Read Southern Rengma Naga JOSHUA 6 Bible Online

JOSHUA 6 - Southern Rengma Naga bible

JOSHUA 6

¹Israel nyu no yüryü mvu nrün genyu Jeriko Khirun khin lao rikhun bin. Temi nme chwida gü nyu yü nmvue chwimvu.

²Npugü le Joshua ka zoshü, “Ale Jeriko, a-raja lo rihü kepeche aphu pe nben nyu shü bin nle.

³Nle lo nshüpahü le jon tsero tsü khenyü me gwen gwa tsonchü nyida hun shü.

⁴Püshükeda mi tsenyü no shu nmeme sen küo Kejozenkelo Khinpha gü mhundyü gü ti. Jon tsenyü nyü nle lo n shüpahü dan le gwen tsenyü ge nyida gü hun lo Püshükeda jule shukhun ti.

⁵Tson-o anyugun le gwen gwa khun kethon thyüshü ti. Hagun le tsü nyü lo ntsin temi aphu nra sen shülo nyida gü chwida le nren la ti. Tsüselo rihü apentha njüo nyida gü nyu yü ti.”

⁶Joshua le Püshükeda ju ko shüo anyugun ka zoshü, “Kejozenkelo Khinpha gü khilo, lo hagun mi tsenyü le shu sen-o tsü mhundyü ri ti.”

⁷Tson-o rikhun nyu no Kejozenkelo Khinpha mhundyü rilo lo a-temi dan no tsonchü nyida gü hun lo tse ahza hoshü.

⁸Joshua le ahza hokeshü hontse rikhun nyu le shukhun kehü Püshükeda ju mhundyü rio tsonchü shüla; tsüdan sika Kejozenkelo Khinpha pen kehü Püshükeda ju, lo sizin rikhun le tsü then. Gwenkho aphu ka shukhun bin.

¹⁰Ai Joshua le a-temi dan no a-le ahza hoshü kemvu ka we teri khwe nmvue jo nme zonya lotse la.

¹¹Tson-o a-le temi dan no Npugü Kejozenkelo Khinpha gü pen-o nyida gü hun gwa shü. Anyugun no kensenbin nyu rani ryü tsüje rüyü tinla.

¹²Tsüsinyü Joshua le nshwe soryüo, gwen hvu ge gü Püshükeda ju lo shüpahü nyu no tsü mhundyü nyü hontse nyida gü hun shü lotse ahza hoshü: keri le mhundyü rikhun nyu; tsü sika Püshükeda nyu mitsenyü no shu tsenyü khun, tsüsika Npugü Kejozenkelo Khinpha kepen Püshükeda ju, lo kenkhin gü le sizin rikhun nyu. Gwenkho hi aphu ka shu khun bin.

¹⁴Jon hvu nyü anyugun le nyida gü hun gwa nishüo kensenbin nyu rani ryüla. Jon tsero anyugun le hihontse thyü shü.

¹⁵Jon tsenyü nyü anyugun le nshwe soryüo tsü hontse gwen tsenyü nyida gü hun shü-- jon hinyü nti anyugun le gwen tsenyü chwida gü hun.

¹⁶Gwen tsenyü gü ka anyugun le hun shüo, Püshükeda ju le shukhun shü nrün ka Joshua le a-temi dan no nra sen shülo tse ahza hoshüo zo, “Npugü le nyida gü khipe hagun tsüla so!

¹⁷Kershvu thyü pe Npugü ketsü hontse nyida gü lo tsünyu kebin aphu nkeshü lamvu loshvu. Keyülachün ketyü gi Rahab lo a-kami nyu nti nrho shüti, a-le ngun rüzü hvu kebu keshü genyu.

¹⁸Ai hagun le nkela nrün kanyü lihi-e khilo nya; hagun le khilo yatselo kekevü lo kenke senryü Israel nyu kensenbin nyu shü lati.

¹⁹Rakagi, suna, lazo nmvue tegi pe kethyü aphu senryü Npugü genyu pe a-kecha thyü la. Tsü pe Npugü kenya khinyu shüti.”

²⁰Tson-o Püshükeda ju le shukhun shü. Lo temi dan le tsü nyülo ntsin nra tetso sa shü, lo chwida le nren la. Tsüselo rihü nyu aphu njüo rincho ge nsin gü nyida günyu yü gü tsü lolo la.

²¹Anyugun jenthon pe nyida gü nyu temi peche, tenu, nche lo püshü aphu dushvula. Anyugun le methu, tanyü, lo gada dan-e dushvu küla.

²²Lo Joshua le rüzü keryü temi hvu ka zoshü, “Hai le zoshwishü kenjü hontse keyülachün ketyü gi ka ki gü tsügi lo a-kaminyu zen chwiryü lo.”

²³Tson-o au le gü Rahab, lo a-pvü, a-jvü, a-tsünyu lo a-kaminyu kecha dan zen chwiryü. Anyugun aphu, kami lo do dan zen gü Israel nyu kensenbin teka kenshvu kendi bin ka shüla.

²⁴Tsüselo mah pe nyida gü lo tsünyu kebin aphu rola, suna, rakagi, lazo, lo tegi lo kethyü hon dan khi lo-o pe Npugü kenya khinyu shü kela gwen zin.

²⁵Ai Joshua le keyülachün ketyü gi Rahab lo a-shvunye aphu keyhun nrho shü, tsügi le Jeriko rüzü kegü hvu kebu keshü genyu. (Tsügi tsipwen le nthu keti Israel nyu dan nyu yhun bin.)

²⁶Tsü gwenkho ka Joshua le pütsü lo lo tse kethyü khishü: “Ligü higü Jeriko nyida gü thyü niti tse kehünyu no Npugü shochün pfülo. Segü le binjwe gü pe hoshü yo tsü gü no a-nyuri gü ndi lati; Ligü higü a-khinrun kethyü gü no a-nyu pin gü ndi lati.”

²⁷Tson-o Npugü le Joshua zen hü lo kazü apentha nyu arüla zo süla.