Read Southern Rengma Naga JOSHUA 4 Bible Online

JOSHUA 4 - Southern Rengma Naga bible

JOSHUA 4

¹Senye gü apentha Jordan pfüthü chwilo ntsin Npugü le Joshua ka zoshü,

²“Kami nme ka nme me tse temi tseryü kenyhun kejülo,

³lo anyugun no Jordan lvu nyu püshükeda ju le so kebin bin ka tso tseryü kenyhun khilo lotse johoshü lo. Anyugun no tso hidan pfü gü ntsoje hagun kensenbin ka shülo.”

⁴Tson-o Joshua le kejükelo temi tseryü kenyhun ju tsü ko shüo,

⁵zoshü, “Jordan nyu yüo Npugü hagun Sunggigü Kejozenkelo Khinpha gü mhundyü gülo. Tson-o hagun nme me tse Israel kami sunka tso nme me pe hagun buthun ge shülo.

⁶Npugü le nyuthyü shüyo tso hidan ge temi no rüchün loti. Siki hagun nyenyu le tso hidan hile nyu genyu la tse hagun ketso shülo,

⁷hagun le Npugü Kejozenkelo Khinpha gü le Jordan pfüthü kegü ka züri gü zü le tsun mvu la le tse zoti. Tso hidan ge hika nyuthyü layo a-zintse rüchün loti.”

⁸Temi dan le Joshua ahza then lo. Npugü le Joshua ka johokeshü hontse, Jordan lvu nyu kami nme genyu tso nmeme tse tso tseryü kenyhun pen gü anyu kensenbin ka shülo.

⁹Joshua le Jordan lvunyu püshükeda ju le Kejozenkelo Khinpha gü pen-o sun kethyü bin nyu ko tso tseryü kenyhun sen shü. (Nthu keti tso tsüdan le tsüka bin nyo.)

¹⁰Npugü le temi dan no thyü lo tse ahza pe Joshua tsü keshü aphu thyü pen la kemvuthen püshükeda ju le Jordan lvu nyu so bin. Hihontse lo tse Mosa le johoshü. Temi dan le nyhun-o züri gü pfüthü la.

¹¹Anyugun aphu perezin chwilo, lo püshükeda ju le Kejozenkelo Khinpha gü pen-o temi dan mhundyü rilo.

¹²Mosa le anyugun ka zo keshü hontse, Reuben lo Gad kami, lo Manasseh kami ponha tse le teri gwen nda lo-o temi kecha dan mhundyü rio pfüthü chwi.

¹³Npugü mhundyü nyu teri thyü titse nda sen kehü temi yie henzi le Jeriko kho ka ketejon nyu gü.

¹⁴Tsünyü Npugü le thyü keshü le Israel nyu temi no Joshua rüchün n gon sa la. Anyugun le Mosa rühvu kehü hontse Joshua keyhun then a-rühvu.

¹⁵Tsüselo Npugü le Joshua ka zoshü

¹⁶Kejozenkelo Khinpha kepen püshükeda ju no Jordan nken chwiryü lalo tse johoshü lo.

¹⁷Joshua le tsonshü,

¹⁸tson-o püshükeda ju le züri se tilo ntsin zü da pe a-zhen süni lola.

¹⁹Temi dan le shye keri gü jonryü nyü Jordan pfüthüo ryü Jeriko npho zin Gilgal ka kensenbin thyülo.

²⁰Tsüka Joshua le Jordan nyu pen kelo tso tseryü kenyhun tsü pe sen shü.

²¹A-le Israel temi dan ka zoshü, “Siki, hagun nyenyu le tso hidan hile nyu genyu la tse ketso lo,

²²Jordan le sin lao Israel nyu no pfüthü kelo rüla hagun le pe anyu ka zoshü lo.

²³Anyugun ka Npugü hagun Sunggigü le ngun genyu Kenhon zida no sin kela hontse hagun le pfüthü lo kemvuthen Jordan zü no sinla letse zoshü lo.

²⁴Hi genyu kazü nyu temi aphu Npugü kekvu le ditsüki gon yo sha loti, lo hagun le kethonthen Npugü hagun Sunggigü rühvu hüti.”