Read Southern Rengma Naga JOSHUA 7 Bible Online

JOSHUA 7 - Southern Rengma Naga bible

JOSHUA 7

¹Npugü le Israel nyu no Jeriko nyu nke la nrün hon lihi-e khilo nyalo tse johokeshü zen mvula. A-zan le Akan tse kethyü temi nme le ahza tsü zenmvu kela genyu Npugü le Israel nyu ge a-nyunta sa lola. (Akan le Karmi nyugü, a-bon le Zabdi, Juda tsipwen ka chwikeryü Zerah kami.)

²Joshua le Jeriko ka temi nipe no Bethel npho zin Bethaven khoka Ai tse kethyü nyida nme rhishwi lo tse ahza shü. Tsü genyu anyugun le gü rhishwio,

³ryü Joshua ka zoshü: “Temi aphu gü Ai whe mvue gwa. Temi yiehvu yieshen nti nishü lo. Rihü apentha no gü tsü hü mvue gwa, tsüle nyida kemvu le.”

⁴Tson-o yieshen kho le tsü whe gü, ai anyugun le tesen ni mvu lonrün ndila.

⁵Ai nyu temi le nyida gü Khinrun ka anyu hü rincho tson nsheryü tso keyhebin tio anyugun temi shenryüo tsero gala. Tsüselo Israel nyu le nshvu lo kepeche ndila.

⁶Joshua lo Israel sharhi jule nyungwa mvuo anyu phi sürhenla, njüo Npugü Kejozenkelo Khinpha mhundyü ka kazü nyu n khünrün, nyungwa kemvu zansü kenphü pe anyu pe ge shüpfü bin-o ngwen gü ti.

⁷Tson-o Joshua le zoshü, “Kekvutsin Npugü! Nle nyuthyüo agun zen Jordan pfüthü ryüla? Agun pe Amornyu ben nyu shüo nke la ti tse ole? Nyuthyüo agun no Jordan pere zin bin tinla mvula?

⁸O Npugü, Ale nyu zo semon, Israel nyu le shwikerüchün nyu mhundyü ka tesen nikela sile?

⁹Kanan nyu lo tsü kazü nyu kebin nyu aphu tsü shashüo. Anyugun le ryü agun hun lo njüo agun dushvu kü kelai so! Tson yatselo dihontse n kerühvu le bin lomon?”

¹⁰Npugü le Joshua ka zoshü, “Sola! Nle nyuthyüo hihontse kazünyu jübin nla?

¹¹Israel le mu laso! Ale anyugun no then lo tse kejozen keshü gü borho laso. Anyugun le nkelo tse nmu kela kanyü peha khilo laso. Anyugun le rühu, lo nkula tson-o khipe anyu kanyü kerhün lo laso.

¹²Hi genyu Israel nyu le shwikerüchün nyu mhundyü ka solomvu. Anyugun le ntsoka we nkela titse nmukela hon thyü kela genyu me mhundyü ka tesen ni laso! Hagun no khilo nyalo tse keshü kanyü tsü nkela kemvu we ale hagun zen bin sinlo hoso!

¹³Solo! Temi dan thyü kenshünlo, njüo anyu no amhundyü ka ryü nrün gwendo lo. Anyugun no sendu genyu ndolo lotse zoshülo, Israel nyu Npugü Sunggigü le hizo nrün genyu: ‘Israel, ale nkela lo tse keshü kanyü peha le nben nyu bin! Nle tha hidan khela kemvu we nshwikerüchün nyu mhundyü nyu so loho!’

¹⁴Tsügenyu lonyü anyugun no tsipwen nme me thyü mhundyü chwiryü ti. Lo ale ten keshü kami ka a-pfü nmeme thyü mhundyü ryüti. Ale ten keshü pfü gü le kakhün nmeme thyü mhundyü ryüti. Lo ale ten keshü kakhün ka temi nme me thyü ryüti.

¹⁵Tson-o ten lo-o nmu kela kanyü sen kehü hyu kelo gü, ale, a-kakhün lo a-hon aphu pe ro lati, a-le a-zen kejozenkelo gü borho la lo keja kepfü kenrin kethyü senryü Israel ge keshü genyu!”

¹⁶Lonyü gü Joshua le Israel nyu tsipwen nmeme zenryüo Juda tsipwen tenlo.

¹⁷A-pfü nmeme zenryüo Zerah pfü tenlo. Tson-o Zera pfü dan zenryüo Zabdi kami tenlo.

¹⁸A-le Zabdi nyu kami temi nme me zenryüo Karmi nyugü a-zan le Akan tse kethyü gü tenlo.

¹⁹Joshua le a-ka zoshü, “A nyugü, hika Npugü Israel Sunggigü mhundyü nyu joketsin zoshwi shülo. Nle nyuthyü layo ntsoka aka zoshülo. Tsü pe a kebu nyalo,” tson shü.

²⁰Tsontsin, Akan le a-jokenishü, “Ketsin le, Ale Npugü Israel Sunggigü mhundyü nyu mu laso, ale hihontse lale.

²¹Ngun le khinkelo kazü dan nyu, ale Babilon nyu phi kezegwa nme, rakagi kilogram kenyhun, suna ron kensu le kilogram ponha kho hyulo-o. Ale tepen ri lao khilo la le. Tson-o tsü pe a phika nyu ki rakagi pe tesintsin thyüo sun njü nle,” tson shü.

²²Tsügenyu Joshua le temi peha nishüo phika ki gü laryü rakagi lo tesin thyüo nmukela hon dan pe sun kebin hyulo.

²³Anyugun le phika gü nyu tsü sen Joshua lo Israel nyu aphu ki ryüo pe Npugü mhundyü nyu hoshü.

²⁴Tsüselo Joshua le Israel nyu zen-o Akan, rakagi, phigü, suna ron, Akan nyu peche lo tenu dan, a-thu, gada, lo tanyü, lo a-phika lo a-hon kecha aphu khilo-o sen kekevü kazü ketejon ki gü.

²⁵Tson-o Joshua le, “Nle nyuthyüo kekevü tsühontse kethyü senryü agun ge shü la? Ntsoka Npugü le kenjün kethyü senryü nge shü tiso!” tse zoshü. Lo temi aphu tso pe akan jonshvula; anyugun le a-kami nyu dan ko jon shvula lo a-hon aphu sin pe rola.

²⁶Anyugun le tso shwe pe a-so ge khwe da thyüla nthu keti tsüka tson bin. Tsügenyu bin tsügü pe kekevü kazü ketejon tse kola. Tsontsin Npugü le a-nyunta sin mvula.