü nyu nkvu yü ntsin,

¹⁶zü gü le tsun mvu lao Zarethan nyida khoka Adam nyu kequen tinla. Tsun-o Kesi zida nyu tsun keyü zü le ndin thüla, tsüka Temi dan le Jeriko khoka pfüthü chwilo.

¹⁷Temi dan le kazü kesin nyu pfüthü chwi kebin ka, Npugü Kejozenkelo Khinpha kepen püshükeda jule temi aphu pfüthü chwilo kemvuthen Jordan züri lvu kazü kesin nyu sobin.