Read Southern Rengma Naga JOSHUA 5 Bible Online

JOSHUA 5 - Southern Rengma Naga bible

JOSHUA 5

¹Jordan nkhün zin Amornyu raja aphu lo Mediterranean zida kerhon Kanan nyu raja aphu Israel nyu temi le pfüthü lo kemvuthen Npugü le Jordan no sinla kethyü rüla nyülo. Anyugun le Israel nyu nshvu lo kepeche ndila.

²Tson-o Npugü le Joshua ka zoshü, “Tsotsü pe Kutari thyülo njüo Israel nyu gi rü lalo,” tsonshü.

³Tsügenyu Joshua le Npugü le johokeshü hontse Gikerü Rincho tse ko kelo bin nme ka Israel nyu gi rüla.

⁴Israel nyu le Ijipt nken chwi keryü ka, pechenyu aphu girü laso. Tson letse-e, chen henzi kazü kesi nyu ho kehü ka nnyun kelonyu ponyu nme girü mvu. Tsü nti mvule tsü gwenkho tsüle anyu le Ijipt nken chwi keryü ka teri thyülo kekü nyu aphu Npugü jozen kemvu genyu sibu laso. A-le sweo anyugun no a-le pe anyu pvübon nyu tsü titse zoshwi kenjü kazü kebwe kegwa gü hyu loho le tse kela genyu.

⁷Temi hidan nyun dan le girü mvuzun, lo Joshua le shenhe keshün hidan girü la.

⁸Girü kela siki, anyugun kethyü le pon lo kemvuthen senye gü apentha kensenbin günyu bin.

⁹Npugü le Joshua ka zoshü, “Nthu ale hagun ge Ijipt ki medo thyü kehü tetsin gü tsü khi pe shwe laso.” Tsügenyu bin tsügü pe Gilgal thola, zan gü le nthu keti tson bin.

¹⁰Israel nyu le Jeriko khoka Gilgal ketejon nyu kebin ka, shye jonryü pezi je nken kelo nga lo.

¹¹Tsüsi nyü Kanan kazü nyu hyu kelo chvü kebu lo shükemvu tensü lo shekeshvu tyü keritsin thyü.

¹²Tsüselo Manna nrhi mvula lo Israel nyu le hyu sin mvula. Tsü gerho anyugun le Kanan nyu yhun chwikeryü chvü tyü tin la.

¹³Joshua le Jeriko khoka kehü ka, temi nme le jenthon sen-o a-mhundyü nyu so kebin hyulo. Tsontsin Joshua le gü a-ka, “Nle ngun shüpahü le shwikerüchün nyu nme ola?” tse ketsoshü.

¹⁴Temi gü le a-jo kenishü, “Nmvu, Ale Npugü rihü dan so keda gü thyüo hika hü nle.” Joshua le kazü nyu che tsügü a rüshvuo zoshü, “Kedagü, ale ngo gü le, Nle ano nyu thyü nyü bin nla?”

¹⁵Tsontsin Npugü rihü dan sokeda gü le a-ka, “Nphakü tho lalo; nle bin kenshün gen so bin nyo.” Zokeshü hontse Joshua le thyülo.